ರೇಪ್​ ಕೇಸ್​ನಲ್ಲಿ ಅಮಾನತುಗೊಂಡ ಡಿಎಸ್​ಪಿಯಿಂದ ಸಂತ್ರಸ್ತೆಗೆ ಕೊಲೆ ಬೆದರಿಕೆ

ಯೂನಿಸೆಫ್ ಮಹಿಳಾ​ ಉದ್ಯೋಗಿಯ ಮೇಲಿನ ಅತ್ಯಾಚಾರ ಆರೋಪಕ್ಕೆ ಸಂಬಂಧಿಸಿದಂತೆ ಪೊಲೀಸ್​ ಅಧಿಕಾರಿ ನವನೀತ್​ ನಾಯಕ ಅಮಾನತುಗೊಂಡಿದ್ದಾರೆ. ಈಗ ತನ್ನ ವಿರುದ್ಧದ ಕೇಸ್​​ ಹಿಂಪಡೆಯದಿದ್ದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕುತ್ತಿದ್ದಾರೆ ಎಂದು ಸಂತ್ರಸ್ತೆ ಆರೋಪಿಸಿದ್ದಾರೆ.

ಪ್ರತಾಪ್​ಗಢ್(ಉತ್ತರ ಪ್ರದೇಶ): ಉತ್ತರ ಪ್ರದೇಶದ ಪ್ರತಾಪ್​ಗಢ್ ಜಿಲ್ಲೆಯ ಮಾಜಿ ಉಪ ಪೊಲೀಸ್ ವರಿಷ್ಠಾಧಿಕಾರಿ (ಡಿಎಸ್​ಪಿ) ನವನೀತ್​ ನಾಯಕ ​ಅತ್ಯಾಚಾರ ಪ್ರಕರಣದಲ್ಲಿ ಸಿಲುಕಿಕೊಂಡಿದ್ದಾರೆ. ಇದೇ ಆರೋಪದಡಿ ಅಮಾನತುಗೊಂಡಿರುವ ಅವರ ವಿರುದ್ಧ ಮತ್ತೊಂದು ಹೊಸ ಆರೋಪ ಕೇಳಿ ಬಂದಿದೆ. ತನ್ನ ವಿರುದ್ಧದ ಕೇಸ್​​ ಹಿಂಪಡೆಯದಿದ್ದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕುತ್ತಿದ್ದಾರೆ ಎಂದು ಅತ್ಯಾಚಾರ ಸಂತ್ರಸ್ತೆ ಆರೋಪಿಸಿದ್ದಾರೆ.

ಯೂನಿಸೆಫ್​ ಉದ್ಯೋಗಿಯಾಗಿದ್ದ ಮಧ್ಯಪ್ರದೇಶದ ಮೂಲದ ಮಹಿಳೆಯೊಬ್ಬರು ಸಾಮಾಜಿಕ ಜಾಲತಾಣಗಳ ಮೂಲಕ ಪೊಲೀಸ್​ ಅಧಿಕಾರಿ ನವನೀತ್​ ನಾಯಕ ಸಂಪರ್ಕಕ್ಕೆ ಬಂದಿದ್ದರು. ಆದರೆ, ನಂತರ ಮದುವೆಯಾಗುವುದಾಗಿ ನಂಬಿಸಿ ಅತ್ಯಾಚಾರ ಮಾಡಿದ್ದಾರೆ ಎಂದು ಆರೋಪಿಸಿ ಕಳೆದ 2021ರ ಜುಲೈನಲ್ಲಿ ಮಹಿಳೆ ದೂರು ದಾಖಲಿಸಿದ್ದರು. ಇದೇ ಕಾರಣಕ್ಕಾಗಿ ಅಕ್ಟೋಬರ್​ 12ರಂದು ಸೇವೆಯಿಂದ ನಾಯಕ ಅಮಾನತುಗೊಂಡಿದ್ದರು. ಇದಾದ 4 ದಿನಗಳ ನಂತರ ಅವರು ಅತ್ಯಾಚಾರ ಕೇಸ್​​ ಕೂಡ ದಾಖಲಾಗಿತ್ತು. ಸದ್ಯ ನಿರೀಕ್ಷಣಾ ಜಾಮೀನಿನ ಮೇಲೆ ಹೊರಗಡೆ ಇದ್ದಾರೆ.

ಇದೀಗ ಮಾಜಿ ಪೊಲೀಸ್​ ಅಧಿಕಾರಿಯಿಂದ ತನಗೆ ಕೊಲೆ ಬೆದರಿಕೆ ಇದೆ ಎಂದು ಆರೋಪಿಸಿ ಸಂತ್ರಸ್ತೆ ರವಿವಾರ ಮತ್ತೆ ಪೊಲೀಸ್​ ಠಾಣೆ ಮೆಟ್ಟಿಲೇರಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಹಾಲಿ ಡಿಎಸ್​ಪಿ ಅಭಯ್​ ಪಾಂಡೆ, ಮಾಜಿ ಡಿಎಸ್​ಪಿ ನವನೀತ್​ ನಾಯಕ ತನಗೆ ಬೆದರಿಕೆಯಾಗಿದ್ದಾರೆ ಎಂದು ಮಹಿಳೆ ದೂರು ಸಲ್ಲಿಸಿದ್ದಾರೆ. ಈ ಸಂಬಂಧ ಪಟ್ಟಿ ಕೋತ್ವಾಲಿ ಪೊಲೀಸ್​​ ಠಾಣೆಯಲ್ಲಿ ಹೊಸದಾಗಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದೇವೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಇದನ್ನೂ ಓದಿ:ಮಹಡಿಯಿಂದ ಜಿಗಿದು ಪ್ರೇಮ ವಿವಾಹವಾಗಿದ್ದ ವಕೀಲೆ ಆತ್ಮಹತ್ಯೆ : ಪೊಲೀಸರಿಗೆ ಶರಣಾದ ಪತಿ