ಅಸ್ಸೋಂ ರೈಫಲ್ಸ್ ಭರ್ಜರಿ ಕಾರ್ಯಾಚರಣೆ: 167 ಕೋಟಿ ರೂ.ಗೂ ಅಧಿಕ ಮೌಲ್ಯದ ಡ್ರಗ್ಸ್ ವಶಕ್ಕೆ

ಮಣಿಪುರದ ಮೊರೆಹ್ ನಗರದಲ್ಲಿ ದಾಳಿ ನಡೆಸಿದ ಅಸ್ಸೋಂ ರೈಫಲ್ಸ್ ತಂಡ ​167 ಕೋಟಿ ರೂಪಾಯಿಗೂ ಹೆಚ್ಚು ಮೌಲ್ಯದ ಡ್ರಗ್ಸ್ ಮತ್ತು ನಿಷೇಧಿತ ವಸ್ತುಗಳನ್ನು ವಶಕ್ಕೆ ಪಡೆದಿದೆ.

ಇಂಫಾಲ(ಮಣಿಪುರ): ಮಣಿಪುರದ ಗಡಿ ಪಟ್ಟಣವಾದ ಮೊರೆಹ್​ನ ಭಾಗಗಳಲ್ಲಿ ಸ್ಥಳೀಯ ಪೊಲೀಸರೊಂದಿಗೆ ಯೋಜಿತ ದಾಳಿ ನಡೆಸಿದ ಅಸ್ಸೋಂ ರೈಫಲ್ಸ್ ತಂಡ ಕೋಟ್ಯಂತರ ರೂಪಾಯಿ ಮೌಲ್ಯದ ಡ್ರಗ್ಸ್ ವಶಪಡಿಸಿಕೊಂಡಿದೆ.

ಈ ದಾಳಿಯಲ್ಲಿ 167 ಕೋಟಿ ರೂಪಾಯಿಗೂ ಅಧಿಕ ಮೌಲ್ಯದ ಡ್ರಗ್ಸ್ ಮತ್ತು ನಿಷೇಧಿತ ವಸ್ತುಗಳನ್ನು ವಶಕ್ಕೆ ಪಡೆಯಲಾಗಿದೆ. ಒಂದು ವಿದೇಶಿ 7.65 ಎಂಎಂ ಪಿಸ್ತೂಲ್ ಮತ್ತು ಡಿಬಿಬಿಎಲ್ ಗನ್ ಜೊತೆಗೆ ಜೀವಂತ ಗುಂಡುಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಶೇಖರಣಾ ಮತ್ತು ವಿತರಣಾ ಕೇಂದ್ರಗಳಾಗಿ ಬಳಸಲಾಗುವ ಎರಡು ಸೇಫ್ ‌ಹೌಸ್‌ಗಳಲ್ಲಿದ್ದ ಇಬ್ಬರು ಮ್ಯಾನ್ಮಾರ್ ಮತ್ತು ನಾಲ್ವರು ಭಾರತೀಯ ಸ್ಮಗ್ಲರ್​ಗಳನ್ನು ಬಂಧಿಸಲಾಗಿದೆ.

ಅಂತಾರಾಷ್ಟ್ರೀಯ ಗಡಿಯ ಮೂಲಕ ಗಡಿಯಾಚೆಗಿನ ಕಳ್ಳಸಾಗಣೆಯನ್ನು ತಡೆಯುವ ಆದೇಶದೊಂದಿಗೆ ಈಶಾನ್ಯದಲ್ಲಿ ಡ್ರಗ್ಸ್​ ಭಯೋತ್ಪಾದನೆ ಮತ್ತು ಬಂಡಾಯವನ್ನು ಎದುರಿಸಲು ಅಸ್ಸೋಂ ರೈಫಲ್ಸ್ ಮುಂಚೂಣಿಯಲ್ಲಿದೆ.