ಮುಂಬೈ (ಮಹಾರಾಷ್ಟ್ರ): ಟ್ರಾಕ್ ಆನ್ ಸರ್ವಿಸ್ ಮೂಲಕ ಗಿಪ್ಟ್ ಕೊರಿಯರ್ ಕಳುಹಿಸುವ ನೆಪದಲ್ಲಿ ಇನ್ಸ್ಟಾಗ್ರಾಂ ಸ್ನೇಹಿತನೊಬ್ಬ ಯುವತಿಗೆ ಒಂದು ಲಕ್ಷ ರೂ. ವಂಚಿಸಿರುವ ಘಟನೆ ಮುಂಬೈನಲ್ಲಿ ನಡೆದಿದೆ. ನಗರದ ದಹಿಸರ್ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಕೇವಲ ಒಂದು ಗಂಟೆಯಲ್ಲಿ ಸಂತ್ರಸ್ತೆಯ ಹಣವನ್ನು ಹಿಂದಿರುಗಿಸಿಕೊಟ್ಟಿದ್ದಾರೆ. ಡಿಜಿಟಲ್ ಬ್ಯಾಂಕಿಗ್ ಯುಗದಲ್ಲಿ ಸೈಬರ್ ಕ್ರೈಂ ಪ್ರಕರಣಗಳು ದಿನೇ ದಿನೇ ಹೆಚ್ಚಾಗುತ್ತಿವೆ.
ಇನ್ಸ್ಟಾಗ್ರಾಮ್ ಮೂಲಕ ಪರಿಚಯವಾದ ಸ್ನೇಹಿತ ಟ್ರಾಕ್ ಆನ್ ಸರ್ವಿಸ್ ಮೂಲಕ ಉಡುಗೊರೆಯನ್ನು ಕೊರಿಯರ್ ಕಳುಹಿಸಿದ್ಧೇನೆ ಎಂದು ಯುವತಿಗೆ ತಿಳಿಸಿದ್ದಾನೆ. ಪಾರ್ಸಲ್ ವಿಳಂಬವಾದ ಕಾರಣ ಕೊರಿಯರ್ ಬಗ್ಗೆ ಮಾಹಿತಿ ಪಡೆಯಲು ಸ್ನೇಹಿತನೇ ಸೇವಾ ಸಂಖ್ಯೆಯನ್ನು ನೀಡಿ ಯುವತಿಗೆ ಕರೆ ಮಾಡಲು ಹೇಳಿದ್ದಾನೆ.
ಯುವತಿಯು ಕರೆ ಮಾಡಿದ ನಂತರ ವಂಚಕ ಈ ಸಂಖ್ಯೆಗೆ 3 ರೂ ಕಳುಹಿಸಿದರೆ ಕೋರಿಯರ್ನ ವಿವರವನ್ನು ಹೇಳುವುದಾಗಿ ಬೇಡಿಕೆ ಇಟ್ಟಿದ್ದಾನೆ. ಕೇವಲ ಮೂರು ರೂ. ಕಳುಹಿಸಲು ಯುವತಿಯು ತನ್ನ ಬ್ಯಾಂಕಿನ ಖಾತೆಯ ಎಲ್ಲಾ ವಿವರಗಳನ್ನು ವಂಚಕನ ಬಳಿ ಹಂಚಿಕೊಂಡಿದ್ದಾರೆ. ನಂತರ ವಂಚಕ ಯುವತಿಯ ಮೊಬೈಲ್ನಲ್ಲಿ ಎನಿ ಡೆಸ್ಕ್ ಮತ್ತು ಸ್ಕ್ರೀನ್ ಶೇರ್ ಡೌನ್ಲೋಡ್ ಮಾಡಿ ಯುವತಿಯ ಖಾತೆಯಿಂದ 99,990ರೂ ಗಳನ್ನು ತನ್ನ ಖಾತೆಗೆ ವರ್ಗಾಯಿಸಿಕೊಂಡಿದ್ದಾನೆ. ತಾನು ಮೋಸ ಹೋಗಿದ್ದೇನೆ ಎಂದು ತಿಳಿದ ಯುವತಿಯು ತಕ್ಷಣವೇ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ಪ್ರಕರಣ ದಾಖಲಿಸಿಕೊಂಡ ಪೊಲೀಸ್ ಅಧಿಕಾರಿಗಳು ಸೈಬರ್ ಸೇಫ್ ಪೋರ್ಟಲ್ ಮೂಲಕ ಹೆಚ್ಡಿಎಫ್ಸಿ ಬ್ಯಾಂಕ್ ಮತ್ತು ಆರ್ಬಿಎಲ್ ಬ್ಯಾಂಕ್ನ ನೋಡಲ್ ಅಧಿಕಾರಿಗಳನ್ನು ಸಂಪರ್ಕಿಸಿ ಒಂದು ಗಂಟೆಯಲ್ಲಿ ಯುವತಿಯ ಹಣವನ್ನು ಹಿಂತಿರುಗಿಸಿಕೊಟ್ಟಿದ್ದಾರೆ.