ಜನಪ್ರತಿನಿಧಿಗಳು, ಅಧಿಕಾರಿಗಳಿಗಾಗಿ 'ಭಾಷಾ ಕಲಿಕೆ ಕಾರ್ಯಕ್ರಮ'!

ವಿದೇಶಿ ಹಾಗೂ ಭಾರತದ ಭಾಷೆಗಳನ್ನು ಸಂಸತ್ತಿನ ಸದಸ್ಯರು, ರಾಜ್ಯ ಹಾಗೂ ಕೇಂದ್ರಾಡಳಿತ ಪ್ರದೇಶದ ಜನಪ್ರತಿನಿಧಿಗಳು, ಅಧಿಕಾರಿಗಳು ಕಲಿಯುವ ಸಲುವಾಗಿ 'ಭಾಷಾ ಕಲಿಕೆ ಕಾರ್ಯಕ್ರಮ'ವನ್ನು ಉದ್ಘಾಟಿಸಲಾಗುತ್ತಿದೆ.

ನವದೆಹಲಿ:ಭಾಷಾ ವೈವಿಧ್ಯತೆಯನ್ನು ಹೆಚ್ಚಿಸುವ ಸಲುವಾಗಿ, ಸಂಸತ್ತಿನ ಸದಸ್ಯರು, ರಾಜ್ಯ ಹಾಗೂ ಕೇಂದ್ರಾಡಳಿತ ಪ್ರದೇಶದ ಜನಪ್ರತಿನಿಧಿಗಳು, ಅಧಿಕಾರಿಗಳು ಮತ್ತು ಅವರ ಕುಟುಂಬ ಸದಸ್ಯರಿಗಾಗಿ 'ಭಾಷಾ ಕಲಿಕೆ ಕಾರ್ಯಕ್ರಮ'ವನ್ನು ಜೂನ್​ 22 ರಂದು ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರು ಮಂಗಳವಾರ ಉದ್ಘಾಟಿಸಲಿದ್ದಾರೆ.

ಈ ಕಾರ್ಯಕ್ರಮವನ್ನು ಪ್ರಜಾಪ್ರಭುತ್ವ ದೇಶಗಳ ಸಂಸದೀಯ ಸಂಶೋಧನೆ ಮತ್ತು ತರಬೇತಿ ಸಂಸ್ಥೆ (PRIDE) ಮತ್ತು ಲೋಕಸಭಾ ಕಾರ್ಯಾಲಯವು ಜಂಟಿಯಾಗಿ ಆಯೋಜಿಸಿವೆ. ಫ್ರಾನ್ಸ್, ಜರ್ಮನಿ, ಜಪಾನ್, ಪೋರ್ಚುಗಲ್, ರಷ್ಯಾ ಮತ್ತು ಸ್ಪೇನ್‌ನ ರಾಯಭಾರಿಗಳು ಮತ್ತು ವಿದೇಶದಲ್ಲಿರುವ ಭಾರತೀಯ ನಿಯೋಗದ ಗಣ್ಯರು ಕಾರ್ಯಕ್ರಮಕ್ಕೆ ವಿಶೇಷ ಆಹ್ವಾನಿತರಾಗಿದ್ದಾರೆ.

ಫ್ರೆಂಚ್, ಜರ್ಮನ್, ಜಪಾನೀಸ್, ಪೋರ್ಚುಗೀಸ್, ರಷ್ಯನ್ ಮತ್ತು ಸ್ಪ್ಯಾನಿಷ್ ಭಾಷೆಗಳಲ್ಲಿ ಆನ್‌ಲೈನ್ ವಿದೇಶಿ ಭಾಷಾ ಕೋರ್ಸ್‌ಗಳು ಜೂನ್ 22 ರಿಂದ ಪ್ರಾರಂಭವಾಗಲಿವೆ. ಭಾರತೀಯ ಸಂವಿಧಾನದ 8ನೇ ಪರಿಚ್ಛೇದದಡಿ ಬರುವ ಕನ್ನಡ, ಗುಜರಾತಿ, ಬಂಗಾಳಿ, ಮಲಯಾಳಂ, ಮರಾಠಿ, ಒಡಿಯಾ, ತಮಿಳು, ತೆಲುಗು, ಹಿಂದಿ ಮತ್ತು ಸಂಸ್ಕೃತ ಭಾಷೆಗಳನ್ನೂ ಕೋರ್ಸ್‌ನಲ್ಲಿ ಸೇರಿಸಲಾಗಿದ್ದು, ಜುಲೈ 5 ರಿಂದ ಇವುಗಳ ಕೋರ್ಸ್ ಪ್ರಾರಂಭವಾಗಲಿದೆ.

ಇದಲ್ಲದೇ ಅಸ್ಸಾಮೀಸ್, ಕಾಶ್ಮೀರಿ, ಸಿಂಧಿ, ಉರ್ದು, ಸಂತಾಲಿ, ನೇಪಾಳಿ, ಮೈತೆ, ಮಣಿಪುರಿ, ಬೊಡೊ ಕೊಂಕಣಿ, ಮೈಥಿಲಿ ಮತ್ತು ಪಂಜಾಬಿ ಭಾಷೆಗಳ ಕೋರ್ಸ್​ಗಳು ಜುಲೈ 12 ರಿಂದ ಪ್ರಾರಂಭವಾಗಲಿದೆ ಎಂದು ಮೂಲಗಳು ತಿಳಿಸಿವೆ.