ಮೂರುವರೆ ಸಾವಿರ ಕೋಟಿ ರೂಪಾಯಿ ಕರೆಂಟ್​ ಬಿಲ್​ ನೋಡಿ ಆಸ್ಪತ್ರೆ ಸೇರಿದ ಮಾವ-ಸೊಸೆ

ಮಧ್ಯಪ್ರದೇಶದಲ್ಲಿ ವಿದ್ಯುತ್ ಇಲಾಖೆ ಎಡವಟ್ಟು ಮಾಡಿಕೊಂಡಿದೆ. ಗ್ರಾಹಕರೊಬ್ಬರಿಗೆ ಮೂರುವರೆ ಸಾವಿರ ಕೋಟಿ ರೂಪಾಯಿ ಮೊತ್ತದ ಕರೆಂಟ್‌ ಬಿಲ್‌ ಕಳುಹಿಸಿದೆ. ಇದನ್ನು ನೋಡಿ ಕಂಗಾಲಾದ ಮಾವ ಮತ್ತು ಸೊಸೆ ಆಸ್ಪತ್ರೆಗೆ ದಾಖಲಾಗಿದ್ದಾರೆ.

ಗ್ವಾಲಿಯಾರ್: ಮಧ್ಯಪ್ರದೇಶದ ಇಂಧನ ಸಚಿವರ ತವರು ಜಿಲ್ಲೆಯಾದ ಗ್ವಾಲಿಯರ್‌ನಲ್ಲಿ ಅಚ್ಚರಿಯ ಸಂಗತಿಯೊಂದು ಬೆಳಕಿಗೆ ಬಂದಿದೆ. ವಿದ್ಯುತ್​ ಇಲಾಖೆಯು ವ್ಯಕ್ತಿಯೊಬ್ಬರಿಗೆ 3,419 ಕೋಟಿ ರೂ ವಿದ್ಯುತ್ ಬಿಲ್ ಕಳುಹಿಸಿದೆ. ಇದನ್ನು ನೋಡಿದ ಇಬ್ಬರು ಅಸ್ವಸ್ಥಗೊಂಡು ಆಸ್ಪತ್ರೆ ಸೇರಿದ್ದಾರೆ.

ಗ್ರಾಹಕರಿಗೆ ಕಳುಹಿಸಿದ ಕರೆಂಟ್ ಬಿಲ್​

ಗ್ವಾಲಿಯರ್‌ನ ಐಷಾರಾಮಿ ಪ್ರದೇಶ ಶಿವ ಬಿಹಾರ ಕಾಲೋನಿಯಲ್ಲಿ ಪ್ರಿಯಾಂಕಾ ಗುಪ್ತಾ ಎಂಬುವವರ ಮನೆ ಇದೆ. ಇವರ ಪತ್ನಿ ಪ್ರಿಯಾಂಕಾ ಗೃಹಿಣಿಯಾಗಿದ್ದು, ಪತಿ ಸಂಜೀವ್ ವಕೀಲರು. ಈ ವಿದ್ಯುತ್‌ ಬಿಲ್‌ ಬಗ್ಗೆ ಮಾಹಿತಿ ನೀಡಿದ ಸಂಜೀವ್, "ಈ ಬಾರಿ ನನ್ನ ವಿದ್ಯುತ್ ಬಿಲ್ 3 ಸಾವಿರದ 419 ಕೋಟಿ ರೂ.ಗಿಂತ ಹೆಚ್ಚು ಬಂದಿದೆ. ಇದನ್ನು ನೋಡಿದ ಪತ್ನಿ ಪ್ರಿಯಾಂಕಾ ಮತ್ತು ತಂದೆ ರಾಜೇಂದ್ರ ಪ್ರಸಾದ್ ಗುಪ್ತಾಗೆ ರಕ್ತದೊತ್ತಡ ಹೆಚ್ಚಾಗಿದೆ. ಕೂಡಲೇ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು ಚಿಕಿತ್ಸೆ ಪಡೆಯುತ್ತಿದ್ದಾರೆ" ಎಂದು ಹೇಳಿದ್ದಾರೆ.

ಈ ಸುದ್ದಿ ತಿಳಿದ ವಿದ್ಯುಚ್ಛಕ್ತಿ ಇಲಾಖೆ ಕೂಡಲೇ ತಪ್ಪು ತಿದ್ದಿಕೊಂಡು ಪರಿಷ್ಕರಿಸಿದ 1,300 ರೂ. ರಶೀದಿ ಕಳುಹಿಸಿ ಕೊಟ್ಟಿದೆ. ವಿದ್ಯುತ್ ಕಂಪನಿಯ ಪ್ರಧಾನ ವ್ಯವಸ್ಥಾಪಕರು ಪ್ರತಿಕ್ರಿಯಿಸಿ, "ಬಿಲ್​ ಕಳುಹಿಸುವಾಗ ದೋಷವಾಗಿದ್ದು, ಸರಿಪಡಿಸಲಾಗಿದೆ. ಸಂಬಂಧಪಟ್ಟ ಅಧಿಕಾರಿಗಳ ವಿರುದ್ಧ ಕ್ರಮವೂ ಆಗಿದೆ. ಪ್ರಕರಣದಲ್ಲಿ ಸಹಾಯಕ ಕಂದಾಯ ಅಧಿಕಾರಿಯನ್ನು ಅಮಾನತುಗೊಳಿಸಿ, ಶೋಕಾಸ್ ನೋಟಿಸ್ ಜಾರಿ ಮಾಡಲಾಗಿದೆ" ಎಂದು ಹೇಳಿದರು.

ಸಚಿವರ ಪ್ರತಿಕ್ರಿಯೆ:ವಿದ್ಯುತ್ ಸಚಿವ ಪ್ರದ್ಯುಮನ್ ಸಿಂಗ್ ತೋಮರ್ ಮಾತನಾಡಿ, "ತಪ್ಪು ಮಾಡಿರುವುದನ್ನು ತಕ್ಷಣವೇ ಸರಿಪಡಿಸಲಾಗಿದೆ. ತಪ್ಪಿತಸ್ಥರ ವಿರುದ್ಧ ಕ್ರಮ ತೆಗೆದುಕೊಳ್ಳಲಾಗಿದೆ. ಇದಕ್ಕಿಂತ ಇನ್ನೇನು ಬೇಕು? ಎಂದಿದ್ದಾರೆ.

ಇದನ್ನೂಓದಿ:ವಿದ್ಯುತ್ ಬಿಲ್​ ಹೆಚ್ಚಳ : ಸಿಟ್ಟಿಗೆದ್ದು ಹೈವೋಲ್ಟೇಜ್ ವಿದ್ಯುತ್ ತಂತಿ ಮೇಲೇರಿದ ವ್ಯಕ್ತಿ- ವಿಡಿಯೋ