ಭಾರತಕ್ಕೂ ಲಗ್ಗೆ ಹಾಕಿದ ಓಮಿಕ್ರಾನ್​ BA.4.. ಹೈದರಾಬಾದ್​​ನಲ್ಲಿ ಮೊದಲ ಕೇಸ್ ಪತ್ತೆ

ಓಮಿಕ್ರಾನ್​ ರೂಪಾಂತರ ತಳಿ BA. 4 ಇದೀಗ ಭಾರತದಲ್ಲೂ ಕಂಡು ಬಂದಿದ್ದು, ಹೈದರಾಬಾದ್​ಲ್ಲಿ ಮೊದಲ ಕೇಸ್ ಪತ್ತೆಯಾಗಿದೆ.

ಹೈದರಾಬಾದ್​(ತೆಲಂಗಾಣ):ಕೋವಿಡ್ ಮಹಾಮಾರಿ ಹಾವಳಿ ದೇಶದಲ್ಲಿ ತಗ್ಗಿದ್ದು, ಇದರ ಮಧ್ಯೆ ಕೊರೊನಾ​ ವೈರಸ್​​ನ ಮತ್ತೊಂದು ಹೊಸ ರೂಪಾಂತರಿ ಭಾರತಕ್ಕೆ ಲಗ್ಗೆ ಹಾಕಿದೆ. ಓಮಿಕ್ರಾನ್​ ಉಪ ತಳಿ BA.4 ಮೊದಲ ಪ್ರಕರಣ ಹೈದರಾಬಾದ್​​ನಲ್ಲಿ ಪತ್ತೆಯಾಗಿದೆ. ದಕ್ಷಿಣ ಆಫ್ರಿಕಾ ಸೇರಿದಂತೆ ಇತರ ದೇಶಗಳಲ್ಲಿ ಕೋವಿಡ್ ಪ್ರಕರಣ ಈಗಾಗಲೇ ಕಂಡು ಬಂದಿದ್ದು, ಇದೀಗ ಭಾರತಕ್ಕೂ ಲಗ್ಗೆ ಹಾಕಿದೆ.

ರೂಪಾಂತರದ ಮೊದಲ ಪ್ರಕರಣ ಮೇ. 9ರಂದು ಹೈದರಾಬಾದ್​​ನಲ್ಲಿ ದಾಖಲಾಗಿದ್ದು, ಇದಕ್ಕೆ ಸಂಬಂಧಿಸಿದಂತೆ ಭಾರತೀಯ SARS Cov - 2 ಕನ್ಸೋರ್ಟಿಯಂ ಆನ್ ಜೀನೋಮಿಕ್ಸ್ (INSACOG) ಗುರುವಾರ ಬಹಿರಂಗಪಡಿಸಿದೆ. ದಕ್ಷಿಣ ಆಫ್ರಿಕಾದಿಂದ ಬಂದಿದ್ದ ವೈದ್ಯರಿಗೆ ಓಮಿಕ್ರಾನ್ BA.4 ಸೋಂಕು ಇರುವುದು ಪತ್ತೆಯಾಗಿದೆ.

ಮೆಡಿಕಲ್​ ರಿಸರ್ಚ್​ ಕೌನ್ಸಿಲ್ ಆಫ್ ಇಂಡಿಯಾದ ವಿಜ್ಞಾನಿಯೊಬ್ಬರು ದಕ್ಷಿಣ ಆಫ್ರಿಕಾದಿಂದ ಹೈದರಾಬಾದ್​ಗೆ ವಾಪಸ್​ ಆಗಿದ್ದು, ಇವರಲ್ಲಿ ಈ ಸೋಂಕು ಕಾಣಿಸಿಕೊಂಡಿದೆ. ದಕ್ಷಿಣ ಆಫ್ರಿಕಾದಲ್ಲಿ ಕೋವಿಡ್​ ಹಬ್ಬಲು ಕಾರಣವಾಗಿರುವ ಓಮಿಕ್ರಾನ್ ಉಪ ತಳಿಗಳ ಪೈಕಿ BA.4 ಕೂಡ ಒಂದಾಗಿದೆ. ಭಾರತದಲ್ಲಿ ಕೋವಿಡ್​ ಲಸಿಕೆ ಹೆಚ್ಚಿನ ಸಂಖ್ಯೆಯಲ್ಲಿ ಹಾಕಿರುವ ಕಾರಣ ಈ ರೂಪಾಂತರಿ ಹರಡುವ ಸಾಧ್ಯತೆ ತೀರಾ ಕಡಿಮೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.