ವಿವಾಹಿತ ಮಹಿಳೆ ಜೊತೆಗಿದ್ದಾಗ ರೆಡ್​ ಹ್ಯಾಂಡ್​ ಆಗಿ ಸಿಕ್ಕಿ ಬಿದ್ದ ಎಎಸ್‌ಐ: ಅಲ್ಲಿಯೇ ಇಬ್ಬರಿಗೂ ಕಲ್ಯಾಣ

ಬಿಹಾರದ ಬೇಗುಸರಾಯ್‌ನಲ್ಲಿ ವಿವಾಹಿತ ಮಹಿಳೆಯೊಂದಿಗೆ ಇದ್ದಾಗ ಅಬಕಾರಿ ಪೊಲೀಸ್​ ಅಧಿಕಾರಿ ರೆಡ್​ ಹ್ಯಾಂಡ್​ ಆಗಿ ಮಹಿಳೆಯ ಕುಟುಂಬಸ್ಥರಿಗೆ ಸಿಕ್ಕಿ ಬಿದ್ದಿದ್ದಾರೆ. ಅಲ್ಲದೇ, ಇಬ್ಬರಿಗೂ ಅಲ್ಲಿಯೇ ಮದುವೆ ಸಹ ಮಾಡಲಾಗಿದೆ.

ಬೇಗುಸರಾಯ್ ( ಬಿಹಾರ): ಅಬಕಾರಿ ಪೊಲೀಸ್​ ಅಧಿಕಾರಿ ಮತ್ತು ಈತನೊಂದಿಗೆ ಸಂಬಂಧ ಹೊಂದಿದ್ದ ಮಹಿಳೆ ಇಬ್ಬರೂ ಒಟ್ಟಿಗೆ ಸಿಕ್ಕಿ ಬಿದ್ದಿದ್ದು, ಅಲ್ಲಿಯೇ ಇಬ್ಬರಿಗೂ ಮದುವೆ ಮಾಡಿಸಿರುವ ಘಟನೆ ಬಿಹಾರದ ಬೇಗುಸರಾಯ್‌ನಲ್ಲಿ ನಡೆದಿದೆ. ಪೊಲೀಸ್​ ಅಧಿಕಾರಿ ಮತ್ತು ಮಹಿಳೆ ಇಬ್ಬರೂ ವಿವಾಹಿತರಾಗಿದ್ದು, ಬಹಳ ದಿನಗಳಿಂದ ಇಬ್ಬರು ನಡುವೆ ಸಂಬಂಧ ಇತ್ತು ಎನ್ನಲಾಗಿದೆ.

ಅಬಕಾರಿ ಇಲಾಖೆಯ ಎಎಸ್‌ಐ ಆಗಿರುವ ಸುಮಂತ್ ಕುಮಾರ್ ಶರ್ಮಾ ಅವರ ಕುಟುಂಬ ಗುವಾಹಟಿಯಲ್ಲಿ ವಾಸಿಸುತ್ತಿದೆ. ಇದರ ನಡುವೆ ಬೇಗುಸರಾಯ್‌ನ ಬನ್ಹರಾ ಗ್ರಾಮದ ಮಹಿಳೆಯನ್ನು ಸುಮಂತ್ ಬಲೆಗೆ ಬೀಳಿಸಿಕೊಂಡಿದ್ದರು. ಅಲ್ಲದೇ, ಸುಮಂತ್ ಮಹಿಳೆ ನಿರಂತರವಾಗಿ ಮನೆಗೆ ಭೇಟಿ ನೀಡುತ್ತಿದ್ದರು. ಇತ್ತೀಚೆಗೆ ಮನೆಗೆ ಬಂದಾಗಲೂ ಸುಮಂತ್ ಮಹಿಳೆಯೊಂದಿಗೆ ಇದ್ದರು. ಈ ವಿಷಯ ತಿಳಿದ ಮಹಿಳೆಯ ಕುಟುಂಬಸ್ಥರು ಸ್ಥಳಕ್ಕಾಗಮಿಸಿ ಇಬ್ಬರನ್ನೂ ಹಿಡಿದಿದ್ದಾರೆ.

ಆಗ ಕುಟುಂಬಸ್ಥರು ಗಲಾಟೆ ಮಾಡಿದ್ದಾರೆ. ಅಲ್ಲದೇ, ಮಹಿಳೆಯು ತನ್ನನ್ನು ಮದುವೆಯಾಗುವಂತೆ ಸುಮಂತ್ ಕುಮಾರ್ ಶರ್ಮಾ ಮುಂದೆ ಬೇಡಿಕೆ ಇಟ್ಟಿದ್ದಾಳೆ. ಇದರಿಂದ ದಿಕ್ಕು ತೋಚದೇ ಕೊನೆಗೂ ಮಹಿಳೆಯ ಹಣೆಗೆ ಎಎಸ್‌ಐ ಸುಮಂತ್ ಕುಮಾರ್ ಶರ್ಮಾ ಸಿಂಧೂರ ಹಚ್ಚುವ ಮೂಲಕ ಮದುವೆಯಾಗಿದ್ದಾರೆ. ಇದರ ದೃಶ್ಯಗಳು ಮೊಬೈಲ್​ನಲ್ಲೂ ಸೆರೆ ಹಿಡಿದಿದ್ದು, ಸದ್ಯ ಎಎಸ್‌ಐ ಮದುವೆ ವಿಡಿಯೋ ವೈರಲ್​ ಆಗಿದೆ.

ಇತ್ತ, ಈ ಮಹಿಳೆಗೂ ಈ ಹಿಂದೆಯೇ ಮದುವೆಯಾಗಿತ್ತು. ಆದರೆ, ಮೊದಲ ಗಂಡ ಮೇಸ್ತ್ರಿಯಾಗಿದ್ದು, ಆತನ ಆದಾಯವೂ ಕಡಿಮೆಯಾಗಿದ್ದ ಕಾರಣ ಆತನೊಂದಿಗೆ ಜೀವಿಸಲು ಮಹಿಳೆಗೆ ಇಷ್ಟವಿರಲಿಲ್ಲ. ಅಷ್ಟರಲ್ಲಿ ಎಎಸ್‌ಐ ಸುಮಂತ್ ಕುಮಾರ್ ಶರ್ಮಾ ಪರಿಚಯವಾಗಿ, ಆತನೊಂದಿಗೆ ಪ್ರೇಮಾಂಕುರ ಉಂಟಾಗಿತ್ತು ಎಂದು ತಿಳಿದು ಬಂದಿದೆ.

ಶೋಕಾಸ್ ನೋಟಿಸ್​ ಜಾರಿ: ಇಡೀ ಘಟನೆ ಸಂಬಂಧ ಎಎಸ್‌ಐ ಸುಮಂತ್ ಕುಮಾರ್ ಶರ್ಮಾಗೆ ಇಲಾಖೆಯಿಂದ ಶೋಕಾಸ್ ನೋಟಿಸ್​ ಜಾರಿ ಮಾಡಲಾಗಿದೆ. ಸುಮಂತ್ ಶರ್ಮಾ ಎಂಟು ತಿಂಗಳಿಂದ ಅಬಕಾರಿ ಇಲಾಖೆಯಲ್ಲಿ ಡೆಪ್ಯುಟೇಶನ್ ಮೇಲೆ ಕೆಲಸ ಮಾಡುತ್ತಿದ್ದಾರೆ ಎಂದು ಬೇಗುಸರಾಯ್ ಅಬಕಾರಿ ಇಲಾಖೆಯ ಅಧೀಕ್ಷಕ ಅವಿನಾಶ್ ಪ್ರಕಾಶ್ ತಿಳಿಸಿದ್ದಾರೆ.

ಇದನ್ನೂ ಓದಿ:ಚಾಲಕನ ಅನುಚಿತ ವರ್ತನೆ: ಚಲಿಸುತ್ತಿದ್ದ ಆಟೋದಿಂದ ಜಿಗಿದ ಯುವತಿ.. ವಿಡಿಯೋ