ಬಿಹಾರದಲ್ಲಿ ಕೋವಿಡ್​​ ಸೋಂಕಿನ ಹೊಸ ತಳಿ ಬಿಎ.12 ಪತ್ತೆ

ಪಾಟ್ನಾದ ಇಂದಿರಾ ಗಾಂಧಿ ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆಯಲ್ಲಿ ಸುಮಾರು ಎರಡು ತಿಂಗಳಿಂದ ನಡೆಯುತ್ತಿರುವ ಒಮಿಕ್ರಾನ್​ ರೂಪಾಂತರದ 13 ಮಾದರಿಗಳ ಜೀನೋಮ್ ಪರೀಕ್ಷೆಯ ವೇಳೆ ಕೋವಿಡ್​​ನ ಹೊಸ ತಳಿ ಬಿಎ.12 ಸೋಂಕು ಪತ್ತೆಯಾಗಿದೆ.

ಪಾಟ್ನಾ (ಬಿಹಾರ): ಬಿಹಾರದಲ್ಲಿ ಕೋವಿಡ್​​ ಸೋಂಕಿನ ಹೊಸ ತಳಿ ಬಿಎ.12ರ ಪ್ರಕರಣ ಪತ್ತೆಯಾಗಿದ್ದು, ಇದು ಒಮಿಕ್ರಾನ್​​ಗಿಂತ 10 ಪಟ್ಟು ಹೆಚ್ಚು ವೇಗವಾಗಿ ಹರಡುವ ಸಾಂಕ್ರಾಮಿಕ ರೋಗವಾಗಿದೆ. ಪಾಟ್ನಾದ ಇಂದಿರಾ ಗಾಂಧಿ ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆಯಲ್ಲಿ ಸುಮಾರು ಎರಡು ತಿಂಗಳಿಂದ ನಡೆಯುತ್ತಿರುವ ಒಮಿಕ್ರಾನ್​ ರೂಪಾಂತರದ 13 ಮಾದರಿಗಳ ಜೀನೋಮ್ ಪರೀಕ್ಷೆಯ ವೇಳೆ ಈ ರೂಪಾಂತರಿ ಸೋಂಕು ಪತ್ತೆಯಾಗಿದೆ.

ಸಂಭವನೀಯ ಹೊಸ ರೂಪಾಂತರಗಳ ಮೇಲೆ ಪತ್ತೆ ಹಚ್ಚಲು ಜೀನೋಮ್ ಪರೀಕ್ಷೆಗಳನ್ನು ನಿರಂತರವಾಗಿ ನಡೆಸಲಾಗುತ್ತಿದೆ. ಎಕ್ಸ್​ಇ ರೂಪಾಂತರಿ ಸೋಂಕು ಮತ್ತು ಬಿಎ.12 ರೂಪಾಂತರಿ ಸೋಂಕಿನ ಪರಿಣಾಮದ ಬಗ್ಗೆ ಹೆಚ್ಚಿನ ಮಾಹಿತಿ ಲಭ್ಯವಿಲ್ಲ. ಆದರೆ, ಈಗಾಗಲೇ ಪ್ರಪಂಚದ ಅನೇಕ ಸ್ಥಳಗಳಲ್ಲಿ ಬಿಎ.12 ಪತ್ತೆಯಾಗಿದೆ. ಅಮೆರಿಕದಲ್ಲಿ ಈ ತಳಿ ಮೊದಲು ಕಾಣಿಸಿಕೊಂಡಿದ್ದು, ಇದು ಬಿಎ.1 ಮತ್ತು ಬಿಎ.2ಗಿಂತ ಬಿಎ.12 ತಳಿ ಸಂಪೂರ್ಣವಾಗಿ ಭಿನ್ನವಾಗಿದೆ ಎಂದು ಮೈಕ್ರೋಬಯಾಲಜಿ ವಿಭಾಗದ ಮುಖ್ಯಸ್ಥೆ ಡಾ.ನಮ್ರತಾ ಕುಮಾರಿ ಹೇಳಿದ್ದಾರೆ.

ಎ.1, ಬಿಎ.2 ಹಾಗೂ ಬಿಎ.12 ಸೋಂಕುಗಳು ಒಮಿಕ್ರಾನ್​ನ ಹೊಸ ತಳಿಗಳು ಆಗಿವೆ. ದೆಹಲಿಯಲ್ಲಿ ಬಿಎ.12ರ ಕೆಲ ಪ್ರಕರಣಗಳು ಪತ್ತೆಯಾಗಿದ್ದರೂ ಈವರೆಗೆ ಅದರ ಬಗ್ಗೆ ವಿವರವಾದ ಅಧ್ಯಯನ ನಡೆದಿಲ್ಲ. ಈ ಹೊಸ ರೂಪಾಂತರದ ಪರಿಣಾಮ ಹೆಚ್ಚಿರಬಹುದು ಎಂದು ಹೇಳಲಾಗುತ್ತಿದೆ. ಈ ಬಗ್ಗೆ ಅನಗತ್ಯ ಭಯಪಡುವ ಅಗತ್ಯವಿಲ್ಲ. ಆದರೂ, ಸಾರ್ವಜನಿಕರು ಮುನ್ನೆಚ್ಚರಿಕೆ ಕ್ರಮಗಳನ್ನು ಅನುಸರಿಸಬೇಕೆಂದು ಅವರು ತಿಳಿಸಿದ್ದಾರೆ.

ಇದನ್ನೂ ಓದಿ:ಗ್ರಾಹಕನಿಗೆ ಬಂತು 1,41,770 ರೂಪಾಯಿ ಬಿಲ್: ಏರ್​​ಟೆಲ್​​ಗೆ ಗ್ರಾಹಕ ನ್ಯಾಯಾಲಯದಿಂದ ದಂಡ!