ಮೆಟ್ರೋ ಪ್ಲಾಟ್​ ಫಾರ್ಮ್​ ಮೇಲೆ ವ್ಯಕ್ತಿ ಮೂತ್ರ ವಿಸರ್ಜನೆ: ವಿಲಕ್ಷಣ ವಿಡಿಯೋ!

ಜನರ ಓಡಾಟಕ್ಕೆ ಅನುಕೂಲವಾಗಿಲಿ ಎಂದು ಮೆಟ್ರೋ ರೈಲುಗಳನ್ನು ಆರಂಭಿಸಿದ್ದರೆ, ಇಲ್ಲೊಬ್ಬ ವ್ಯಕ್ತಿ ಆ ಪ್ಲಾಟ್​​ ಫಾರ್ಮ್​ನ ರೈಲಿನ ಹಳಿಗಳ ಮೇಲೇ ಮೂತ್ರ ವಿಸರ್ಜನೆ ಮಾಡಿದ ವಿಲಕ್ಷಣ ಘಟನೆ ದೆಹಲಿಯಲ್ಲಿ ನಡೆದಿದೆ.

ನವದೆಹಲಿ:ಸಾರ್ವಜನಿಕ ಆಸ್ತಿಗಳನ್ನು ಸ್ವಚ್ಛವಾಗಿಟ್ಟುಕೊಳ್ಳಬೇಕು ಎಂದು ಎಷ್ಟೇ ಅರಿವು ಮೂಡಿಸಿದರೂ ಕೆಲ ಬುದ್ಧಿಗೇಡಿಗಳು ಮಾತ್ರ ಇದಕ್ಕೆ ಸೊಪ್ಪು ಹಾಕುವುದಿಲ್ಲ. ಕಂಠಪೂರ್ತಿ ಕುಡಿದಿದ್ದ ವ್ಯಕ್ತಿಯೊಬ್ಬ ದೆಹಲಿ ಮೆಟ್ರೋ ನಿಲ್ದಾಣದ ಪ್ಲಾಟ್​ ಫಾರ್ಮ್​ನ ಹಳಿಗಳ ಮೇಲೆ ಜನರು ಇರುವಾಗಲೇ ಮೂತ್ರ ವಿಸರ್ಜನೆ ಮಾಡಿದ ಅಸಹ್ಯಕರ ಘಟನೆ ಬೆಳಕಿಗೆ ಬಂದಿದೆ. ಇದನ್ನು ಮತ್ತೊಬ್ಬರು ವಿಡಿಯೋ ಮಾಡಿದ್ದು, ವೈರಲ್​ ಆಗಿದೆ.

ವಿಡಿಯೋದಲ್ಲಿ ಕಾಣುವಂತೆ ಅಮಲಿನಲ್ಲಿದ್ದ ವ್ಯಕ್ತಿ ಮೆಟ್ರೋ ನಿಲ್ದಾಣವೊಂದರಲ್ಲಿ ಹಾಕಲಾದ ಹಳದಿ ಗೆರೆಯನ್ನು ದಾಟಿ ಹಳಿಗಳ ಮೇಲೆ ಮೂತ್ರವಿಸರ್ಜನೆ ಮಾಡುತ್ತಿದ್ದು, ಮತ್ತೊಬ್ಬರು ವಿಡಿಯೋ ಮಾಡುತ್ತಾ ಇದನ್ನು ಪ್ರಶ್ನಿಸಿದ್ದಾರೆ. ಆಗ ಆತ "ಕುಡಿದಿದ್ದು ಹೆಚ್ಚಾಗಿದೆ, ಮುಗಿಯಿತು" ಎನ್ನುತ್ತಾ ತನ್ನ ಮಹತ್ಕಾರ್ಯವನ್ನು ಮುಂದುವರಿಸಿದ್ದಾನೆ.

ಈ ಘಟನೆ ಅಕ್ಟೋಬರ್​ 29 ರಂದು ನಡೆದಿದೆ ಎನ್ನಲಾಗಿದ್ದು, ಸಂಜೀವ್​ ಬಬ್ಬರ್​ ಎಂಬುವವರು ತಮ್ಮ ಟ್ವಿಟರ್​ನಲ್ಲಿ ಈ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. "ಇದನ್ನು ನಾನು ಈಗಷ್ಟೇ ವಾಟ್ಸ್​ಆ್ಯಪ್​ ಮೂಲಕ ಪಡೆದಿದ್ದು, ಇದನ್ನು ನಿಮ್ಮೊಂದಿಗೆ ಹಂಚಿಕೊಂಡಿದ್ದೇನೆ" ಎಂದು ಬರೆದುಕೊಂಡಿದ್ದಾರೆ.

ಪ್ರತಿಕ್ರಿಯಿಸಿದ ದೆಹಲಿ ಮೆಟ್ರೋ:ಕುಡುಕನ ಅಸಹ್ಯಕರ ವಿಡಿಯೋವನ್ನು ದೆಹಲಿ ಮೆಟ್ರೋ ರೈಲು ಕಾರ್ಪೊರೇಷನ್ ಮತ್ತು ಮುಖ್ಯಮಂತ್ರಿ ಕಚೇರಿಗೆ ಟ್ಯಾಗ್ ಮಾಡಲಾಗಿತ್ತು. ಇದನ್ನು ಗಮಿನಿಸಿ ಪ್ರತಿಕ್ರಿಯಿಸಿರುವ ದೆಹಲಿ ಮೆಟ್ರೋ ಅಧಿಕಾರಿಗಳು, ಘಟನೆಯ ಸ್ಥಳದ ಬಗ್ಗೆ ಕೇಳಿದ್ದಾರೆ. ಇದಕ್ಕೆ ಬಬ್ಬರ್​ ಅವರು "ಮಾಳವೀಯ ನಗರ ಮೆಟ್ರೋ ನಿಲ್ದಾಣ" ಎಂದು ಉತ್ತರಿಸಿದ್ದಾರೆ.

ಘಟನೆಯನ್ನು ಬೆಳಕಿಗೆ ತಂದಿದ್ದಕ್ಕೆ ಸಂಜಯ್​ ಬಬ್ಬರ್​ ಅವರಿಗೆ ಧನ್ಯವಾದ ಸಲ್ಲಿಸಿರುವ ಅಧಿಕಾರಿಗಳು, ಇಂತಹ ಘಟನೆಗಳು ಕಂಡುಬಂದಲ್ಲಿ 24x7 ಸಹಾಯವಾಣಿಯಾದ 155370 ಅಥವಾ ಭದ್ರತಾ ಸಹಾಯವಾಣಿ ಸಂಖ್ಯೆ 155655 ಅನ್ನು ಸಂಪರ್ಕಿಸಿ ಎಂದು ಸಲಹೆ ನೀಡಿದ್ದಾರೆ.

ಓದಿ:ಮಹಿಳೆಗೆ ಗರ್ಭ ಧರಿಸುವ, ನಿರಾಕರಿಸುವ ಹಕ್ಕಿದೆ: 26 ವಾರಗಳ ಗರ್ಭಪಾತಕ್ಕೆ ಅನುಮತಿ ನೀಡಿದ ಹೈಕೋರ್ಟ್​