ಭಯೋತ್ಪಾದಕ ಶಕ್ತಿಗಳ ಪ್ರಾಬಲ್ಯ ತಾತ್ಕಾಲಿಕ : ಪರೋಕ್ಷವಾಗಿ ತಾಲಿಬಾನ್‌ಗೆ ಪ್ರಧಾನಿ ಮೋದಿ ಟಾಂಗ್

ಮೋದಿ ಗುಜರಾತ್‌ನ ಸೋಮನಾಥದಲ್ಲಿ ವಿವಿಧ ಪ್ರಮುಖ ಯೋಜನೆಗಳಿಗೆ ಶಿಲಾನ್ಯಾಸ ನೆರವೇರಿಸಿದ್ದಾರೆ. ಭಯೋತ್ಪಾದಕ ಶಕ್ತಿಗಳ ಪ್ರಾಬಲ್ಯ ತಾತ್ಕಾಲಿಕ ಮತ್ತು ಅವುಗಳ ಅಸ್ತಿತ್ವ ಶಾಶ್ವತವಲ್ಲ ಎಂದು ಸೋಮನಾಥ ದೇವಾಲಯದ ಮೇಲಿನ ಈ ಹಿಂದಿನ ದಾಳಿಯನ್ನು ಪ್ರಧಾನಿ ಮೋದಿ ನೆನಪಿಸಿಕೊಂಡರು..

ನವದೆಹಲಿ :ವಿಧ್ವಂಸಕ ಶಕ್ತಿಗಳು ಭಯೋತ್ಪಾದನೆಯ ಮೂಲಕ ಕೆಲಕಾಲ ಅಧಿಕಾರ ಹೊಂದಿದ್ದರೂ, ಅವರ ಅಸ್ತಿತ್ವ ಶಾಶ್ವತವಾಗಿರುವುದಿಲ್ಲ. ಮಾನವೀಯತೆಯನ್ನು ಎಂದಿಗೂ ಹತ್ತಿಕ್ಕಲು ಸಾಧ್ಯವಿಲ್ಲ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.

ಅಫ್ಘಾನಿಸ್ತಾನವನ್ನು ತಾಲಿಬಾನ್ ವಶಕ್ಕೆ ಪಡೆದು ಅಧಿಕಾರ ನಡೆಸಲು ಮುಂದಾಗುತ್ತಿರುವ ಸಂದರ್ಭದಲ್ಲೇ ಪ್ರಧಾನಿ ಇಂತಹ ಟೀಕೆಗಳನ್ನು ಮಾಡಿದ್ದಾರೆ. ಗುಜರಾತಿನ ಐತಿಹಾಸಿಕ ಸೋಮನಾಥ ದೇವಸ್ಥಾನಕ್ಕೆ ಸಂಬಂಧಿಸಿದ 83 ಕೋಟಿ ರೂಪಾಯಿಗಳ ಹಲವು ಯೋಜನೆಗಳಿಗೆ ಪ್ರಧಾನಿ ಮೋದಿ ವಿಡಿಯೋ ಕಾನ್ಫರೆನ್ಸ್‌ ಮೂಲಕ ಶಿಲಾನ್ಯಾಸ ನೆರವೇರಿಸಿ ಮಾತನಾಡಿದರು.

ಸೋಮನಾಥ ದೇವಸ್ಥಾನವನ್ನು ಹಲವು ಬಾರಿ ಧ್ವಂಸ ಮಾಡಲಾಗಿದೆ. ವಿಗ್ರಹಗಳನ್ನು ಅಪವಿತ್ರಗೊಳಿಸಲಾಗಿದೆ. ದೇವಸ್ಥಾನ ನಾಶ ಮಾಡಲು ಯತ್ನಿಸಿದರು. ಆದರೆ, ದಾಳಿ ಮಾಡಿದ ಪ್ರತಿಬಾರಿಯೂ ಮತ್ತೆ ತನ್ನ ವೈಭವವನ್ನು ದೇವಾಲಯ ಪ್ರದರ್ಶಿಸುತ್ತಲ್ಲೇ ಇದೆ. ನಮಗೆ ಇದು ಆತ್ಮ ವಿಶ್ವಾಸವನ್ನು ನೀಡುತ್ತಿದೆ ಎಂದು ಪ್ರಧಾನಿ ಹೇಳಿದ್ದಾರೆ.

ಪ್ರವಾಸೋದ್ಯಮ ಸ್ಪರ್ಧಾತ್ಮಕ ಸೂಚ್ಯಂಕದಲ್ಲಿ ಭಾರತದ 2013ರಲ್ಲಿ 65ನೇ ಸ್ಥಾನದಲ್ಲಿತ್ತು. 2019ರಲ್ಲಿ 34ನೇ ಸ್ಥಾನ ಪಡೆದಿದೆ. ಪ್ರವಾಸೋದ್ಯಮ ಬಲಪಡಿಸುವ ಅಗತ್ಯವಿದ್ದು, ಇದರಿಂದ ಯುವಕರಿಗೆ ಉದ್ಯೋಗವನ್ನು ಕೂಡ ಒದಗಿಸಬಹುದು ಎಂದರು.

ಇದನ್ನೂ ಓದಿ: ಆಫ್ಘನ್​ ಬಿಕ್ಕಟ್ಟು: ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ಮಹತ್ವದ ಸಭೆ

ಪ್ರಮುಖ ಯೋಜನೆಗಳು

ಇಂದು ಶಿಲಾನ್ಯಾಸ ಮಾಡಿದ ಯೋಜನೆಗಳಲ್ಲಿ ಸೋಮನಾಥ ಯಾತ್ರೆ, ಸೋಮನಾಥ ವಸ್ತು ಪ್ರದರ್ಶನಾಲಯ, ಪಾರ್ವತಿ ದೇವಸ್ಥಾನ ಹಾಗೂ ಹಳೆಯ (ಜುನ) ಸೋಮನಾಥ ದೇವಾಲಯದ ನವೀಕರಣ ಸೇರಿದೆ. ಪ್ರಧಾನಿ ಮೋದಿ ಸೋಮನಾಥ ಟ್ರಸ್ಟ್ (SST) ಅಧ್ಯಕ್ಷರಾಗಿದ್ದಾರೆ.

ಪಾರ್ವತಿ ದೇವಿ ದೇವಸ್ಥಾನವನ್ನು ಮುಖ್ಯ ದೇವಾಲಯದಲ್ಲಿ 30 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗುತ್ತಿದೆ. ಸೋಮನಾಥ ದೇವಾಲಯದ ಹಿಂಭಾಗದ ಕಡಲತೀರದಲ್ಲಿ ಅಂದಾಜು 49 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾದ ಒಂದು ಕಿ.ಮೀ ಉದ್ದದ 'ಸಮುದ್ರ ದರ್ಶನಂ' ನಡಿಗೆಯನ್ನು ಇದೇ ವೇಳೆ ಪ್ರಧಾನಿ ಉದ್ಘಾಟಿಸಿದರು. ಸಮಾರಂಭದಲ್ಲಿ ಕೇಂದ್ರ ಗೃಹ ಸಚಿವ ಅಮಿತ್ ಶಾ, ಗುಜರಾತ್ ಮುಖ್ಯಮಂತ್ರಿ ವಿಜಯ್ ರೂಪಾನಿ ಸೇರಿ ಹಲವು ನಾಯಕರು ಉಪಸ್ಥಿತರಿದ್ದರು.