ನಾಳೆ 'ಆಜಾದಿ ಕಾ ಅಮೃತ್​ ಮಹೋತ್ಸವ್': ಎಲ್ಲೆಲ್ಲಿ ಕಂಗೊಳಿಸಲಿವೆ ತ್ರಿವರ್ಣ ಧ್ವಜದ ಬಣ್ಣಗಳು?

ನಾಳೆ ದೇಶಕ್ಕೆ 75ನೇ ವರ್ಷದ ಸ್ವಾತಂತ್ರ್ಯ ಸಂಭ್ರಮ. ಈ ಹಿನ್ನೆಲೆಯಲ್ಲಿ ಕೆನಡಾದ ನಯಾಗರ ಜಲಪಾತ ಸೇರಿದಂತೆ ವಿಶ್ವದ ಹಲವಾರು ಕಟ್ಟಡಗಳು ಭಾರತೀಯ ಧ್ವಜದ ಬಣ್ಣದಲ್ಲಿ ಮಿಂದೇಳಲಿವೆ.

ನವದೆಹಲಿ:ಭಾರತ 75ನೇ ಸ್ವಾತಂತ್ರ್ಯದ ಸಂಭ್ರಮದಲ್ಲಿದ್ದು, ಎಲ್ಲಾ ತಯಾರಿಗಳನ್ನು ನಡೆಸಿಕೊಂಡಿದೆ. ಈ ಹಿನ್ನೆಲೆಯಲ್ಲಿ ವಿಶ್ವದ ಅನೇಕ ರಾಷ್ಟ್ರಗಳ ಪ್ರವಾಸಿ ಸ್ಥಳಗಳು ಮತ್ತು ಕಟ್ಟಡಗಳನ್ನು ಭಾರತದ ತ್ರಿವರ್ಣ ಧ್ವಜದ ಬಣ್ಣಗಳಿಂದ ಕಂಗೊಳಿಸುವಂತೆ ಮಾಡಲಾಗುತ್ತದೆ.

'ಆಜಾದಿ ಕಾ ಅಮೃತ್​ ಮಹೋತ್ಸವ' ಹೆಸರಿನಲ್ಲಿ ಸ್ವಾತಂತ್ರ್ಯ ದಿನವನ್ನು ಆಚರಣೆ ಮಾಡಲಾಗುತ್ತಿದ್ದು, ಅಮೆರಿಕ, ಇಂಗ್ಲೆಂಡ್, ದುಬೈ ಮುಂತಾದ ರಾಷ್ಟ್ರಗಳಲ್ಲಿ ಆಗಸ್ಟ್ ನಾಳೆ ಸಂಜೆಯಿಂದ ಆಗಸ್ಟ್ 16ರ ಬೆಳಗ್ಗೆವರೆಗೆ ಐತಿಹಾಸಿಕ ಕಟ್ಟಡಗಳು ಮತ್ತು ಪ್ರವಾಸಿ ಸ್ಥಳಗಳು ತ್ರಿವರ್ಣದಲ್ಲಿ ಮಿಂದೇಳಲಿವೆ.

ಕೆನಡಾದ ಪ್ರಸಿದ್ಧ ನಯಾಗರ ಜಲಪಾತದ ಅಲೆಗಳಲ್ಲೂ ತ್ರಿವರ್ಣ ಧ್ವಜ ಮೂಡಲಿದೆ. ಜಿನೀವಾದಲ್ಲಿರುವ ವಿಶ್ವಸಂಸ್ಥೆಯ ಪ್ರಧಾನ ಕಚೇರಿ, ಅಮೆರಿಕದ ಎಂಪೈರ್ ಸ್ಟೇಟ್ ಬಿಲ್ಡಿಂಗ್, ದುಬೈನ ಬುರ್ಜ್ ಖಲೀಫಾ, ರಷ್ಯಾದ ಎವಲ್ಯೂಷನ್ ಟವರ್​​, ಸೌದಿ ಅರೇಬಿಯಾದ ಅಬುಧಾಬಿಯಲ್ಲಿರುವ ಪ್ರಸಿದ್ಧ ADNOC ಗ್ರೂಪ್ ಟವರ್ ಮತ್ತು ಗ್ರೇಟ್ ಬ್ರಿಟನ್​​ನ ಬರ್ಮಿಂಗ್‌ಹ್ಯಾಮ್ ಗ್ರಂಥಾಲಯಗಳೂ ಭಾರತೀಯ ಧ್ವಜದ ಬಣ್ಣಗಳಿಂದ ಕಂಗೊಳಿಸಲಿವೆ.

ಕೇಂದ್ರ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಪ್ರಕಾರ, ಆಜಾದಿ ಕಿ ಅಮೃತ್ ಮಹೋತ್ಸವವು ಸಾರ್ವಜನಿಕ ಭಾಗವಹಿಸುವಿಕೆ ಇರಲಿದ್ದು, ಭಾರತದ ಸ್ವಾತಂತ್ರ್ಯದ ಇತಿಹಾಸದೊಂದಿಗೆ ಸಂಬಂಧ ಹೊಂದಿರುವ ಹೆಮ್ಮೆಯ ಕ್ಷಣಗಳನ್ನು ನೆನಪಿಸಿಕೊಳ್ಳುವುದು ಇದರ ಉದ್ದೇಶವಾಗಿದೆ.

ಆಜಾದಿ ಕಿ ಅಮೃತ್ ಮಹೋತ್ಸವದಲ್ಲಿ ವಿದೇಶಗಳಲ್ಲಿ ವಾಸಿಸುತ್ತಿರುವ ಭಾರತೀಯರು ಹೆಚ್ಚಿನ ಸಂಖ್ಯೆಯಲ್ಲಿ ಹೆಚ್ಚಿನ ಉತ್ಸಾಹದಿಂದ ಸೇರುತ್ತಿದ್ದಾರೆ. ಆಜಾದಿ ಕಾ ಅಮೃತ್​ ಮಹೋತ್ಸವವನ್ನು ಮಾರ್ಚ್ 12ರಂದು ಪ್ರಧಾನಿ ಮೋದಿ ಆರಂಭಿಸಿದ್ದರು.

ಇದನ್ನೂ ಓದಿ:ಗಮನಿಸಿ: ದೇಶಾದ್ಯಂತ ಏಕ - ಬಳಕೆಯ ಪ್ಲಾಸ್ಟಿಕ್ ವಸ್ತುಗಳ ಮೇಲೆ ನಿಷೇಧ ಹೇರಿದ ಕೇಂದ್ರ: ‘ಈ’ ದಿನದಿಂದಲೇ ಜಾರಿ..