ಕೋವಿಡ್​ ಎರಡನೇ ಅಲೆ ನಂತರ ಚೇತರಿಕೆಗಾಗಿ ಬಡ್ಡಿದರದಲ್ಲಿ ಯಥಾಸ್ಥಿತಿ: ಆರ್​ಬಿಐ

ಆರ್ಥಿಕತೆಯು ನಿಧಾನವಾಗಿ ಚೇತರಿಕೆ ಕಾಣುತ್ತಿರುವಾಗ ಆರ್‌ಬಿಐನ ವಿವಿಧ ದರಗಳ ಮೇಲೆ ತಿದ್ದುಪಡಿ ಮಾಡಿ ಬೆಳವಣಿಗೆಯನ್ನು ಹಳಿ ತಪ್ಪಿಸಲು ಹೋಗಬಾರದು ಎಂಬ ಕಾರಣಕ್ಕೆ ದರಗಳಲ್ಲಿ ಬದಲಾವಣೆ ಮಾಡಿಲ್ಲ ಎಂದು ಶಕ್ತಿಕಾಂತ್ ದಾಸ್ ಅಭಿಪ್ರಾಯಪಟ್ಟಿದ್ದಾರೆ.

ಮುಂಬೈ: ಸತತ ಏಳನೇ ಬಾರಿಗೆ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಶುಕ್ರವಾರ ರೆಪೋ ರೇಟ್ ಅನ್ನು​​ (ಬಡ್ಡಿ ದರವನ್ನು) ಯಥಾಸ್ಥಿತಿಯಲ್ಲಿಡಲು ನಿರ್ಧರಿಸಿದೆ. ಈ ಮೂಲಕ ಬಡ್ಡಿ ದರ ಶೇಕಡಾ 4ರಷ್ಟೇ ಇರಲಿದೆ ಎಂದು ಆರ್‌ಬಿಐ ಗವರ್ನರ್​ ಶಕ್ತಿಕಾಂತ ದಾಸ್ ತಿಳಿಸಿದರು.

ಜಾಗತಿಕ ಹಣಕಾಸು ಮಾರುಕಟ್ಟೆಯ ಏರಿಳಿತಗಳು ಮತ್ತು ಕೋವಿಡ್​​ ನಂತರ ಚೇತರಿಕೆಯ ಕಾರಣದಿಂದ ಬಡ್ಡಿ ದರವನ್ನು ಬದಲಾವಣೆ ಮಾಡದಿರಲು ಆರ್​ಬಿಐ ನಿರ್ಧರಿಸಿದೆ ಎಂದು ಅವರು ವಿವರಿಸಿದರು.

ವಿತ್ತೀಯ ನೀತಿ ಸಮಿತಿ (Monetary Policy Committee- MPC) ಸಭೆ ನಡೆಸಿದ ಮೂರು ದಿನಗಳ ನಂತರ ಈ ಘೋಷಣೆ ಮಾಡಲಾಗಿದ್ದು, 2020ರ ಫೆಬ್ರವರಿಯಿಂದ ಸುಮಾರು 115 ಬೇಸಿಸ್ ಪಾಯಿಂಟ್​ಗಳನ್ನು ಆರ್​​​ಬಿಐ ಕಡಿತಗೊಳಿಸಿದೆ.

ರಿವರ್ಸ್ ರೆಪೋ ರೇಟ್​ 3.35ರಷ್ಟಕ್ಕೆ ಫಿಕ್ಸ್ ಮಾಡಲಾಗಿದ್ದು, ಕೋವಿಡ್ ಎರಡನೇ ಅಲೆಯಿಂದ ಉಂಟಾದ ಆರ್ಥಿಕ ಬೆಳವಣಿಗೆಯ ಇಳಿಕೆ ಹಿನ್ನೆಲೆಯಲ್ಲಿ ಭವಿಷ್ಯದಲ್ಲಿ ಚೇತರಿಕೆ ಕಾಣಲು ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ.

ಆರ್ಥಿಕತೆಯು ನಿಧಾನವಾಗಿ ಚೇತರಿಕೆ ಕಾಣುತ್ತಿರುವಾಗ, ಆರ್‌ಬಿಐನ ವಿವಿಧ ದರಗಳ ಮೇಲೆ ತಿದ್ದುಪಡಿ ಮಾಡಿ ಬೆಳವಣಿಗೆಯನ್ನು ಹಳಿ ತಪ್ಪಿಸಲುಹೋಗಬಾರದು ಎಂಬ ಕಾರಣಕ್ಕೆ ದರಗಳಲ್ಲಿ ಬದಲಾವಣೆ ಮಾಡಿಲ್ಲ ಎಂದು ಶಕ್ತಿಕಾಂತ್ ದಾಸ್ ಅಭಿಪ್ರಾಯಪಟ್ಟಿದ್ದಾರೆ.

ಜಿ-ಎಸ್ಎಪಿ 2.0 (G-SAP-Government Securities Acquisition Programme) ಅಥವಾ ಸರ್ಕಾರಿ ಭದ್ರತೆಗಳ ಸ್ವಾಧೀನ ಕಾರ್ಯಕ್ರಮದ ಬಗ್ಗೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಉಲ್ಲೇಖಿಸಿದೆ.

ಈ ಕಾರ್ಯಕ್ರಮದ ಅಡಿಯಲ್ಲಿ ಎರಡನೇ ಹಂತದ ಮಾರುಕಟ್ಟೆಯಲ್ಲಿ ಬರುವ ಸುಮಾರು 50 ಸಾವಿರ ಕೋಟಿ ಮೌಲ್ಯದ ಷೇರುಗಳು, ಬಾಂಡ್​ಗಳನ್ನು ಈ ತಿಂಗಳಲ್ಲಿ ಎರಡು ಹಂತಗಳಲ್ಲಿ ಸ್ವಾಧೀನಪಡಿಸಿಕೊಳ್ಳಲಾಗುತ್ತದೆ. ಮೂಲಕ ಬಡ್ಡಿದರಗಳಲ್ಲಿನ ವ್ಯತ್ಯಾಸವನ್ನು ಸರಿಪಡಿಸುವುದಾಗಿ ಭಾರತೀಯ ರಿಸರ್ವ್ ಬ್ಯಾಂಕ್ ಹೇಳಿದೆ.

ಇದನ್ನೂ ಓದಿ:ದುಬೈನಿಂದ ಮಂಗಳೂರಿಗೆ ಬಂದ ವ್ಯಕ್ತಿಯಲ್ಲಿ ಇಟಾ ರೂಪಾಂತರಿ ಪತ್ತೆ