ಮಾಜಿ ಸಿಎಂ ಫಡ್ನವೀಸ್, ರಾಜ್ ಠಾಕ್ರೆ ಭದ್ರತೆ ಕಡಿತಗೊಳಿಸಿದ 'ಮಹಾ' ಸರ್ಕಾರ

ಬಿಜೆಪಿ ಮುಖಂಡ ಮತ್ತು ಮಾಜಿ ಸಿಎಂ ನಾರಾಯಣ್ ರಾಣೆ, ರಾಜ್ಯ ಬಿಜೆಪಿ ಮುಖ್ಯಸ್ಥ ಚಂದ್ರಕಾಂತ್ ಪಾಟೀಲ್ ಮತ್ತು ಪಕ್ಷದ ಹಿರಿಯ ಮುಖಂಡ ಸುಧೀರ್ ಮುಂಗಂತಿವಾರ್ ಅವರ ಭದ್ರತಾ ಕವರ್ ಹಿಂಪಡೆಯಲಾಗಿದೆ. ರಾಣೆ 'ವೈ-ಪ್ಲಸ್' ಭದ್ರತೆ ಹೊಂದಿದ್ದರು..

ಮುಂಬೈ:ಮಹಾರಾಷ್ಟ್ರ ಸರ್ಕಾರ ಪ್ರತಿಪಕ್ಷದ ನಾಯಕ ದೇವೇಂದ್ರ ಫಡ್ನವೀಸ್ ಮತ್ತು ಅವರ ಕುಟುಂಬ, ಯುಪಿ ಮಾಜಿ ಗವರ್ನರ್ ರಾಮ್ ನಾಯಕ್, ಎಂಎನ್ಎಸ್ ಅಧ್ಯಕ್ಷ ರಾಜ್ ಠಾಕ್ರೆ ಅವರಿಗೆ ನೀಡಿದ್ದ ಭದ್ರತೆ ಕಡಿಮೆಗೊಳಿಸಿದೆ. ಅಲ್ಲದೇ ರಾಜ್ಯ ಬಿಜೆಪಿ ಮುಖ್ಯಸ್ಥ ಚಂದ್ರಕಾಂತ್ ಪಾಟೀಲ್ ಅವರ ಭದ್ರತಾ ಕವರ್​ನನ್ನು ಹಿಂತೆಗೆದುಕೊಂಡಿದೆ.

ರಾಜ್ಯ ಬಿಜೆಪಿ ವಕ್ತಾರ ಕೇಶವ್ ಉಪಾಧ್ಯಾ ಅವರು ಇದನ್ನು 'ವೆಂಡೆಟ್ಟಾ ರಾಜಕೀಯ' ಎಂದು ಬಣ್ಣಿಸಿದ್ದಾರೆ. ನನ್ನ ಯೋಜನೆ ಮತ್ತು ಜನರನ್ನು ಭೇಟಿ ಮಾಡುವುದರ ಮೇಲೆ ಇದು ಪರಿಣಾಮ ಬೀರುವುದಿಲ್ಲ ಎಂದು ಮಾಜಿ ಮುಖ್ಯಮಂತ್ರಿ ಫಡ್ನವೀಸ್​​ ಹೇಳಿದ್ದಾರೆ.

ಜನವರಿ 8ರಂದು ಹೊರಡಿಸಲಾದ ಸರ್ಕಾರದ ಅಧಿಸೂಚನೆಯ ಪ್ರಕಾರ, ಫಡ್ನವೀಸ್ ಅವರು 'ಝಡ್​​-ಪ್ಲಸ್' ಕವರ್ ಬದಲಿಗೆ 'ವೈ-ಪ್ಲಸ್ ಸೆಕ್ಯುರಿಟಿ ವಿತ್ ಬೆಂಗಾವಲು' ಪಡೆಯಲಿದ್ದಾರೆ. ಅವರ ಪತ್ನಿ ಅಮೃತ ಫಡ್ನವೀಸ್ ಮತ್ತು ಮಗಳು ದಿವಿಜಾ ಅವರ ಭದ್ರತೆಯನ್ನು 'ವೈ-ಪ್ಲಸ್ ವಿಥ್ ಎಸ್ಕಾರ್ಟ್' ನಿಂದ 'ಎಕ್ಸ್' ವರ್ಗಕ್ಕೆ ಇಳಿಸಲಾಗಿದೆ.

ಉತ್ತರ ಪ್ರದೇಶದ ಮಾಜಿ ಗವರ್ನರ್ ರಾಮ್ ನಾಯಕ್ ಅವರಿಗೆ ಈಗ 'ವೈ-ಪ್ಲಸ್' ಬದಲಿಗೆ 'ವೈ' ಕವರ್ ಸಿಗಲಿದೆ. ಎಂಎನ್‌ಎಸ್ ಮುಖ್ಯಸ್ಥ ರಾಜ್ ಠಾಕ್ರೆ ಅವರ ಭದ್ರತಾ ಕವರ್‌ನ 'ಝಡ್'ನಿಂದ 'ವೈ ಪ್ಲಸ್ ವಿಥ್ ಎಸ್ಕಾರ್ಟ್'ಗೆ ಇಳಿಸಲಾಗಿದೆ.

ಬಿಜೆಪಿ ಮುಖಂಡ ಮತ್ತು ಮಾಜಿ ಸಿಎಂ ನಾರಾಯಣ್ ರಾಣೆ, ರಾಜ್ಯ ಬಿಜೆಪಿ ಮುಖ್ಯಸ್ಥ ಚಂದ್ರಕಾಂತ್ ಪಾಟೀಲ್ ಮತ್ತು ಪಕ್ಷದ ಹಿರಿಯ ಮುಖಂಡ ಸುಧೀರ್ ಮುಂಗಂತಿವಾರ್ ಅವರ ಭದ್ರತಾ ಕವರ್ ಹಿಂಪಡೆಯಲಾಗಿದೆ. ರಾಣೆ 'ವೈ-ಪ್ಲಸ್' ಭದ್ರತೆ ಹೊಂದಿದ್ದರು.

ಅಲ್ಲದೆ, ರಾಜ್ಯ ಲೋಕಾಯುಕ್ತ ಎಂ ಎಲ್ ತಾಹಿಲಿಯಾನಿಹಾಸ್ ಅವರ ಭದ್ರತೆಯನ್ನು ''ಝಡ್'ನಿಂದ 'ವೈ'ಗೆ ಇಳಿಸಲಾಗಿದೆ. ಅಧಿಸೂಚನೆಯ ಪ್ರಕಾರ, ಇಬ್ಬರು ವ್ಯಕ್ತಿಗಳ ಭದ್ರತೆಯನ್ನು ಹೆಚ್ಚಿಸಲಾಗಿದ್ದು, 11 ಜನರ ಭದ್ರತೆ ಕಡಿಮೆ ಮಾಡಲಾಗಿದೆ. 16 ಜನರ ಭದ್ರತೆಯನ್ನು ಹಿಂತೆಗೆದುಕೊಳ್ಳಲಾಗಿದೆ. ಆದರೆ, 13 ಜನ ಹೊಸಬರಿಗೆ ಭದ್ರತಾ ರಕ್ಷಣೆ ನೀಡಲಾಗಿದೆ.

ಹೊಸದಾಗಿ ಭದ್ರತೆ ಪಡೆದ ವ್ಯಕ್ತಿಗಳಲ್ಲಿ ಪ್ರಮುಖರು, ರಾಜ್ಯ ಉಪಮುಖ್ಯಮಂತ್ರಿ ಅಜಿತ್ ಪವಾರ್ ಅವರ ಪತ್ನಿ ಸುನೇತ್ರ ಪವಾರ್ ಮತ್ತು ಯುವಸೇನೆ ಕಾರ್ಯದರ್ಶಿ ವರುಣ್ ಸರ್ದೇಸಾಯಿ ಹಾಗೂ ಮುಖ್ಯಮಂತ್ರಿ ಉದ್ಧವ್ ಠಾಕ್ರೆ ಅವರ ಪತ್ನಿ ರಶ್ಮಿ ಠಾಕ್ರೆ ಅವರ ಸೋದರಳಿಯ ಇದ್ದಾರೆ.