ಹಳಿ ಮೇಲೆ ಕುಳಿತು ಪಬ್‌ಜಿಯಲ್ಲೇ ಮೈಮರೆತ ಸಹೋದರರ ಮೇಲೆ ಹರಿದ ರೈಲು

ರೈಲ್ವೆ ಹಳಿ ಮೇಲೆ ಕುಳಿತು ಪಬ್​ಜಿ ಗೇಮ್​ ಆಡುತ್ತಾ ಮೈಮರೆತ ಸಹೋದರರ ಮೇಲೆ ರೈಲು ಹರಿದಿದ್ದು, ಇಬ್ಬರೂ ಸಾವನ್ನಪ್ಪಿರುವ ಘಟನೆ ರಾಜಸ್ಥಾನದ ಅಲ್ವಾರ್ ಜಿಲ್ಲೆಯಲ್ಲಿ ನಡೆದಿದೆ.

ಜೈಪುರ: ಪಬ್​ಜಿ ಗೇಮ್​ನಿಂದ ಆಗುವ ಅನಾಹುತಗಳು ಒಂದೆರಡಲ್ಲ. ರೈಲ್ವೆ ಹಳಿ ಮೇಲೆ ಕುಳಿತು ಮೊಬೈಲ್ ಫೋನ್​ನಲ್ಲಿ ಪಬ್​ಜಿ ಆಡುವುದರಲ್ಲಿ ಮಗ್ನರಾಗಿದ್ದ ಇಬ್ಬರು ಸಹೋದರರ ಮೇಲೆ ರೈಲು ಹರಿದು ದಾರುಣವಾಗಿ ಸಾವನ್ನಪ್ಪಿರುವ ಘಟನೆ ಶನಿವಾರ ರಾಜಸ್ಥಾನದ ಅಲ್ವಾರ್ ಜಿಲ್ಲೆಯಲ್ಲಿ ನಡೆದಿದೆ.

ಲೋಕೇಶ್ ಮೀನಾ (22) ಮತ್ತು ಆತನ ಕಿರಿಯ ಸಹೋದರ ರಾಹುಲ್ (19) ಮೃತರು. ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಿ ನಡೆಸುತ್ತಿದ್ದ ಸಹೋದರರು ರೂಪಬಾಸ್ ಪಟ್ಟಣದ ರೈಲ್ವೆ ಹಳಿಯಲ್ಲಿ ಕುಳಿತು ಪಬ್​ಜಿ ಆಡುತ್ತಿದ್ದರು. ಗೇಮ್​ನಲ್ಲೇ ಮುಳುಗಿಹೋದ ಯುವಕರು, ರೈಲು ಬರುವುದನ್ನು ನೋಡಲೇ ಇಲ್ಲ. ಪರಿಣಾಮ ರೈಲು ಇಬ್ಬರ ಮೇಲೆ ಹರಿದಿದೆ ಎಂದು ಸದರ್ ಠಾಣೆಯ ಇನ್ಸ್‌ಪೆಕ್ಟರ್‌ ನೋಹರ್ ಲಾಲ್ ಹೇಳಿದ್ದಾರೆ.

ಮೃತದೇಹಗಳ ಮರಣೋತ್ತರ ಪರೀಕ್ಷೆ ನಡೆಸಿ ಕುಟುಂಬಸ್ಥರಿಗೆ ಹಸ್ತಾಂತರಿಸಲಾಗಿದೆ.

ಇದನ್ನೂ ಓದಿ:ಅಮೆರಿಕದಲ್ಲಿ ಸಿಖ್‌ ಕ್ಯಾಬ್‌ ಚಾಲಕನ ಮೇಲೆ ಹಲ್ಲೆ; ಟರ್ಬನ್ ತೆಗೆದು ಹಾಕಿ ಅವಮಾನ