400 ರೈಲ್ವೆ ನಿಲ್ದಾಣಗಳು ಮಣ್ಣಿನ ಕಪ್​​ನಲ್ಲಿ​​ ಟೀ ವಿತರಣೆ

ಈಗಾಗಲೇ ಸುಮಾರು 400 ರೈಲ್ವೆ ನಿಲ್ದಾಣಗಳಲ್ಲಿ ಮಣ್ಣಿನ ಕಪ್​ಗಳಲ್ಲಿ ಟೀ, ಕಾಫಿ ನೀಡಲಾಗುತ್ತಿದ್ದು, ದೇಶಾದ್ಯಂತ ಇದನ್ನು ಜಾರಿಗೆ ತರಲು ಪ್ರಯತ್ನಗಳು ನಡೆಯುತ್ತಿವೆ.

ನವದೆಹಲಿ: ಸುಮಾರು 400 ರೈಲ್ವೆ ನಿಲ್ದಾಣಗಳು 'ಕುಲ್ಹಾದ್' (ಮಣ್ಣಿನ ಕಪ್​​) ಗಳಲ್ಲಿ ಚಹಾ ವಿತರಿಸುತ್ತಿವೆ. ಭಾರತವನ್ನು ಪ್ಲಾಸ್ಟಿಕ್ ಮುಕ್ತವಾಗಿಸುವಲ್ಲಿ ರೈಲ್ವೆ ಇಲಾಖೆಯ ಕೊಡುಗೆಯಾಗಿ ದೇಶಾದ್ಯಂತ ಇದನ್ನು ಜಾರಿಗೆ ತರಲು ಪ್ರಯತ್ನಗಳು ನಡೆಯುತ್ತಿವೆ ಎಂದು ಕೇಂದ್ರ ರೈಲ್ವೆ ಸಚಿವ ಪಿಯೂಷ್ ಗೋಯಲ್ ಹೇಳಿದ್ದಾರೆ.

ರಾಜಸ್ಥಾನದ ಅಲ್ವಾರ್​ನಲ್ಲಿ ಹೊಸದಾಗಿ ಸ್ಥಾಪನೆಯಾದ ವಾಯುವ್ಯ ರೈಲ್ವೆಯ ಧಿಗವಾರ - ಬಂಡಿಕುಯಿ ವಿಭಾಗವನ್ನು ಉದ್ಘಾಟಿಸಿ ಮಾತನಾಡಿದ ಗೋಯಲ್, ಭಾರತೀಯ ರೈಲ್ವೆ ಹಂತ ಹಂತವಾಗಿ ವೇಗವಾಗಿ ಹಾಗೂ ಉತ್ತಮವಾಗಿ ಕಾರ್ಯ ನಿರ್ವಹಿಸುತ್ತಿದೆ. ರೈಲ್ವೆ ನಿಲ್ದಾಣಗಳಲ್ಲಿ ಹೀಗೆ ಮಣ್ಣಿನ ಕಪ್​ಗಳಲ್ಲಿ ಟೀ, ಕಾಫಿ ನೀಡುವುದರಿಂದ ಉದ್ಯೋಗವನ್ನೂ ಸೃಷ್ಟಿಸಿದಂತಾಗುತ್ತದೆ ಎಂದರು.

ರೈಲ್ವೆ ನಿಲ್ದಾಣ ಹಾಗೂ ಏರ್​ಪೋರ್ಟ್​ಗಳಲ್ಲಿ ಮಹತ್ವದ ಬದಲಾವಣೆ ತರಲು ಕೇಂದ್ರ ಸರ್ಕಾರ ಉದ್ದೇಶಿಸಿತ್ತು. ಇದರಂತೆ ಪಿಯೂಷ್ ಗೋಯಲ್​ ದೇಶದ 100 ರೈಲ್ವೆ ನಿಲ್ದಾಣಗಳಲ್ಲಿ ಚಹಾ, ಕಾಫಿ ವಿತರಣೆಗೆ ಮಣ್ಣಿನ ಕಪ್​ ಕಡ್ಡಾಯಗೊಳಿಸಿದ್ದರು.