'ಆಫ್​ಲೈನ್ ಬೇಡ ಆನ್​ಲೈನ್​​​ ಮೂಲಕ ಬೋರ್ಡ್​​​ ಪರೀಕ್ಷೆ' ನಡೆಸಿ.. ಸಾವಿರಾರು ವಿದ್ಯಾರ್ಥಿಗಳಿಂದ ಪ್ರತಿಭಟನೆ

Students Demand Cancellation of Board Exams : ಕಳೆದ ಎರಡು ವರ್ಷಗಳಿಂದ ಆನ್​ಲೈನ್ ಮೂಲಕವೇ ನಮಗೆ ತರಗತಿಗಳು ನಡೆದಿದ್ದು, ಇದೀಗ ಆಫ್​ಲೈನ್​ ಪರೀಕ್ಷೆ ನಡೆಸುವುದು ಬೇಡ ಎಂದು ಆಗ್ರಹಿಸಿ ವಿದ್ಯಾರ್ಥಿಗಳು ಪ್ರತಿಭಟನೆ ನಡೆಸಿದರು..

ಮುಂಬೈ(ಮಹಾರಾಷ್ಟ್ರ) :ಕೋವಿಡ್​ನಿಂದಾಗಿ ಕಳೆದ ಎರಡು ವರ್ಷಗಳಿಂದ ರಾಜ್ಯದಲ್ಲಿ ಆನ್​ಲೈನ್ ಮೂಲಕ ತರಗತಿಗಳು ನಡೆದಿವೆ. ಈಗ ದಿಢೀರ್​ ಆಗಿ ಆಫ್​ಲೈನ್ ಪರೀಕ್ಷೆ ನಡೆಸಲು ಘೋಷಣೆ ಮಾಡಲಾಗಿದೆ. ಮಹಾರಾಷ್ಟ್ರ ರಾಜ್ಯ ಸರ್ಕಾರದ ಈ ನಿರ್ಧಾರ ಖಂಡಿಸಿ ಸಾವಿರಾರು ವಿದ್ಯಾರ್ಥಿಗಳು ಇಂದು ಪ್ರತಿಭಟಿಸಿದರು.

ಮಹಾರಾಷ್ಟ್ರ ಶಿಕ್ಷಣ ಸಚಿವ ವರ್ಷಾ ಏಕನಾಥ್ ಗಾಯಕ್ವಾಡ್​ ಅವರ ನಿವಾಸದ ಎದುರು ವಿದ್ಯಾರ್ಥಿಗಳು ಪ್ರತಿಭಟಿಸಿದರು. ಕೋವಿಡ್ ಬಿಕ್ಕಟ್ಟಿನಿಂದಾಗಿ ರಾಜ್ಯದಲ್ಲಿ 10 ಮತ್ತು 12ನೇ ತರಗತಿಗಳಿಗೆ ಆನ್​ಲೈನ್​ ಮೂಲಕವೇ ನಡೆದಿದ್ದು, ಇದೀಗ ಆಫ್​ಲೈನ್​ ಪರೀಕ್ಷೆ ನಡೆಸಲು ಮುಂದಾಗಿದೆ ಎಂದು ವಿದ್ಯಾರ್ಥಿಗಳು ಆರೋಪಿಸಿದರು.

ಆನ್​ಲೈನ್ ಮೂಲಕ ಕೋರ್ಸ್ ನಡೆದಿರುವ ಕಾರಣ ಕೆಲ ವಿಷಯಗಳ ಬಗ್ಗೆ ನಮಗೆ ಅರ್ಥವಾಗಿಲ್ಲ. 10 ಮತ್ತು 12ನೇ ತರಗತಿ ಬೋರ್ಡ್ ಪರೀಕ್ಷೆ ರದ್ಧುಗೊಳಿಸಬೇಕು. ಇಲ್ಲವೇ ಆನ್​ಲೈನ್ ಮೂಲಕವೇ ಪರೀಕ್ಷೆ ನಡೆಸುವಂತೆ ಅವರು ಪಟ್ಟು ಹಿಡಿದರು.

ಮಾಹಾರಾಷ್ಟ್ರದಲ್ಲಿ ಮಾರ್ಚ್​​ 4ರಿಂದ 12ರವರೆಗೆ 12ನೇ ತರಗತಿ ಬೋರ್ಡ್ ಪರೀಕ್ಷೆ ಆಫ್​ಲೈನ್ ಮೂಲಕ ನಡೆಸಲು ದಿನಾಂಕ ನಿಗದಿಯಾಗಿದೆ. ಮಾರ್ಚ್​​ 15ರಿಂದ 10ನೇ ತರಗತಿ ಪರೀಕ್ಷೆ ಆರಂಭಗೊಳ್ಳಲಿವೆ. ಶಿಕ್ಷಣ ಸಚಿವರ ಈ ನಿರ್ಧಾರ ವಿರೋಧಿಸಿ ಪುಣೆಯಲ್ಲಿ ಸಾವಿರಾರು ವಿದ್ಯಾರ್ಥಿಗಳು ಬೀದಿಗಿಳಿದು ಪ್ರತಿಭಟಿಸಿದರು.

ಜಾಹೀರಾತು: ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ