ಪ್ರತಿ 20 ನಿಮಿಷಕ್ಕೆ ಒಬ್ಬ ಪೊಲೀಸ್​ಗೆ ಕೊರೊನಾ ಸೋಂಕು

ಮಹಾಮಾರಿ ಕೊರೊನಾ ವೈರಸ್​ ದಾಳಿಗೆ ನವದೆಹಲಿ ತತ್ತರಿಸಿ ಹೋಗಿದ್ದು, ಪ್ರತಿದಿನ ಸಾವಿರಾರು ಕೇಸ್​ ಪತ್ತೆಯಾಗುತ್ತಿವೆ. ಇದೀಗ ಲಭ್ಯವಾಗಿರುವ ಮಾಹಿತಿ ಪ್ರಕಾರ ಪ್ರತಿ 20 ನಿಮಿಷಕ್ಕೆ ಒಬ್ಬ ಪೊಲೀಸ್​ಗೆ ಸೋಂಕು ದೃಢಪಡುತ್ತಿದೆ.

ನವದೆಹಲಿ:ದೇಶದಲ್ಲಿ ಎರಡನೇ ಹಂತದ ಕೋವಿಡ್ ಅಲೆ ಜೋರಾಗಿದ್ದು, ದಿನದಿಂದ ದಿನಕ್ಕೆ ಏರುಗತಿಯುಲ್ಲಿ ತನ್ನ ಅಬ್ಬರ ಮುಂದುವರಿಸಿದೆ. ಇದರ ಮಧ್ಯೆ ದೆಹಲಿಯಲ್ಲಿ ಕೊರೊನಾ ಪರಿಸ್ಥಿತಿ ಕೈ ಮೀರಿ ಹೋಗಿದೆ.

ಲಭ್ಯವಾಗಿರುವ ಮಾಹಿತಿ ಪ್ರಕಾರ ದೆಹಲಿಯಲ್ಲಿ ಇಲ್ಲಿಯವರೆಗೆ 4,200 ಪೊಲೀಸರಿಗೆ ಕೊರೊನಾ ಸೋಂಕು ದೃಢಪಟ್ಟಿದ್ದು, ಪ್ರತಿ 20 ನಿಮಿಷಕ್ಕೆ ಒಬ್ಬನಿಗೆ ಮಹಾಮಾರಿ ಹರಡುತ್ತಿದೆ. ಕಳೆದ ಎರಡು ತಿಂಗಳಲ್ಲಿ ಸೋಂಕಿನಿಂದಲೇ 25 ಪೊಲೀಸರು ತಮ್ಮ ಪ್ರಾಣ ಕಳೆದುಕೊಂಡಿದ್ದಾರೆ.

ಮಾರ್ಚ್​​ 2020ರಿಂದ ಇಲ್ಲಿಯವರೆಗೆ ದೆಹಲಿಯಲ್ಲಿ 59 ಪೊಲೀಸರು ಮಹಾಮಾರಿ ಕೊರೊನಾ ಸೋಂಕಿಗೆ ಬಲಿಯಾಗಿದ್ದಾರೆ. ಲೆಫ್ಟಿನೆಂಟ್​ ಗವರ್ನರ್​ ನಿವಾಸ, ಮುಖ್ಯಮಂತ್ರಿ ಹಾಗೂ ವಿವಿಐಪಿ ಭದ್ರತಾ ಘಟಕದಲ್ಲಿನ 145 ಪೊಲೀಸರು ಸೋಂಕಿಗೊಳಗಾಗಿದ್ದಾರೆ.

ಪ್ರಧಾನ ಮಂತ್ರಿ ಭದ್ರತಾ ವಿಭಾಗದಲ್ಲಿ ನೇಮಕಗೊಂಡ ಪೊಲೀಸರಲ್ಲಿಯೂ ಕೋವಿಡ್ ಕಾಣಿಸಿಕೊಂಡಿದ್ದು, 65 ಮಂದಿ ಸೋಂಕಿಗೊಳಗಾಗಿದ್ದಾರೆ.

ಪೊಲೀಸ್ ತರಬೇತಿ ಶಾಲೆ, ಅಪರಾಧ ಶಾಖೆ, ರಾಷ್ಟ್ರಪತಿ ಭವನದಲ್ಲೂ ಕೊರೊನಾ ಪ್ರಕರಣ ಕಾಣಿಸಿಕೊಂಡಿವೆ. ಇತ್ತೀಚೆಗೆ ವಿಶೇಷ ಆಯುಕ್ತರು, ಮೂರು ಜಂಟಿ ಆಯುಕ್ತರು ಮತ್ತು ಆರು ಜಿಲ್ಲಾ ಡಿಸಿಪಿಗಳು ಸಹ ವೈರಸ್​​ಗೊಳಗಾಗಿದ್ದರು. ದೆಹಲಿ ಪೊಲೀಸ್ ಪ್ರಧಾನ ಕಚೇರಿಯಲ್ಲಿ ಕೆಲಸ ಮಾಡುವ 100ಕ್ಕೂ ಹೆಚ್ಚು ಪೊಲೀಸರಿಗೆ ಈ ಹಿಂದೆ ಸೋಂಕು ತಗುಲಿತ್ತು. ದೆಹಲಿಯಲ್ಲಿಂದು 20,960 ಹೊಸ ಕೊರೊನಾ ಪ್ರಕರಣ ಕಾಣಿಸಿಕೊಂಡಿದ್ದು, 311 ಜನರು ಸಾವನ್ನಪ್ಪಿದ್ದಾರೆ.