7 ತಿಂಗಳ ಹಿಂದೆ ಅಪ್ರಾಪ್ತೆ ಅಪಹರಿಸಿದ್ದ ಯುವಕ ಪೋಕ್ಸೋ ಕಾಯ್ದೆಯಡಿ ಈಗ ಬಂಧನ!

7 ತಿಂಗಳ ಹಿಂದೆ ಅಪ್ರಾಪ್ತೆ ಅಪಹರಿಸಿದ್ದ ಪ್ರಕರಣದಲ್ಲಿ ಆರೋಪಿಯನ್ನು ಪೊಲೀಸರು ಪೋಕ್ಸೋ ಕಾಯ್ದೆಯಡಿ ಬಂಧಿಸಿದ್ದಾರೆ.

ಮಧುರೈ:ಫ್ರೀ ಫೈರ್​ ಆನ್​ಲೈನ್​ ಗೇಮ್​ ಮೂಲಕ ಅಪ್ರಾಪ್ತೆ ಪರಿಚಯ ಬೆಳೆಸಿಕೊಂಡ ಯುವಕ, ಆಕೆಯನ್ನು ಮದುವೆ ಮಾಡಿಕೊಳ್ಳುವ ನೆಪದಲ್ಲಿ ಗೌಪ್ಯವಾಗಿ ಮಹಾರಾಷ್ಟ್ರಕ್ಕೆ ಕರೆದೊಯ್ದಿದ್ದ. ಇತ್ತ ನಾಪತ್ತೆ ಪ್ರಕರಣ ದಾಖಲಿಸಿಕೊಂಡಿದ್ದ ಪೊಲೀಸರು 7 ತಿಂಗಳ ಬಳಿಕ ಪೋಕ್ಸೋ ಕಾಯ್ದೆಯಡಿ ಆರೋಪಿಯನ್ನು ಬಂಧಿಸಿದ್ದಾರೆ.

ಮಹಾರಾಷ್ಟ್ರದ ನಿವಾಸಿ ಸೆಲ್ವ (22) ಬಂಧಿತ ಆರೋಪಿ. ತಮಿಳುನಾಡಿನ ಮಧುರೈ ಮೂಲದ ಅಪ್ರಾಪ್ತೆಯನ್ನು ಫ್ರೀ ಫೈರ್​ ಆನ್​ಲೈನ್​ ಗೇಮ್​ ಮೂಲಕ ಪರಿಚಯ ಬೆಳೆಸಿಕೊಂಡಿದ್ದ. ಬಳಿಕ 2021 ರ ಡಿಸೆಂಬರ್​ 20 ರಂದು ವಿವಾಹವಾಗುವುದಾಗಿ ನಂಬಿಸಿ ಮಹಾರಾಷ್ಟ್ರಕ್ಕೆ ಕರೆದೊಯ್ದಿದ್ದ.

ಇತ್ತ ಬಾಲಕಿಯ ಪೋಷಕರು ನಾಪತ್ತೆ ಪ್ರಕರಣ ದಾಖಲಿಸಿದ್ದರು. ಪ್ರಕರಣ ಬೆನ್ನಟ್ಟಿದ ಪೊಲೀಸರು ಬಾಲಕಿಯ ಮೊಬೈಲ್​ ಟವರ್ ಮೂಲಕ ಬಾಲಕಿಯನ್ನು ಪುಣೆಯಲ್ಲಿ ಪತ್ತೆ ಮಾಡಿದ್ದರು. ಏಪ್ರಿಲ್​ 4 ರಂದು ಅವಳನ್ನು ತಮಿಳುನಾಡಿಗೆ ವಾಪಸ್​ ಕರೆತರಲಾಗಿತ್ತು.

ಈ ವೇಳೆ ಆರೋಪಿ ಸೆಲ್ವಾ ನಾಪತ್ತೆಯಾಗಿದ್ದ. ಅಂದಿನಿಂದ ಹುಡುಕಾಟ ನಡೆಸುತ್ತಿದ್ದ ಪೊಲೀಸರಿಗೆ ಸೆಲ್ವ ಮಹಾರಾಷ್ಟ್ರದಲ್ಲಿ ರಾಜ್​ಕೋಟ್​​ನಲ್ಲಿ ಇರುವ ಬಗ್ಗೆ ಮಾಹಿತಿ ಅರಿತು 5 ಪೊಲೀಸರ ತಂಡ ದಾಳಿ ನಡೆಸಿ ಆರೋಪಿಯನ್ನು 7 ತಿಂಗಳ ನಂತರ ಬಂಧಿಸಿ ತಮಿಳುನಾಡಿಗೆ ಕರೆತಂದಿದ್ದಾರೆ.

ಅಪ್ರಾಪ್ತೆಯನ್ನು ಗೌಪ್ಯವಾಗಿ ಅಪಹರಿಸಿದ ಆರೋಪದ ಮೇಲೆ ಪೋಕ್ಸೋ ಕಾಯ್ದೆ ದಾಖಲಿಸಲಾಗಿದೆ. ವಿಚಾರಣೆಯ ಬಳಿಕ ಕೋರ್ಟ್​ಗೆ ಹಾಜರುಪಡಿಸಿ ಮಧುರೈನ ಕೇಂದ್ರ ಕಾರಾಗೃಹಕ್ಕೆ ಅಟ್ಟಲಾಗಿದೆ.

ಓದಿ:ಮತ್ತೆ ಸ್ಪೈಸ್​ಜೆಟ್​ ವಿಮಾನದಲ್ಲಿ ತಾಂತ್ರಿಕ ದೋಷ.. 24 ದಿನದಲ್ಲಿ 9ನೇ ಅಚಾತುರ್ಯ