ನವದೆಹಲಿ:ಪ್ರಧಾನಿ ನರೇಂದ್ರ ಮೋದಿ ನಡೆಸಿಕೊಡುವ ಮನ್ ಕೀ ಬಾತ್ನಿಂದ ಇಲ್ಲಿಯವರೆಗೆ 30.80 ಕೋಟಿ ರೂಪಾಯಿ ಆದಾಯ ಬಂದಿರುವುದಾಗಿ ರಾಜ್ಯಸಭೆಗೆ ಸಚಿವ ಅನುರಾಗ್ ಠಾಕೂರ್ ಮಾಹಿತಿ ನೀಡಿದ್ದಾರೆ.
2014ರಿಂದ ಪ್ರತಿ ತಿಂಗಳ ಕೊನೆಯ ಭಾನುವಾರ 'ಮನ್ ಕೀ ಬಾತ್' ರೇಡಿಯೋ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಭಾಗಿಯಾಗುತ್ತಿದ್ದು, ಈ ಕಾರ್ಯಕ್ರಮದಿಂದ 2017-18ರಲ್ಲಿ ಅತಿ ಹೆಚ್ಚು ಅಂದರೆ 10.64 ಕೋಟಿ ರೂ. ಆದಾಯ ಬಂದಿರುವುದಾಗಿ ತಿಳಿಸಿದ್ದಾರೆ. ಪ್ರಸಾರ ಭಾರತಿ ಇಲ್ಲಿಯವರೆಗೆ 78 ಎಪಿಸೋಡ್ ಪ್ರಸಾರ ಮಾಡಿರುವುದಾಗಿ ರಾಜ್ಯಸಭೆಯಲ್ಲಿ ಅನುರಾಗ್ ಠಾಕೂರ್ ಮಾಹಿತಿ ನೀಡಿದರು.
ಸಚಿವರು ತಿಳಿಸಿರುವ ಪ್ರಕಾರ, 2014-15ರಲ್ಲಿ 1.16 ಕೋಟಿ ರೂ. 2015-16ರಲ್ಲಿ 2.81ಕೋಟಿ, 2016-17ರಲ್ಲಿ 5.14 ಕೋಟಿ ರೂ. 2017-18ರಲ್ಲಿ 10.64 ಕೋಟಿ ರೂ. 2018-19ರಲ್ಲಿ 7.47 ಕೋಟಿ ರೂ. 2019-20ರಲ್ಲಿ 2.56 ಕೋಟಿ ರೂ ಹಾಗೂ 2020-21ರಲ್ಲಿ 1.02 ಕೋಟಿ ರೂ. ಬಂದಿದೆ ಎಂದು ಹೇಳಿದ್ದಾರೆ. 2018ರಿಂದ 2020ರ ಅವಧಿಯಲ್ಲಿ 14.35 ಕೋಟಿ ಜನರನ್ನ ತಲುಪಿರುವುದಾಗಿ ಅವರು ಇದೇ ವೇಳೆ ತಿಳಿಸಿದ್ದಾರೆ.
ಇದನ್ನೂ ಓದಿ: 45ಕ್ಕೂ ಹೆಚ್ಚು ದೇಶಗಳಿಂದ ಪೆಗಾಸಸ್ ಬಳಕೆ: ಭಾರತ ಮಾತ್ರ ಟಾರ್ಗೆಟ್ ಯಾಕೆ? ರವಿಶಂಕರ್ ಪ್ರಸಾದ್
ಪ್ರಧಾನಿ ಮೋದಿ ಮನ್ ಕೀ ಬಾತ್ನಲ್ಲಿ ಕೊರೊನಾ ವೈರಸ್, ವ್ಯಾಕ್ಸಿನೇಷನ್ ಸೇರಿದಂತೆ ಅನೇಕ ವಿಷಯಗಳ ಬಗ್ಗೆ ಚರ್ಚೆ ನಡೆಸುತ್ತಿದ್ದು, ದೇಶದ ಜನರಿಗೆ ಮಹತ್ವದ ಮಾಹಿತಿ ನೀಡುವ ಕೆಲಸ ಮಾಡ್ತಿದ್ದಾರೆ.
