ಮುಂದಿನ ಐದು ವರ್ಷ ಭಾರತದಲ್ಲಿ ಜಪಾನ್​​ ₹3.2 ಲಕ್ಷ ಕೋಟಿ ಹೂಡಿಕೆ: ಮೋದಿ ಘೋಷಣೆ

ಎರಡು ದಿನಗಳ ಭಾರತ ಪ್ರವಾಸದಲ್ಲಿರುವ ಜಪಾನ್ ಪ್ರಧಾನಿ ಫ್ಯೂಮಿಯೊ ಕಿಶಿಡಾ, ಮುಂದಿನ ಐದು ವರ್ಷಗಳಲ್ಲಿ 3.2 ಲಕ್ಷ ಕೋಟಿ ರೂ. ಹೂಡಿಕೆ ಮಾಡಲು ಮುಂದಾಗಿದ್ದಾರೆಂದು ಪ್ರಧಾನಿ ನರೇಂದ್ರ ಮೋದಿ ತಿಳಿಸಿದ್ದಾರೆ.

ನವದೆಹಲಿ: ಭಾರತ-ಜಪಾನ್​ ಶೃಂಗಸಭೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ, ಜಪಾನ್​​ ಪ್ರಧಾನಿ ಫ್ಯೂಮಿಯೊ ಕಿಶಿಡಾ ಭಾಗಿಯಾದರು. ಈ ವೇಳೆ ಮುಂದಿನ ಐದು ವರ್ಷದಲ್ಲಿ ಭಾರತದಲ್ಲಿ 3.2 ಲಕ್ಷ ಕೋಟಿ ರೂ.(42 ಬಿಲಿಯನ್​ ಡಾಲರ್​) ಹೂಡಿಕೆ ಮಾಡಲು ಜಪಾನ್ ಮುಂದಾಗಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಘೋಷಣೆ ಮಾಡಿದ್ದಾರೆ.

2018ರ ಬಳಿಕ ಭಾರತ-ಜಪಾನ್​ ನಡುವೆ 14ನೇ ಶೃಂಗಸಭೆ ನಡೆದಿದ್ದು, ಈ ವೇಳೆ ಉಭಯ ದೇಶದ ನಾಯಕರು ವಿವಿಧ ಒಪ್ಪಂದಗಳಿಗೆ ಸಹಿ ಹಾಕಿದ್ದಾರೆ. ಇದರ ಬೆನ್ನಲ್ಲೇ ಮಾತನಾಡಿರುವ ಪ್ರಧಾನಿ ನರೇಂದ್ರ ಮೋದಿ, ಭಾರತದಲ್ಲಿ ಅತಿ ಹೆಚ್ಚು ಹೂಡಿಕೆ ಮಾಡುವ ದೇಶಗಳ ಪೈಕಿ ಜಪಾನ್ ಕೂಡ ಒಂದಾಗಿದ್ದು, ಈಗಾಗಲೇ ಮುಂಬೈ-ಅಹಮದಾಬಾದ್​ ಹೈಸ್ಪೀಡ್​ ರೈಲು ಕಾರಿಡಾರ್​​ನಲ್ಲಿ ಭಾರತದ ಅಂಗವಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ತಿಳಿಸಿದರು.

ಪ್ರಗತಿ, ಸಮೃದ್ಧಿ ಮತ್ತು ಪಾಲುದಾರಿಕೆಯಲ್ಲಿ ಭಾರತ-ಜಪಾನ್​ ಸಂಬಂಧ ಗಟ್ಟಿಯಾಗಿದ್ದು, ದೇಶದಲ್ಲಿರುವ ಜಪಾನ್​​ನ ಎಲ್ಲ ಕಂಪನಿಗಳಿಗೆ ಸಾಧ್ಯವಾಗುವಷ್ಟು ಬೆಂಬಲ ನೀಡಲು ನಾವು ಸಿದ್ಧರಾಗಿದ್ದೇವೆ. ಜಪಾನ್ ಪ್ರಧಾನಿ ಕಿಶಿಡಾ ಭಾರತದ ಹಳೆಯ ಸ್ನೇಹಿತರಾಗಿದ್ದು, ಈ ಹಿಂದೆ ಅವರು ಜಪಾನ್​ ವಿದೇಶಾಂಗ ಸಚಿವರಾಗಿದ್ದ ವೇಳೆ ಅನೇಕ ರೀತಿಯ ಅಭಿಪ್ರಾಯ ಹಂಚಿಕೊಂಡಿದ್ದೇನೆ ಎಂದರು.

ಇದೇ ವೇಳೆ ಮಾತನಾಡಿರುವ ಜಪಾನ್ ಪ್ರಧಾನಿ, ಅನೇಕ ರೀತಿಯ ಗೊಂದಲಗಳಿಂದ ಇಡೀ ವಿಶ್ವ ಇಂದು ನಲುಗಿದೆ. ಭಾರತ-ಜಪಾನ್​ ನಡುವಿನ ಪಾಲುದಾರಿಕೆ ಅತ್ಯಂತ ಪ್ರಭಾವಶಾಲಿಯಾಗಿದೆ. ಇಂದಿನ ಶೃಂಗಸಭೆಯಲ್ಲಿ ರಷ್ಯಾ-ಉಕ್ರೇನ್​ ನಡುವಿನ ಬಿಕ್ಕಟ್ಟಿನ ಬಗ್ಗೆ ಸಹ ಚರ್ಚೆ ನಡೆಸಲಾಗಿದ್ದು, ಶಾಂತಿಯುತವಾಗಿ ಸಮಸ್ಯೆ ಬಗೆಹರಿಸಿಕೊಳ್ಳಲು ಮುಂದಾಗಬೇಕು ಎಂದು ಕರೆ ನೀಡಿದರು.

ಇಂಡೋ-ಪೆಸಿಫಿಕ್​ ಸಾಗರದಲ್ಲಿ ನಮಗೆ ಮುಕ್ತವಾಗಿ ಸಂಚಾರಕ್ಕಾಗಿ ಅವಕಾಶ ಸಿಗಬೇಕು ಎಂಬ ಇಂಗಿತ ವ್ಯಕ್ತಪಡಿಸಿರುವ ಜಪಾನ್ ಪಿಎಂ, ಉಕ್ರೇನ್​-ರಷ್ಯಾ ನಡುವಿನ ಬಿಕ್ಕಟ್ಟು ಶಾಂತಿಯುತವಾಗಿ ಬಗೆಹರಿಸಿಕೊಳ್ಳಲು ಭಾರತ-ಜಪಾನ್​​ ಸದಾ ಬೆಂಬಲ ನೀಡುತ್ತವೆ ಎಂದು ತಿಳಿಸಿದರು.