Mehul Choksi ಒಡೆತನದ ಸಂಸ್ಥೆಗಳಿಂದ ಪಿಎನ್​ಬಿಗೆ 6 ಸಾವಿರ ಕೋಟಿ ರೂ. ವಂಚನೆ- ಸಿಬಿಐ

ವಜ್ರೋದ್ಯಮಿ ಮೆಹುಲ್ ಚೋಕ್ಸಿ ವಂಚನೆ ಪ್ರಕರಣದ ತನಿಖೆ ನಡೆಸಿದ ಸಿಬಿಐ(CBI), ಮುಂಬೈ ನ್ಯಾಯಾಲಯಕ್ಕೆ ಪೂರಕ ಚಾರ್ಜ್​ಶೀಟ್ ಸಲ್ಲಿಸಿದೆ. ಚೋಕ್ಸಿ ಪಿಎನ್​ಬಿಗೆ ಹೇಗೆ ವಂಚನೆ ಮಾಡಿದ ಎಂಬುವುದನ್ನು ಚಾರ್ಜ್‌ಶೀಟ್​ನಲ್ಲಿ ವಿವರವಾಗಿ ತಿಳಿಸಿದೆ.

ಮುಂಬೈ:ವಿದೇಶಕ್ಕೆ ಪರಾರಿಯಾಗಿ ಪ್ರಸ್ತುತ ಡೊಮಿನಿಕಾ ದೇಶದ ಜೈಲಿನಲ್ಲಿರುವ ವಜ್ರೋದ್ಯಮಿ ಮೆಹುಲ್ ಚೋಕ್ಸಿ ಸುಳ್ಳು ದಾಖಲೆಗಳನ್ನು ನೀಡಿ ಪಂಜಾಬ್ ನ್ಯಾಷನಲ್ ಬ್ಯಾಂಕ್ (PNB)ಗೆ 6,344.96 ಕೋಟಿ ರೂಪಾಯಿ ವಂಚಿಸಿದ್ದಾನೆ ಎಂದು ಕೇಂದ್ರ ತನಿಖಾ ದಳ (CBI) ತಿಳಿಸಿದೆ. ಚೋಕ್ಸಿ ವಂಚನೆ ಪ್ರಕರಣದ ಮೂರು ವರ್ಷಗಳ ಸುದೀರ್ಘ ತನಿಖೆಯ ಬಳಿಕ ಸಿಬಿಐ ತನ್ನ ಪೂರಕ ಚಾರ್ಜ್‌ಶೀಟ್‌ನಲ್ಲಿ ಈ ಬಗ್ಗೆ ಉಲ್ಲೇಖಿಸಿದೆ.

ಕಳೆದ ವಾರ ಮುಂಬೈನ ವಿಶೇಷ ನ್ಯಾಯಾಲಯಕ್ಕೆ ಸಲ್ಲಿಸಿದ ಪೂರಕ ಚಾರ್ಜ್‌ಶೀಟ್‌ನಲ್ಲಿ ಸಿಬಿಐ ಈ ಬಗ್ಗೆ ವಿವರವಾಗಿ ತಿಳಿಸಿದೆ. ಪಿಎನ್​ಬಿಯ ಉದ್ಯೋಗಿಗಳೇ ಚೋಕ್ಸಿ ಮತ್ತು ಆತನ ಕಂಪನಿ ಜೊತೆಗೂಡಿ ವಂಚನೆಗೆ ಸಹಕಾರ ಮಾಡಿಕೊಟ್ಟಿದ್ದಾರೆ ಎಂಬ ಆಘಾತಕಾರಿ ಸಂಗತಿಯೂ ಬೆಳಕಿಗೆ ಬಂದಿದೆ.

ಮುಂಬೈನ ಬ್ರಾಡಿ ಹೌಸ್ ಪಿಎನ್‌ಬಿ ಶಾಖೆಯ ಅಧಿಕಾರಿಗಳು ಮಾರ್ಚ್-ಏಪ್ರಿಲ್ 2017 ರ ಅವಧಿಯಲ್ಲಿ 165 ಜವಾಬ್ದಾರಿ ಪತ್ರ (Letter of Undertaking) ಮತ್ತು 58 ವಿದೇಶಿ ಸಾಲ ಪತ್ರ (FLC) ಬಿಡುಗಡೆ ಮಾಡಿದ್ದು, ಇದರ ವಿರುದ್ಧ 311 ಬಿಲ್‌ಗಳನ್ನು ರಿಯಾಯಿತಿಯಾಗಿ ನೀಡಿದ್ದಾರೆ.

ಈ ಎಲ್‌ಒಯು ಮತ್ತು ಎಫ್​​ಎಲ್​ಸಿಗಳನ್ನು ಯಾವುದೇ ಅನುಮೋದಿತ ಮಿತಿ ಅಥವಾ ನಗದು ಮಿತಿ ಇಲ್ಲದೆ ಮತ್ತು ಭದ್ರತೆ ಸಮಸ್ಯೆಯನ್ನು ತಪ್ಪಿಸಲು ಕೇಂದ್ರ ಬ್ಯಾಂಕ್​ನಲ್ಲಿ ನಮೂದು ಮಾಡದೆಯೇ ಚೋಕ್ಸಿಯ ಸಂಸ್ಥೆಗಳಿಗೆ ನೀಡಲಾಗಿದೆ ಎಂದು ಆರೋಪಿಸಲಾಗಿದೆ.

ಜವಾಬ್ದಾರಿ ಪತ್ರ ವಿದೇಶಿ ಬ್ಯಾಂಕ್​ಗಳಲ್ಲಿ ಸಾಲ ಪಡೆಯಲು ಓರ್ವ ವ್ಯಕ್ತಿಯ ಪರವಾಗಿ ದೇಶಿಯ ಬ್ಯಾಂಕ್ ನೀಡುವ ಪತ್ರವಾಗಿದೆ. ವಿದೇಶಿ ಬ್ಯಾಂಕ್​ಗಳಲ್ಲಿ ಸಾಲ ಪಡೆದ ವ್ಯಕ್ತಿ ಮರುಪಾವತಿಸದಿದ್ದರೆ, ಅದರ ಮರುಪಾವತಿ ಜವಾಬ್ದಾರಿ ಎಲ್​​ಒಯು ನೀಡಿದ ಬ್ಯಾಂಕ್ ವಹಿಸಿಕೊಳ್ಳಬೇಕಾಗುತ್ತದೆ.

ಪಿಎನ್​ಬಿ ಚೋಕ್ಸಿಗೆ ನೀಡಿದ ಎಲ್​ಒ ಆಧಾರದ ಮೇಲೆ ಎಸ್‌ಬಿಐ-ಮಾರಿಷಸ್, ಅಲಹಾಬಾದ್ ಬ್ಯಾಂಕ್-ಹಾಂಗ್ ಕಾಂಗ್, ಆಕ್ಸಿಸ್ ಬ್ಯಾಂಕ್-ಹಾಂಗ್ ಕಾಂಗ್, ಬ್ಯಾಂಕ್ ಆಫ್ ಇಂಡಿಯಾ-ಆಂಟ್ವೆರ್ಪ್, ಕೆನರಾ ಬ್ಯಾಂಕ್-ಮಾಮಾನಾ ಮತ್ತು ಎಸ್‌ಬಿಐ-ಫ್ರಾಂಕ್‌ಫರ್ಟ್ ಸಾಲ ನೀಡಿವೆ.

ಚೋಕ್ಸಿಯ ಕಂಪನಿಗಳು ಪಡೆದ ಸಾಲವನ್ನು ಮರುಪಾವತಿಸದ ಕಾರಣ ಎಲ್​ಒಯು ನೀಡಿದ ಪಂಜಾಬ್ ನ್ಯಾಷನಲ್​ ಬ್ಯಾಂಕ್ ಬಡ್ಡಿ ಸೇರಿದಂತೆ 6,344.97 ಕೋಟಿ ( 965.18 ಯುಎಸ್​ ಡಾಲರ್​) ಹಣವನ್ನು ಸಾಗರೋತ್ತರ ಬ್ಯಾಂಕ್​ಗಳಿಗೆ ಪಾವತಿಸಿದೆ ಎಂದು ಸಿಬಿಐ ಚಾರ್ಜ್‌ಶೀಟ್​ನಲ್ಲಿ ತಿಳಿಸಿದೆ.

ಇದನ್ನೂಓದಿ: ಮೆಹುಲ್​ ಚೋಕ್ಸಿಗೆ ಮಾನಸಿಕ ಒತ್ತಡ, ರಕ್ತದೊತ್ತಡ: ಕೋರ್ಟ್​ಗೆ ಗೈರು