ಮಣಿಪುರ ಸಂತ್ರಸ್ತರಿಗೆ ಪರಿಹಾರ; ತ್ರಿಸದಸ್ಯ ಜಡ್ಜ್​ಗಳ ಸಮಿತಿಯಿಂದ ಸುಪ್ರೀಂ ಕೋರ್ಟ್‌ಗೆ ವರದಿ

ಮಣಿಪುರದಲ್ಲಿ ಹಿಂಸಾಚಾರ ತುಸು ತಹಬದಿಗೆ ಬಂದಿದೆ. ಹಿಂಸಾಚಾರಕ್ಕೆ ತುತ್ತಾಗಿರುವ ಸಂತ್ರಸ್ತರಿಗೆ ನೀಡಲಾದ ಸೌಲಭ್ಯಗಳ ಮೇಲ್ವಿಚಾರಣೆಗೆ ರೂಪಿಸಲಾಗಿದ್ದ ತ್ರಿಸದಸ್ಯ ಜಡ್ಜ್​​ಗಳ ಸಮಿತಿಯು ಸುಪ್ರೀಂ ಕೋರ್ಟ್​ಗೆ ಸೋಮವಾರ ವರದಿ ಹಸ್ತಾಂತರಿಸಿದೆ.

ನವದೆಹಲಿ:ತೀವ್ರಜನಾಂಗೀಯ ಕಲಹಕ್ಕೆ ತುತ್ತಾಗಿರುವ ಮಣಿಪುರದಲ್ಲಿ ಸಂತ್ರಸ್ತರಿಗೆ ನೀಡಲಾಗಿರುವ ಪರಿಹಾರ ಕಾರ್ಯಗಳ ಮೇಲ್ವಿಚಾರಣೆಗೆ ರಚಿಸಲಾದ ಮೂವರು ಹೈಕೋರ್ಟ್​ ಮಾಜಿ ನ್ಯಾಯಮೂರ್ತಿಗಳ ನೇತೃತ್ವದ ಸಮಿತಿ ವರದಿ ಸಲ್ಲಿಸಿದೆ. ಪರಿಶೀಲನೆ ಬಳಿಕ ಈ ಕುರಿತ ಆದೇಶವನ್ನು ಆಗಸ್ಟ್​ 25 ರಂದು ನೀಡುವುದಾಗಿ ಸುಪ್ರೀಂ ಕೋರ್ಟ್​ ಇಂದು (ಸೋಮವಾರ) ತಿಳಿಸಿದೆ.

ಮೂವರು ಮಾಜಿ ಜಡ್ಜ್​​ಗಳ ಸಮಿತಿಯು ಪ್ರತ್ಯೇಕವಾಗಿ ಮೂರು ವರದಿಗಳನ್ನು ಸುಪ್ರೀಂ ಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ ಡಿ.ವೈ.ಚಂದ್ರಚೂಡ್ ಪೀಠಕ್ಕೆ ಸಲ್ಲಿಸಿದೆ. ಹಿಂಸಾಚಾರಪೀಡಿತ ಮಣಿಪುರದಲ್ಲಿ ಜನರಿಗೆ ನೀಡಲಾಗಿರುವ ಪುನರ್ವಸತಿ, ಪರಿಹಾರ ಮತ್ತು ಗಾಯಾಳುಗಳಿಗೆ ಚಿಕಿತ್ಸೆ ಕುರಿತು ಸಮಿತಿ ಪರಿಶೀಲನೆ ನಡೆಸಿದ ವರದಿ ಸಿದ್ಧಪಡಿಸಿದೆ.

ವರದಿ ಸ್ವೀಕರಿಸಿರುವ ಸುಪ್ರೀಂ, ಪರಿಹಾರ ಕಾರ್ಯಗಳ ಮೇಲ್ವಿಚಾರಣೆಗಾಗಿ ರಚಿಸಲಾದ ಸಮಿತಿಯ ಕಾರ್ಯನಿರ್ವಹಣೆಗೆ ಅನುಕೂಲವಾಗುವಂತೆ ಆದೇಶಗಳನ್ನು ಶುಕ್ರವಾರ ನೀಡಲಾಗುವುದು. ಆಡಳಿತಾತ್ಮಕ ನೆರವು, ಅಗತ್ಯವಿರುವ ಹಣಕಾಸಿನ ವೆಚ್ಚ ಸೇರಿದಂತೆ ಅದರ ಕಾರ್ಯವಿಧಾನದ ಮೇಲೆ ನಿರ್ದೇಶನಗಳನ್ನು ನೀಡಬೇಕಾಗಿದೆ. ಸಮಿತಿಯು ಸಲ್ಲಿಸಿರುವ ಮೂರು ಪ್ರತ್ಯೇಕ ವರದಿಗಳನ್ನು ಪ್ರಕರಣದ ಹೊಣೆ ಹೊತ್ತಿರುವ ವಕೀಲರಿಗೆ ನೀಡಲಾಗುವುದು ಎಂದು ಹೇಳಿದೆ.

ವರದಿಯಲ್ಲೇನಿದೆ?:ತ್ರಿಸದಸ್ಯ ಜಡ್ಜ್​ಗಳು ಸಲ್ಲಿಸಿರುವ ವರದಿಯಲ್ಲಿ, ಮುಖ್ಯವಾಗಿ ಹಿಂಸಾಚಾರಕ್ಕೀಡಾದ ಸಂತ್ರಸ್ತರು ತಮ್ಮ ಅಗತ್ಯ ದಾಖಲೆಗಳನ್ನು ಕಳೆದುಕೊಂಡಿದ್ದಾರೆ. ಅವುಗಳನ್ನು ಮರುಹಂಚಿಕೆ ಮಾಡಬೇಕಾಗಿದೆ. ಸಂತ್ರಸ್ತರಿಗೆ ನೀಡಲಾಗಿರುವ ಪರಿಹಾರ ಯೋಜನೆಯನ್ನು ಮತ್ತೆ ನವೀಕರಿಸಬೇಕು. ಅನಾಹುತಗಳ ಬಗ್ಗೆ ಅಧ್ಯಯನಕ್ಕಾಗಿ ಸ್ಥಳೀಯ ತಜ್ಞರ ಸಮಿತಿಯ ನೇಮಕಾತಿ ಮಾಡಬೇಕು ಎಂಬುದನ್ನು ಒತ್ತಿಹೇಳಿದೆ.

ಸಮಿತಿಯು ಸಂತ್ರಸ್ತರಿಗೆ ನೀಡಲಾದ ಪರಿಹಾರ, ಮಹಿಳೆಯರ ಮೇಲಿನ ದೌರ್ಜನ್ಯ, ಮಾನಸಿಕ ಆರೋಗ್ಯ ರಕ್ಷಣೆ, ವೈದ್ಯಕೀಯ ನೆರವು, ಪರಿಹಾರ ಶಿಬಿರಗಳು, ಅನಾಹುತ ದತ್ತಾಂಶಗಳು ಮತ್ತು ಅದರ ಮೇಲ್ವಿಚಾರಣೆ ಸೇರಿದಂತೆ ಮುಂತಾದ ವಿಭಾಗಗಳಲ್ಲಿ ವರದಿಯನ್ನು ಸಿದ್ಧಪಡಿಸಲಾಗಿದೆ.

ಸಮಿತಿಯಲ್ಲಿರುವ ಜಡ್ಜ್​ಗಳು:ಜಮ್ಮು ಮತ್ತು ಕಾಶ್ಮೀರ ಹೈಕೋರ್ಟ್‌ನ ಮಾಜಿ ಮುಖ್ಯ ನ್ಯಾಯಮೂರ್ತಿ ಗೀತಾ ಮಿತ್ತಲ್, ಬಾಂಬೆ ಹೈಕೋರ್ಟ್‌ನ ಮಾಜಿ ನ್ಯಾಯಾಧೀಶರಾದ ಜಸ್ಟಿಸ್ ಶಾಲಿನಿ ಫನ್ಸಾಲ್ಕರ್ ಜೋಶಿ ಮತ್ತು ದೆಹಲಿ ಹೈಕೋರ್ಟ್​ನ ಮಾಜಿ ನ್ಯಾಯಮೂರ್ತಿಗಳಾದ ಆಶಾ ಮೆನನ್ ಅವರು ತ್ರಿಸದಸ್ಯ ಸಮಿತಿಯಲ್ಲಿದ್ದಾರೆ. ಇದನ್ನು ಸುಪ್ರೀಂ ಕೋರ್ಟ್ ರಚಿಸಿತ್ತು. ಹಿಂಸಾಚಾರದಲ್ಲಿ ಸಿಲುಕಿದ ಜನರಿಗೆ ನೀಡಲಾದ ಪರಿಹಾರ, ಪುನರ್ವಸತಿ, ಮನೆಗಳು ಮತ್ತು ಪೂಜಾ ಸ್ಥಳಗಳ ಮರುಸ್ಥಾಪನೆ ಸೇರಿದಂತೆ ಮಾನವೀಯ ಅಂಶಗಳನ್ನು ಪರಿಶೀಲಿಸಲು ಮೂರು ಸದಸ್ಯರ ಸಮಿತಿಗೆ ಜವಾಬ್ದಾರಿ ನೀಡಲಾಗಿತ್ತು.

ಮೇ 3 ರಂದು ಮಣಿಪುರದ ಆಲ್ ಟ್ರೈಬಲ್ ಸ್ಟೂಡೆಂಟ್ಸ್ ಯೂನಿಯನ್ (ATSUM) ನೇತೃತ್ವದಲ್ಲಿ ಮೈತೇಯಿಗಳಿಗೆ ಎಸ್​ಟಿ ಸ್ಥಾನಮಾನ ನೀಡಬೇಕು ಎಂದು ಒತ್ತಾಯಿಸಿ ನಡೆಸಿದ ಪ್ರತಿಭಟನಾ ರ್ಯಾಲಿಯ ಬಳಿಕ ರಾಜ್ಯದಲ್ಲಿ ಹಿಂಸಾಚಾರ ಭುಗಿಲೆದ್ದಿತು. ಮೈತೇಯಿ ಮತ್ತು ಕುಕಿ ಬುಡಕಟ್ಟು ಜನಾಂಗಗಳ ನಡುವಿನ ಹಿಂಸಾಚಾರ ರಾಕ್ಷಸೀ ಘಟನೆಗಳಿಗೆ ಸಾಕ್ಷಿಯಾಗಿವೆ. ಮೂರು ತಿಂಗಳಿನಿಂದ ಇಡೀ ರಾಜ್ಯದಲ್ಲಿ ಹಿಂಸಾಚಾರ ನಡೆಯುತ್ತಿದ್ದು, ಪರಿಸ್ಥಿತಿಯನ್ನು ಹತೋಟಿಗೆ ತರಲು ಕೇಂದ್ರ ಸರ್ಕಾರ ಅರೆಸೇನಾ ಪಡೆಗಳನ್ನು ನಿಯೋಜಿಸಿದೆ.

ಇದನ್ನೂ ಓದಿ:Manipur: ದಾಳಿಕೋರರು ಲೂಟಿ ಮಾಡಿದ 8 ಅತ್ಯಾಧುನಿಕ ಬಂದೂಕು, 112 ಸ್ಫೋಟಕ ವಶ, ಶಾಂತಿಯತ್ತ ಹಿಂಸಾಪೀಡಿತ ಮಣಿಪುರ