ಮಾತನಾಡಲು ನಿರಾಕರಿಸಿದ ಯುವತಿಗೆ ಸ್ಕ್ರೂಡ್ರೈವರ್​ನಿಂದ 51 ಬಾರಿ ಚುಚ್ಚಿ ಕೊಲೆ!

ಪರಿಚಯಸ್ಥ ಯುವತಿ ಮಾತನಾಡಲು ನಿರಾಕರಿಸಿದಳು ಎಂಬ ಒಂದೇ ಕಾರಣಕ್ಕೆ ಆಕೆಗೆ ಬಸ್‌ ಕಂಡಕ್ಟರ್​ ಓರ್ವ ಸ್ಕ್ರೂಡ್ರೈವರ್​ನಿಂದ 51 ಬಾರಿ ಚುಚ್ಚಿ ಕೊಲೆ ಮಾಡಿದ್ದಾನೆ. ಈ ಅಮಾನವೀಯ ಘಟನೆ ಛತ್ತೀಸ್​ಗಢದಲ್ಲಿ ನಡೆದಿದೆ.

ಕೊರ್ಬಾ (ಛತ್ತೀಸ್​ಗಢ): ಛತ್ತೀಸ್​ಗಢದಲ್ಲಿ ಬೆಚ್ಚಿಬೀಳಿಸುವ ಘಟನೆ ಬೆಳಕಿಗೆ ಬಂದಿದೆ. 20 ವರ್ಷದ ಯುವತಿಯನ್ನು ವ್ಯಕ್ತಿಯೋರ್ವ ಸ್ಕ್ರೂಡ್ರೈವರ್​ನಿಂದ 51 ಬಾರಿ ಚುಚ್ಚಿ ಬರ್ಬರವಾಗಿ ಕೊಲೆ ಮಾಡಿದ್ದಾನೆ. ಕೊರ್ಬಾ ಜಿಲ್ಲೆಯಲ್ಲಿ ನಡೆದ ಪ್ರಕರಣವಿದು!.

ಇಲ್ಲಿನ ಎಸ್​​ಇಸಿಎಲ್​ (ಸೌತ್ ಈಸ್ಟರ್ನ್ ಕೋಲ್ ಫೀಲ್ಡ್ಸ್ ಲಿಮಿಟೆಡ್) ಪಂಪ್​ ಹೌಸ್​ ಕಾಲೋನಿಯಲ್ಲಿ ಡಿ.24ರಂದು ಹತ್ಯೆ ನಡೆದಿದೆ. ಯುವತಿ ತನ್ನ ಮನೆಯಲ್ಲಿ ಒಬ್ಬಳೇ ಇದ್ದಾಗ ಆರೋಪಿ ಬಂದು ದಾಳಿ ಮಾಡಿದ್ದಾನೆ. ಮೊದಲಿಗೆ ತಲೆದಿ೦ಬಿನಿಂದ ಆಕೆ ಬಾಯಿ ಮುಚ್ಚಿ ನಂತರ ಸ್ಕ್ರೂಡ್ರೈವರ್​ನಿಂದ ಇರಿದಿದ್ದಾನೆ ಎಂದು ನಗರ ಪೊಲೀಸ್​ ವರಿಷ್ಠಾಧಿಕಾರಿ (ಸಿಎಸ್​ಪಿ) ವಿಶ್ವದೀಪಕ್​​ ತ್ರಿಪಾಠಿ ತಿಳಿಸಿದ್ದಾರೆ.

ಮಾತು ಬಿಟ್ಟಿದ್ದಕ್ಕೆ ಹತ್ಯೆ:ಆರೋಪಿಯು ಜಶ್​ಪುರ ಜಿಲ್ಲೆಯ ಮೂಲದವನಾಗಿದ್ದು, ಬಸ್​​ ಕಂಡಕ್ಟರ್​​ ಆಗಿ ಕೆಲಸ ಮಾಡುತ್ತಿದ್ದ. ವಿದ್ಯಾಭ್ಯಾಸ ಮಾಡುತ್ತಿದ್ದ ಯುವತಿ ಇದೇ ಬಸ್​ನಲ್ಲಿ ಪ್ರಯಾಣಿಸುತ್ತಿದ್ದಳು. ಇದರಿಂದಾಗಿ ಕಳೆದ ಮೂರು ವರ್ಷಗಳಿಂದ ಇಬ್ಬರ ನಡುವೆ ಸ್ನೇಹ ಇತ್ತು. ನಂತರ ತನ್ನ ಕೆಲಸ ನಿಮಿತ್ತ ಆರೋಪಿ ಗುಜರಾತ್​ನ ಅಹಮದಾಬಾದ್​ಗೆ ತೆರಳಿ ಅಲ್ಲೇ ನೆಲೆಸಿದ್ದ. ಆದರೂ, ಇಬ್ಬರೂ ನಿರಂತರವಾಗಿ ಫೋನ್​ನಲ್ಲಿ ಸಂಪರ್ಕದಲ್ಲಿದ್ದರು. ಆದರೆ, ಈ ನಡುವೆ ಆಕೆಯ ಆತನೊಂದಿಗೆ ಮಾತನಾಡುವುದನ್ನು ನಿಲ್ಲಿಸಿದ್ದಳು ಎಂದು ಪ್ರಾಥಮಿಕ ತನಿಖೆಯಲ್ಲಿ ಗೊತ್ತಾಗಿದೆ ಎಂದು ತ್ರಿಪಾಠಿ ಮಾಹಿತಿ ನೀಡಿದರು.

ಇದನ್ನೂ ಓದಿ:ಈ ವರ್ಷ ಮನೆಗಳ್ಳತನ, ದರೋಡೆ, ಅತ್ಯಾಚಾರ‌‌‌ ಪ್ರಕರಣಗಳು ಏರಿಕೆ: ಸರಗಳ್ಳತನ, ಡಕಾಯಿತಿ ಕೇಸ್​ಗಳ ಸಂಖ್ಯೆ ಇಳಿಮುಖ

ಯುವತಿ ಮಾತು ಬಿಟ್ಟಿರುವುದಕ್ಕೆ ಕೋಪಗೊಂಡ ಆರೋಪಿಯ ಈ ಮೊದಲು ಆಕೆಯ ಪೋಷಕರಿಗೂ ಬೆದರಿಕೆ ಹಾಕಿದ್ದ ಎಂದೂ ಗೊತ್ತಾಗಿದೆ. ಮನೆಗೆ ಬಂದು ಕೊಲೆಗೈದ ನಂತರ ಆರೋಪಿ ತಲೆ ಮರೆಸಿಕೊಂಡಿದ್ದಾನೆ. ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡಿದ್ದು, ಹಂತಕನ ಪತ್ತೆಗಾಗಿ ನಾಲ್ಕು ಪೊಲೀಸ್​ ತಂಡಗಳನ್ನು ರಚಿಸಲಾಗಿದೆ ಎಂದು ಅವರು ಹೇಳಿದರು.

ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಯುವತಿ: ಕೊಲೆಯಾದ ಯುವತಿಯು ತಂದೆ, ತಾಯಿ ಮತ್ತು ಸಹೋದರನೊಂದಿಗೆ ವಾಸವಾಗಿದ್ದಳು. ಆದರೆ, ಈ ಘಟನೆ ನಡೆದ ದಿನದಂದು ಮನೆಯಲ್ಲಿ ಯಾರೂ ಇರಲಿಲ್ಲ. ಬೆಳಗ್ಗೆ 11 ಗಂಟೆ ಸುಮಾರಿಗೆ ನಾನು ಮನೆಗೆ ಬಂದಾಗ ಬಾಗಿಲು ಒಳಗಡೆಯಿಂದ ಲಾಕ್​ ಆಗಿತ್ತು ಎಂದು ಕೊಲೆಯಾದ ಯುವತಿಯ ಸಹೋದರ ತಿಳಿಸಿದ್ದಾನೆ.

ತುಂಬಾ ಹೊತ್ತು ಬಾಗಿಲು ತಟ್ಟಿದರೂ ಕೂಡ ತೆರೆಯಲಿಲ್ಲ. ಆದ್ದರಿಂದ ಮನೆಯ ಹಿಂದಿನ ಬಾಗಿಲಿಗೆ ಹೋದಾಗ ಆ ಬಾಗಿಲು ತೆರೆದಿತ್ತು. ಅಲ್ಲಿಂದ ಮನೆಯೊಳಗೆ ನೋಡಿದಾಗ ಸಹೋದರಿ ಹಾಸಿಗೆ ಮೇಲೆ ಶವವಾಗಿ ರಕ್ತದ ಮಡುವಿನಲ್ಲಿ ಬಿದ್ದಿದ್ದಳು. ಮುಖದ ಮೇಲೆ ತಲೆದಿಂಬು ಸಹ ಬಿದ್ದಿತ್ತು. ಅಂತೆಯೇ, ಈ ಬಗ್ಗೆ ತಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡಲಾಯಿತು ಎಂದು ಆತ ಹೇಳಿದ್ದಾನೆ.