ಕಡಿಮೆ ಅಂತರದ ಪ್ಯಾಸೆಂಜರ್ ರೈಲು ಪ್ರಯಾಣ ದರ ಹೆಚ್ಚಳ

ರೈಲ್ವೆ ಇಲಾಖೆಯಿಂದ ಪ್ಯಾಸೆಂಜರ್ ರೈಲುಗಳಲ್ಲಿ ಪ್ರಯಾಣ ಮಾಡುವ ಗ್ರಾಹಕರಿಗೆ ಶಾಕಿಂಗ್​ ನ್ಯೂಸ್ ಸಿಕ್ಕಿದ್ದು, ರೈಲ್ವೆ ಪ್ರಯಾಣ ದರದಲ್ಲಿ ಸ್ವಲ್ಪ ಮಟ್ಟದ ಏರಿಕೆ ಮಾಡಲಾಗಿದೆ.

ನವದೆಹಲಿ:ಕಡಿಮೆ ಅಂತರದ ಪ್ಯಾಸೆಂಜರ್​ ರೈಲುಗಳ ಪ್ರಯಾಣಕ್ಕೆ ಇದೀಗ ಹೆಚ್ಚಿನ ದರ ನಿಗದಿ ಮಾಡಿ ಕೇಂದ್ರ ರೈಲ್ವೆ ಇಲಾಖೆ ಮಹತ್ವದ ಆದೇಶ ಹೊರಹಾಕಿದೆ. ಮಧ್ಯರಾತ್ರಿಯಿಂದಲೇ ಈ ಪರಿಷ್ಕೃತ ದರ ಜಾರಿಗೊಳ್ಳಲಿದೆ.

ಕೊರೊನಾ ವೈರಸ್ ಹಾವಳಿ ಜೋರಾಗಿದ್ದ ಕಾರಣ ದೇಶದಲ್ಲಿ ವಿಶೇಷ ರೈಲು ಮಾತ್ರ ಓಡಿಸಲಾಗುತ್ತಿತ್ತು. ಇದೀಗ ಎಲ್ಲ ರೈಲುಗಳ ಪ್ರಯಾಣ ಆರಂಭಗೊಂಡಿದ್ದು, ಅಲ್ಪ ದೂರದ ಪ್ರಯಾಣಿಕರು ಹೆಚ್ಚಿನ ಹಣ ಸಂದಾಯ ಮಾಡಬೇಕಾಗುತ್ತದೆ.

ಉದಾಹರಣೆಗೆ ಅಮೃತಸರದಿಂದ ಪಠಾಣ್​ಕೋಟ್​ಗೆ ಇಷ್ಟುದಿನ 25 ರೂ. ಬೆಲೆ ನಿಗದಿಯಾಗಿತ್ತು. ಆದರೆ ಇದೀಗ 55 ರೂ ನೀಡಬೇಕಾಗುತ್ತದೆ. ಅಂತೆಯೇ ಜಲಂಧರ್​ ಸಿಟಿ ರೈಲ್ವೆ ನಿಲ್ದಾಣದಿಂದ ಫಿರೋಜ್​ಪುರ್ ನಡುವಿನ ಟಿಕೆಟ್ ಬೆಲೆ 30 ಇದ್ದಿದ್ದು, ಇದೀಗ 60 ರೂ ಆಗಿದೆ. ಸದ್ಯ ದೇಶದಲ್ಲಿ 1,250 ಮೇಲ್​ ಮತ್ತು ಎಕ್ಸ್​ಪ್ರೆಸ್ ರೈಲು, 5,350 ಉಪನಗರ ಸೇವೆ ಹಾಗೂ 326ಕ್ಕೂ ಹೆಚ್ಚು ಪ್ಯಾಸೆಂಜರ್​ ರೈಲು ಪ್ರತಿದಿನ ಸಂಚಾರ ನಡೆಸುತ್ತಿವೆ. ಇದೀಗ ಒಟ್ಟು ರೈಲುಗಳ ಶೇ 3ರಷ್ಟು ಮಾತ್ರ ಪ್ರಯಾಣ ದರ ಏರಿಕೆಯಾಗಿದೆ.