ಲೈಸೆನ್ಸ್​ ಬಂದೂಕು, ಒಡವೆ, ನಗದು ಸೇರಿದಂತೆ ಟಿಕ್ ಟಾಕ್​ ​ಸ್ಟಾರ್​ ಮನೆಯಲ್ಲಿ ಭಾರಿ ಕಳ್ಳತನ!

ಲೈಸೆನ್ಸ್​ ಬಂದೂಕು, ಒಡವೆ ಸೇರಿದಂತೆ ಬಿಜೆಪಿ ನಾಯಕಿಯೂ ಆಗಿರುವ ಟಿಕ್​ ಟಾಕ್​ ಸ್ಟಾರ್ ಆಗಿರುವ ಸೋನಾಲಿ ಫೋಗಾಟ್​​ ಮನೆಯಲ್ಲಿ ಭಾರಿ ಕಳ್ಳತನವಾಗಿದೆ.

ಹಿಸಾರ್:ಹರಿಯಾಣ ಮೂಲದ ಬಿಜೆಪಿ ಮುಖಂಡೆ ಮತ್ತು ಟಿಕ್​ಟಾಕ್​ ತಾರೆ ಸೋನಾಲಿ ಫೋಗಾಟ್ ಮನೆಯಲ್ಲಿ ಭಾರಿ ಕಳ್ಳತನವಾಗಿದೆ.

ಚಿನ್ನಾಭರಣ, ಲೈಸೆನ್ಸ್​ ರಿವಾಲ್ವರ್, 10 ಲಕ್ಷ ರೂ. ನಗದು ಮತ್ತು ಇತರ ಬೆಲೆಬಾಳುವ ವಸ್ತುಗಳನ್ನು ಖದೀಮರು ಕದ್ದು ಪರಾರಿಯಾಗಿದ್ದಾರೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಈ ತಿಂಗಳ 9 ರಂದು ಮನೆಗೆ ಬೀಗ ಹಾಕಿ ಚಂಡೀಗಢ್​ಗೆ ಹೋಗಿದ್ದೆ. ಫೆಬ್ರವರಿ 15 ರಂದು ಹಿಸಾರ್​ನಲ್ಲಿರುವ ತಮ್ಮ ನಿವಾಸಕ್ಕೆ ಮರಳಿದ್ದಾಗ ಮನೆಯ ಬೀಗಗಳು ಮುರಿದುಹೋಗಿದ್ದವು. ಮನೆಯೊಳಗೆ ನೋಡಿದಾಗ ಸುಮಾರು 10 ಲಕ್ಷ ನಗದು, ಬಂಗಾರ, ಗನ್​ ಸೇರಿದಂತೆ ಬೆಲೆಬಾಳುವ ವಸ್ತುಗಳ ಕಳ್ಳತವಾಗಿದೆ ಎಂದು ಮಾಜಿ ಬಿಗ್​ಬಾಸ್​ ಸ್ಪರ್ಧಿಯೂ ಆಗಿರುವ ಸೋನಾಲಿ ಫೋಗಾಟ್​ ಪೊಲೀಸರಿಗೆ ದೂರು ನೀಡಿದ್ದಾರೆ.

ಸೋನಾಲಿ ಮನೆ ಸುತ್ತಮುತ್ತ ಸಿಸಿಟಿವಿ ಕ್ಯಾಮರಾಗಳನ್ನು ಅಳವಡಿಸಲಾಗಿದೆ. ಆದ್ರೆ ಖತರ್ನಾಕ್​ ಕಳ್ಳರು ಡಿಜಿಟಲ್ ವಿಡಿಯೋ ರೆಕಾರ್ಡರ್ (ಡಿವಿಆರ್)ನ್ನು ಸಹ ಕದ್ದೊಯ್ದಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಕಳ್ಳತನದ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಎಚ್‌ಟಿಎಂ ಪೊಲೀಸ್​ ಠಾಣೆಯ ಅಧಿಕಾರಿ ಸುಖ್ಜಿತ್ ಹೇಳಿದ್ದಾರೆ.

2019 ರಲ್ಲಿ ಹರಿಯಾಣ ವಿಧಾನಸಭಾ ಚುನಾವಣೆಯಲ್ಲಿ ಆದಂಪೂರ್‌ನಿಂದ ಬಿಜೆಪಿ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದ ಸೋನಾಲಿ ಫೋಗಾಟ್​ ಕಾಂಗ್ರೆಸ್ ಅಭ್ಯರ್ಥಿ ಎದುರು ಪರಾಜಯಗೊಂಡಿದ್ದರು.