ಉಗ್ರ ಹಫೀಜ್​ ಸಯೀದ್​​ ನಿವಾಸದ ಬಳಿ ಸ್ಫೋಟ.. ಮೂವರು ಸಾವು, 16 ಮಂದಿ ಗಾಯ

ಸ್ಫೋಟದ ತೀವ್ರತೆ ಬಹಳಷ್ಟು ಭೀಕರವಾಗಿದ್ದರಿಂದ ಅನೇಕ ಮನೆಯ ಕಿಟಕಿ ಗಾಜು ಪುಡಿ-ಪುಡಿಯಾಗಿವೆ ಎಂದು ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.

ಲಾಹೋರ(ಪಾಕಿಸ್ತಾನ):ಮುಂಬೈ ದಾಳಿಯ ಮಾಸ್ಟರ್​ ಮೈಂಡ್​​, ಜಮಾತ್​ ​ -​ ಉದ್ ​ - ದವಾ ಸಂಘಟನೆಯ ಮುಖ್ಯಸ್ಥ ಹಫೀಜ್​ ಸಯೀದ್​​ ನಿವಾಸದ ಬಳಿ ಬಾಂಬ್​​ ಸ್ಫೋಟಗೊಂಡಿದೆ. ಘಟನೆಯಲ್ಲಿ ಮೂವರು ಸಾವನ್ನಪ್ಪಿದ್ದು, 16 ಮಂದಿ ಗಾಯಗೊಂಡಿದ್ದಾರೆ. ಘಟನಾ ಸ್ಥಳಕ್ಕೆ ಪೊಲೀಸರು ಹಾಗೂ ಬಾಂಬ್​ ನಿಷ್ಕ್ರೀಯ ದಳ ತಲುಪಿದ್ದು, ರಕ್ಷಣಾ ಕಾರ್ಯಾಚರಣೆ ನಡೆಸುತ್ತಿದೆ ಎಂದು ತಿಳಿದು ಬಂದಿದೆ.

ಪಾಕಿಸ್ತಾನದ ಪಂಜಾಬ್​​ ಪ್ರಾಂತ್ಯದ ವಸತಿ ಪ್ರದೇಶದಲ್ಲಿ ಈ ಸ್ಫೋಟ ಸಂಭವಿಸಿದ್ದು, ಜೋಹಾರ್​​ ನಗರದ ಮುಮ್ತಾಜ್​​​​ ಆಸ್ಪತ್ರೆ ಸಮೀಪದಲ್ಲಿ ಈ ಘಟನೆ ನಡೆದಿರುವುದಾಗಿ ವರದಿಯಾಗಿದೆ. ಸ್ಫೋಟದ ತೀವ್ರತೆ ಬಹಳಷ್ಟು ಭೀಕರವಾಗಿದ್ದರಿಂದ ಅನೇಕ ಮನೆಯ ಕಿಟಕಿ ಗಾಜು ಪುಡಿ - ಪುಡಿಯಾಗಿವೆ ಎಂದು ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ. ಇದರ ಪಕ್ಕದಲ್ಲೇ ಉಗ್ರ ಹಫೀಜ್​ ಸಯೀದ್ ನಿವಾಸವಿತ್ತು ಎಂದು ವರದಿಯಾಗಿದೆ.

ಸ್ಫೋಟಕ್ಕೆ ನಿಖರವಾದ ಕಾರಣ ಏನು ಎಂಬುದು ಸ್ಪಷ್ಟವಾಗಿಲ್ಲ. ಗಾಯಗೊಂಡವರನ್ನ ಈಗಾಗಲೇ ಹತ್ತಿರದ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಗ್ಯಾಸ್​ ಪೈಪ್​​ಲೈನ್​ ಸ್ಫೋಟಗೊಂಡಿದೆಯೆ? ಅಥವಾ ಸಿಲಿಂಡರ್​​ ಸ್ಫೋಟದಿಂದ ಈ ಘಟನೆ ನಡೆದಿದೆ ಎಂಬುದು ನಿರ್ಧರಿಸಲು ಸಾಧ್ಯವಾಗಿಲ್ಲ ಎಂದು ರಕ್ಷಣಾ ಕಾರ್ಯಾಚರಣೆ ವಕ್ತಾರರು ಮಾಹಿತಿ ನೀಡಿದ್ದಾರೆ.

ಪಂಜಾಬ್​ ಪ್ರಾಂತ್ಯದ ಮುಖ್ಯಮಂತ್ರಿ ಉಸ್ಮಾನ್​​ ಬುಜ್ದಾರ್​ ಘಟನೆ ಬಗ್ಗೆ ಮಾಹಿತಿ ಪಡೆದುಕೊಂಡಿದ್ದು, ವರದಿ ನೀಡುವಂತೆ ಐಜಿಗೆ ನಿರ್ದೇಶನ ನೀಡಿದ್ದಾರೆ. ಘಟನಾ ಸ್ಥಳಕ್ಕೆ ತೆರಳುವಂತೆ ಪೊಲೀಸ್​ ಅಧಿಕಾರಿಗಳಿಗೆ ಅಲ್ಲಿನ ಜಿಲ್ಲಾಧಿಕಾರಿ ಮುದಾಸೀರ್​ ರಿಯಾಜ್​ ಮಲಿಕ್​ ಸೂಚನೆ ನೀಡಿದ್ದಾರೆ. ಜತೆಗೆ ಆಸ್ಪತ್ರೆಗಳಲ್ಲಿ ತುರ್ತು ವಾರ್ಡ್ ಮೀಸಲಿಡುವಂತೆ ಸೂಚನೆ ನೀಡಿದ್ದಾರೆ. ​​