ಒಡಿಶಾದಲ್ಲಿ ಬಾಲ ಬಿಚ್ಚಿದ ಕೆಂಪು ಉಗ್ರರು: ನಕ್ಸಲರು - ಭದ್ರತಾ ಪಡೆಗಳ ನಡುವೆ ಗುಂಡಿನ ಕಾಳಗ!

ಗೊಚ್ಚಾಡ ಪೊಲೀಸ್​ ಠಾಣಾ ವ್ಯಾಪ್ತಿಯ ಕೊಲಂಪಾರಾ ಗ್ರಾಮದಲ್ಲಿ ನಕ್ಸಲ್​ ನಿಗ್ರಹ ಪಡೆ, ನಕ್ಸಲರ ನೆಲೆಗಳ ಮೇಲೆ ದಾಳಿ ಮಾಡಿದ್ದು, ಈ ವೇಳೆ ಮಾವೋವಾದಿ-ಭದ್ರತಾ ಪಡೆ ನಡುವೆ ಗುಂಡಿನ ಚಕಮಕಿ ನಡೆದಿದೆ.

ಫುಲ್ಬಾನಿ(ಒಡಿಶಾ):ಕೆಲ ದಿನಗಳ ಹಿಂದಷ್ಟೇ ಛತ್ತೀಸ್​​ಗಢದ ಬಿಜಾಪುರ ಗಡಿಯಲ್ಲಿ 22 ಯೋಧರ ಬಲಿ ಪಡೆದಿರುವ ನಕ್ಸಲರು ಒಡಿಶಾದ ಕಂದಮಲ್​ ಜಿಲ್ಲೆಯಲ್ಲಿ ಇದೀಗ ಬಾಲ ಬಿಚ್ಚಿದ್ದಾರೆ.

ಇಲ್ಲಿನ ಗೊಚ್ಚಾಡ ಪೊಲೀಸ್​ ಠಾಣಾ ವ್ಯಾಪ್ತಿಯ ಕೊಲಂಪಾರಾ ಗ್ರಾಮದಲ್ಲಿ ನಕ್ಸಲ್​ ನಿಗ್ರಹ ಪಡೆ, ನಕ್ಸಲರ ನೆಲೆಗಳ ಮೇಲೆ ದಾಳಿ ಮಾಡಿತು. ಈ ವೇಳೆ ನಕ್ಸಲ್​ ನಿಗ್ರಹ ಪಡೆ ಮತ್ತು ನಕ್ಸಲರ ಮಧ್ಯ ಗುಂಡಿನ ಚಕಮಕಿ ನಡೆದಿದೆ.

ಘಟನೆಯಲ್ಲಿ ಯಾವುದೇ ಸಾವು ನೋವಿನ ವರದಿಯಾಗಿಲ್ಲ. ಆದರೆ ಮೋಯಿಸ್ಟ್​ ಕ್ಯಾಂಪ್​ನಿಂದ ಹಲವು ಸಾಮಗ್ರಿಗಳನ್ನ ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಖಚಿತ ಸುಳಿವಿನ ಮೇಲೆ ಈ ಭಾಗದಲ್ಲಿ ನಕ್ಸಲ್​ ನಿಗ್ರಹ ಪಡೆ ಹಾಗೂ ಪೊಲೀಸರ ಜಂಟಿ ತಂಡ ಏಪ್ರಿಲ್​ ನಾಲ್ಕರಿಂದಲೇ ಕಾರ್ಯಾಚರಣೆ ನಡೆಸುತ್ತಿತ್ತು ಎನ್ನಲಾಗಿದೆ. ಏಪ್ರಿಲ್​ ಐದರಂದು ನಕ್ಸಲ್​ ನಿಗ್ರಹ ಪಡೆ ಕಾರ್ಯಾಚರಣೆ ಮಾಡುತ್ತಿದ್ದಾಗ ನಕ್ಸಲರು ಗುಂಡಿನ ದಾಳಿ ನಡೆಸಿದ್ದರು. ನಕ್ಸಲರನ್ನು ಸುತ್ತುವರೆದ ಪೊಲೀಸ್ ಪಡೆ ಶರಣಾಗತಿ ಆಗುವಂತೆ ಮನವಿ ಮಾಡಿತ್ತು. ಆದರೆ, ಇದಕ್ಕೆ ಬಗ್ಗದ ಮಾವೋಯಿಸ್ಟ್​​ಗಳು ಗುಂಡಿನ ದಾಳಿ ನಡೆಸಿದ್ದರು. ಈ ವೇಳೆ ಸ್ವಯಂ ರಕ್ಷಣೆ ಮಾಡಿಕೊಂಡರು.

ಈ ವೇಳೆ ನಕ್ಸಲರು ತಪ್ಪಿಸಿಕೊಂಡು ಕಣ್ಮರೆಯಾಗಿದ್ದಾರೆ. ಅವರಿಗಾಗಿ ಜಂಟಿ ಕಾರ್ಯಪಡೆ ಹುಟುಕಾಟ ನಡೆಸಿದೆ.