ಆಪ್​ನಿಂದ ಮರಳು ಮಾಫಿಯಾ.. ಸರ್ಕಾರದ ವಿರುದ್ಧ ನವಜೋತ್​ ಸಿಂಗ್​ ಸಿಧು ಗಂಭೀರ ಆರೋಪ

ಪಂಜಾಬ್​ ಆಪ್​ ಸರ್ಕಾರದ ವಿರುದ್ಧ ಏಕಾಂಗಿಯಾಗಿ ಹೋರಾಟ ಮಾಡುತ್ತಿರುವ ನವಜೋತ್​ ಸಿಂಗ್​ ಸಿಧು, ಸರ್ಕಾರ ಮರಳು ಮಾಫಿಯಾ ನಡೆಸುತ್ತಿದೆ ಎಂದು ಆರೋಪಿಸಿದ್ದಾರೆ..

ಅಮೃತಸರ(ಪಂಜಾಬ್​) :ಪಂಜಾಬ್​ನಲ್ಲಿ ಅಧಿಕಾರ ನಡೆಸುತ್ತಿರುವ ಆಪ್​ ಸರ್ಕಾರದ ವಿರುದ್ಧ ಮೊದಲ ದಿನದಿಂದಲೂ ಟೀಕೆ ಮಾಡುತ್ತಾ ಬಂದಿರುವ ಪಂಜಾಬ್​ ಕಾಂಗ್ರೆಸ್​ ಅಧ್ಯಕ್ಷ ನವಜೋತ್​ ಸಿಂಗ್​ ಸಿಧು, ಈಗ ಮರಳು ಮಾಫಿಯಾದ ವಿರುದ್ಧ ಸಿಡಿದೆದ್ದಿದ್ದಾರೆ. ಅಮೃತಸರದ ಜಹಜ್​ಗಢದಲ್ಲಿರುವ ಮರಳು ಕೇಂದ್ರಗಳ ಮೇಲೆ ಮುತ್ತಿಗೆ ಹಾಕಿದ ನವಜೋತ್​ ಸಿಂಗ್​ ನೇತೃತ್ವದ ಕಾಂಗ್ರೆಸ್​ ಕಾರ್ಯಕರ್ತರು, ಸರ್ಕಾರದ ವಿರುದ್ಧ ಕಿಡಿಕಾರಿದ್ದಾರೆ.

ಅಲ್ಲದೇ, ಸರ್ಕಾರವೇ ಮರಳು ಮಾಫಿಯಾದಲ್ಲಿ ಭಾಗಿಯಾಗಿದೆ. ಬಡವರ ಹೆಸರೇಳಿಕೊಂಡು ಅಧಿಕಾರಕ್ಕೆ ಬಂದ ಆಪ್​ ನಾಯಕರು ಈಗ ಬಡವರನ್ನೇ ಟಾರ್ಗೆಟ್​ ಮಾಡಿದೆ ಎಂದು ಆರೋಪಿಸಿದರು. ಆಪ್​ ನಾಯಕ, ದೆಹಲಿ ಸಿಎಂ ಅರವಿಂದ್​ ಕೇಜ್ರಿವಾಲ್ ಸುಳ್ಳು ಹೇಳುವುದರಲ್ಲಿ ಸುಖಬೀರ್ ಬಾದಲ್ ಅವರನ್ನೂ ಮೀರಿಸಿದ್ದಾರೆ ಎಂದು ನವಜೋತ್ ಸಿಂಗ್ ಸಿಧು ಟೀಕಿಸಿದರು.

ವಿವಿಧ ಯೋಜನೆಗಳ ಅಡಿಯಲ್ಲಿ ಪಂಜಾಬ್‌ಗೆ ಬರಬೇಕಿದ್ದ 20 ಸಾವಿರ ಕೋಟಿ ರೂಪಾಯಿ ಈವರೆಗೂ ಬಂದಿಲ್ಲ. ಆಪ್​ ಸರ್ಕಾರ ಅಸ್ತಿತ್ವಕ್ಕೆ ಬಂದಾಗಿನಿಂದ ಇಲ್ಲಿಯವರೆಗೆ 7 ಸಾವಿರ ಕೋಟಿ ಮಾತ್ರ ಯೋಜನೆಗಳಿಗೆ ವಿನಿಯೋಗಿಸಲಾಗಿದೆ. ಕಾಂಗ್ರೆಸ್​ ಸರ್ಕಾರದಲ್ಲಿ ಪ್ರತಿ ಕುಟುಂಬಕ್ಕೆ 600 ಯೂನಿಟ್ ಉಚಿತ ವಿದ್ಯುತ್ ನೀಡಲಾಗಿತ್ತು. ಆದರೆ, ಆಪ್​ ಸರ್ಕಾರ ಅದನ್ನು ಕೇವಲ 1 ಕಿಲೋವ್ಯಾಟ್ ಹೊಂದಿರುವವರಿಗೆ ಮಾತ್ರ ನೀಡುತ್ತಿದೆ ಎಂದು ವಿದ್ಯುತ್ ಸರಬರಾಜು ವಿರುದ್ಧ ವಾಗ್ದಾಳಿ ನಡೆಸಿದರು.

ಓದಿ:ಬಸವ ಜಯಂತಿಗೆ ಶುಭ ಕೋರಿ ಬಸವಣ್ಣನ ಬಗೆಗಿನ ಭಾಷಣದ ವಿಡಿಯೋ ಶೇರ್ ಮಾಡಿದ ಪ್ರಧಾನಿ