ಮಹಾರಾಷ್ಟ್ರದ ನಗರಗಳಿಗೆ ಮರುನಾಮಕರಣ: ಯಾವ ನಗರಕ್ಕೆ ಯಾವ ಹೆಸರು ?

ಮಹಾರಾಷ್ಟ್ರದಲ್ಲಿನ ಕೆಲವು ರಸ್ತೆಗಳ, ಕಾಲೋನಿಗಳ ಹಾಗೂ ನಗರಗಳ ಹೆಸರನ್ನು ಮರುನಾಮಕರಣ ಮಾಡಲು ಸರ್ಕಾರ ಮುಂದಾಗಿದೆ. ಈ ಕಾರಣಕ್ಕೆ ಅಲ್ಲಿನ ವಿರೋಧ ಪಕ್ಷಗಳು ತೀವ್ರ ಆಕ್ರೋಶ ಹೊರಹಾಕುತ್ತಿವೆ.

ಮುಂಬೈ: ಮಹಾರಾಷ್ಟ್ರದಲ್ಲಿನ ಕೆಲವು ರಸ್ತೆಗಳ, ಕಾಲೋನಿಗಳ ಹಾಗೂ ನಗರಗಳ ಹೆಸರನ್ನು ಮರುನಾಮಕರಣ ಮಾಡಲು ಸರ್ಕಾರ ಮುಂದಾಗಿದ್ದು, ರಾಜಕೀಯ ವಲಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ನಾನಾ ಶಂಕರ್‌ಶೇಠ್​ ಸ್ಟೇಷನ್ ಆಗಿ ಬದಲಾಗಲಿದೆ ಮುಂಬೈ ರೈಲು ನಿಲ್ದಾಣ:

ರಾಜ್ಯದ ರಾಜಧಾನಿ ಮುಂಬೈ ಆಗಿದ್ದು ದೇಶದ ಆರ್ಥಿಕ ರಾಜಧಾನಿ ಎಂದೂ ಕರೆಸಿಕೊಳ್ಳುತ್ತದೆ. ಹಾಗೆಯೇ ರೈಲ್ವೆ ಸಾರಿಗೆಯು ನಗರದಲ್ಲಿ ವಿಶಿಷ್ಟವಾದ ಮಹತ್ವವನ್ನು ಹೊಂದಿದೆ. ಪಶ್ಚಿಮ ರೈಲ್ವೆಯ ಮುಖ್ಯ ನಿಲ್ದಾಣವಾದ ಮುಂಬೈ ಸೆಂಟ್ರಲ್​ ಅನ್ನು ಈಗ ಮರುನಾಮಕರಣ ಮಾಡಲಾಗುತ್ತಿದೆ. ಈ ನಿಲ್ದಾಣ ನಾನಾ ಶಂಕರ್‌ಶೇಠ್​ ನಿಲ್ದಾಣವಾಗಿ ಬಲಾಗುತ್ತಿದೆ. ಈ ಸಂಬಂಧ ದಕ್ಷಿಣ ಮುಂಬೈ ಸಂಸದ ಅರವಿಂದ ಸಾವಂತ್ ಕೇಂದ್ರಕ್ಕೆ ಪತ್ರ ಬರೆದು ಹೆಸರು ಬದಲಾವಣೆಗೆ ಸೂಚಿಸಿದ್ದರು. ಈಗ ರೈಲ್ವೆ ಸಚಿವಾಲಯದಿಂದ ಗ್ರೀನ್​ ಸಿಗ್ನಲ್​ ಪಡೆದಿದ್ದಾರೆ. ಶೀಘ್ರದಲ್ಲೇ ನಾನಾ ಶಂಕರ್‌ಶೇಠ್​ ಅವರ ಹೆಸರಿನ ಬೋರ್ಡ್​ ಇಲ್ಲಿ ಕಾಣಸಿಗಲಿದೆ.

ನಾನಾ ಶಂಕರ್ ಶೇಠ್​ ಯಾರು?

ನಾನಾ ಶಂಕರ್ ಶೇಠ್​ 1803 ರ ಫೆಬ್ರವರಿ 10 ರಂದು ಮುಂಬೈ ಬಳಿಯ ಮುರ್ಬಾದ್‌ನಲ್ಲಿ ಜನಿಸಿದವರು. ನಾನಾ ಅವರ ನಿಜವಾದ ಹೆಸರು ಜಗನ್ನಾಥ್ ಮುರ್ಕುಟೆ. ಇವರದು ಬಹಳ ಶ್ರೀಮಂತ ಕುಟುಂಬ. ನಾನಾ ಅವರನ್ನು 19 ನೇ ಶತಮಾನದ ಶ್ರೇಷ್ಠ ಕೈಗಾರಿಕೋದ್ಯಮಿಗಳಲ್ಲಿ ಒಬ್ಬರೆಂದು ಕರೆಯಲಾಗುತ್ತಿತ್ತು. ನಾನಾ ತಮ್ಮ ಆಸ್ತಿಯ ಬಹುಪಾಲು ಭಾಗವನ್ನು ನಗರದ ಅಭಿವೃದ್ಧಿಗೆ ದಾನ ಮಾಡಿದ್ದರು.

ನಾನಾ ಅವರು ಮುಂಬೈ ನಗರದ ಅಭಿವೃದ್ಧಿ ಯೋಜನೆಗಳಲ್ಲಿ ಪ್ರಮುಖ ಪಾತ್ರ ವಹಿಸಿದವರು. ಸಮುದಾಯ ಆಸ್ಪತ್ರೆ ಮತ್ತು ಎಲ್ಫಿನ್‌ಸ್ಟೋನ್ ಕಾಲೇಜಿನ ನಿರ್ಮಾಣದಲ್ಲಿ ಇವರ ಸೇವೆ ಅನನ್ಯ.

ಔರಂಗಾಬಾದ್​ ಈಗ ಸಂಭಾಜಿನಗರ :

ಔರಂಗಾಬಾದ್ ಹೆಸರನ್ನು ಮರುನಾಮಕರಣ ಮಾಡುವ ವಿಷಯವು ಹಲವು ವರ್ಷಗಳಿಂದ ಚರ್ಚೆಯಲ್ಲಿದೆ. ಈ ಹಿಂದೆ ದಿವಂಗತ ಶಿವಸೇನೆ ಮುಖ್ಯಸ್ಥ ಬಾಳಾಸಾಹೇಬ್ ಠಾಕ್ರೆ ಔರಂಗಾಬಾದ್ ಅನ್ನು ಸಂಭಾಜಿ ನಗರ ಎಂದು ಕರೆದಿದ್ದರು. ತಮ್ಮ ಭಾಷಣಗಳದಲ್ಲಿ ಈ ಬಗ್ಗೆ ಉಲ್ಲೇಖ ಮಾಡಿದ್ದರು. ಈ ಮಧ್ಯೆ ಈ ವಿಷಯವು ಸ್ವಲ್ಪ ಹಿಂದೆ ಸರಿದಿತ್ತು. ಈಗ ಮತ್ತೇ ಚರ್ಚೆಗೆ ಬಂದಿದೆ. ಹೆಸರು ಬದಲಾಯಿಸುವಲ್ಲಿ ಶಿವಸೇನೆ ವಿಷಯವನ್ನು ಕೈಗೆತ್ತಿಕೊಂಡಿದೆ.

ಪುಣೆಗೆ ಜಿಜಾಪುರದ ನಾಮಕರಣ:

ಸಾಂಸ್ಕೃತಿಕ ರಾಜಧಾನಿಯಾದ ಪುಣೆಯ ಹೆಸರನ್ನೂ ಬದಲಾವಣೆ ಮಾಡಬೇಕೆಂಬ ಬೇಡಿಕೆ ಹಲವಾರು ವರ್ಷಗಳಿಂದ ಚಾಲ್ತಿಯಲ್ಲಿದೆ. ಈ ಬದಲಾವಣೆಗೆ ಬಹುಜನ ಒಕ್ಕೂಟದ ಮುಖಂಡ ಪ್ರಕಾಶ್ ಅಂಬೇಡ್ಕರ್ ನಕಾರ ಎತ್ತಿದ್ದಾರೆ. ಅವರ ಪ್ರಕಾರ, ಪುಣೆಗೆ ಜಿಜಾಪುರದ ಬದಲಿಗೆ ಸಂಭಾಜಿನಗರ ಎಂದು ಮರು ನಾಮಕರಣ ಮಾಡಬೇಕು ಎಂದಿದ್ದಾರೆ.

ಈ ಸಂಬಂಧ ಕಾಂಗ್ರೆಸ್​ ಹಾಗೂ ಎನ್​ಸಿಪಿ ವಿರೋಧ ಮಾಡುತ್ತಿವೆ. ನಗರಗಳ ಮರುಹೆಸರಿಸುವ ಪ್ರಸ್ತಾಪ ನಮ್ಮ ಕಾರ್ಯಸೂಚಿಯಲ್ಲಿಲ್ಲ. ನಾವು 20 ವರ್ಷಗಳ ಹಿಂದೆ ಈ ಪ್ರಸ್ತಾಪವನ್ನು ತಿರಸ್ಕರಿಸಿದ್ದೇವೆ. ಅಭಿವೃದ್ಧಿ ಹೊಂದಿದ ನಗರಗಳ ಮರುನಾಮಕರಣವನ್ನು ನಾವು ನಂಬುವುದಿಲ್ಲ ಎಂದಿವೆ.