ವರ್ಷಕ್ಕೆ ₹3 ಕೋಟಿಯ ಪ್ಯಾಕೇಜ್​​.. ಕೇರಳ ವಿದ್ಯಾರ್ಥಿಗೆ ಬಹುರಾಷ್ಟ್ರೀಯ ಕಂಪನಿಯಿಂದ ಬಿಗ್​ ಆಫರ್​!

ಪ್ರತಿಷ್ಠಿತ ವಿಶ್ವವಿದ್ಯಾಲಯಗಳಲ್ಲಿ ಒಂದಾಗಿರುವ ಲವ್ಲಿ ಪ್ರೊಫೆಷನಲ್ ಯುನಿವರ್ಸಿಟಿಯ ವಿದ್ಯಾರ್ಥಿಯೋರ್ವ ವಾರ್ಷಿಕವಾಗಿ 3 ಕೋಟಿ ರೂಪಾಯಿ ಪ್ಯಾಕೇಜ್​ ಗಿಟ್ಟಿಸಿಕೊಂಡಿದ್ದಾರೆ.

ಹೈದರಾಬಾದ್​: ಪಂಜಾಬ್​​ನಲ್ಲಿರುವ ಲವ್ಲಿ ಪ್ರೊಫೆಷನಲ್ ಯುನಿವರ್ಸಿಟಿಯಲ್ಲಿ ವ್ಯಾಸಂಗ ಮಾಡುವ ಸಾವಿರಾರು ವಿದ್ಯಾರ್ಥಿಗಳು ದೇಶ ಮಾತ್ರವಲ್ಲ, ಪ್ರಪಂಚದ ಅನೇಕ ಬಹುರಾಷ್ಟ್ರೀಯ ಕಂಪನಿಗಳಲ್ಲಿ ಕೆಲಸ ಗಿಟ್ಟಿಸಿಕೊಂಡಿದ್ದಾರೆ. ಆದರೆ, ಇದೀಗ ಹೊಸದೊಂದು ಸುದ್ದಿ ಹೊರಬಿದ್ದಿದೆ. ಇಲ್ಲಿ ವ್ಯಾಸಂಗ ಮಾಡಿರುವ ವಿದ್ಯಾರ್ಥಿಯೊಬ್ಬ ಬರೋಬ್ಬರಿ 3 ಕೋಟಿ ರೂಪಾಯಿ ವಾರ್ಷಿಕ ಪ್ಯಾಕೇಜ್​ ಪಡೆದುಕೊಂಡಿದ್ದಾನೆ. ಈ ಮೂಲಕ ಹೊಸದೊಂದು ದಾಖಲೆ ಬರೆದಿದ್ದಾನೆ.

ಕೇರಳ ಮೂಲದ ಯಾಸಿರ್​​ ಲವ್ಲಿ ಪ್ರೊಫೆಷನಲ್​ ಯೂನಿವರ್ಸಿಟಿಯಿಂದ ಪದವಿ ಪಡೆದುಕೊಂಡಿದ್ದು, ಈತನಿಗೆ ವಿಶ್ವ ಪ್ರಸಿದ್ಧ ಬಹುರಾಷ್ಟ್ರೀಯ ಕಂಪನಿ 3ಕೋಟಿ ರೂಪಾಯಿ ಪ್ಯಾಕೇಜ್ ನೀಡಿದೆ. ಎಲ್​​ಪಿಯುನಿಂದ 2018ರಲ್ಲಿ ಪಾಸ್ ಆಗಿರುವ ಯಾಸಿರ್​​ ಇಷ್ಟೊಂದು ಪ್ಲೇಸ್​ಮೆಂಟ್ ಪ್ಯಾಕೇಜ್​ ಪಡೆದುಕೊಳ್ಳುವ ಮೂಲಕ ಹೊಸದೊಂದು ದಾಖಲೆ ಬರೆದಿದ್ದಾರೆ. ವಿಶ್ವವಿದ್ಯಾಲಯದ ಇತಿಹಾಸದಲ್ಲಿ ಇಷ್ಟೊಂದು ಹೆಚ್ಚಿನ ಪ್ಯಾಕೇಜ್​ ಪಡೆದುಕೊಂಡಿರುವ ಸಾಲಿನಲ್ಲಿ ಯಾಸಿರ್ ಮೊದಲಿಗರಾಗಿದ್ದಾರೆ.

ವಿಶ್ವವಿದ್ಯಾಲಯದಲ್ಲಿ ವ್ಯಾಸಂಗ ಮಾಡ್ತಿದ್ದ ವೇಳೆ ಯಾಸಿರ್ ಓರ್ವ ಬುದ್ಧಿವಂತ ವಿದ್ಯಾರ್ಥಿ ಎಂದು ಗುರುತಿಸಿಕೊಂಡಿದ್ದರು. ಬಿಟೆಕ್​ ಸಿಎಸ್​ಇ ಪದವೀಧರನಾಗಿರುವ ಇವರು 8.6 ಸಿಜೆಪಿಎಯೊಂದಿಗೆ ಕಂಪ್ಯೂಟರ್​ ಸೈನ್ಸ್​​​ನಲ್ಲಿ ಬಿ.ಟೆಕ್​​ ಪೂರ್ಣಗೊಳಿಸಿದ್ದಾರೆ. ವಿದ್ಯಾಭ್ಯಾಸ ಮಾಡ್ತಿದ್ದ ಸಂದರ್ಭದಲ್ಲಿ ಅಲ್ಲಿ ಕಲಿತಿರುವ ಮೂಲ ಅಂಶಗಳು ನನ್ನ ಯಶಸ್ಸಿಗೆ ಕಾರಣವಾಗಿವೆ ಎಂದು ಯಾಸಿರ್ ಹೇಳಿಕೊಂಡಿದ್ದಾರೆ.

ಎಪಿಯುನ ಸಾವಿರಾರು ವಿದ್ಯಾರ್ಥಿಗಳು ಈಗಾಗಲೇ ಗೂಗಲ್​, ಆ್ಯಪಲ್​, ಮೈಕ್ರೋಸಾಫ್ಟ್, ಮರ್ಸಿಡಿಸ್​​ ಸೇರಿದಂತೆ ಅನೇಕ ಪ್ರತಿಷ್ಠಿತ ಕಂಪನಿಗಳಲ್ಲಿ ಕೆಲಸ ಮಾಡ್ತಿದ್ದು, ಅವರ ವಾರ್ಷಿಕ ಪ್ಯಾಕೇಜ್​​ 1 ಕೋಟಿಗೂ ಅಧಿಕವಾಗಿದೆ. ಇತ್ತೀಚೆಗೆ ಎಲ್​ಪಿಯು ಬಿ.ಟೆಕ್​ ಪದವೀಧರ ಹರೇಕೃಷ್ಣ ಮಹತೋ ಸಹ ಬೆಂಗಳೂರಿನಲ್ಲಿರುವ ಗೂಗಲ್​ ಆಫೀಸ್​ನಲ್ಲಿ ಕೆಲಸ ಗಿಟ್ಟಿಸಿಕೊಂಡಿದ್ದಾರೆ.

ಅವರಿಗೆ ವಾರ್ಷಿಕವಾಗಿ 64 ಲಕ್ಷ ರೂ. ಸಿಕ್ಕಿದೆ. ವಿಶೇಷವೆಂದರೆ 2021-22ರ ಬ್ಯಾಚ್​ನ ಬರೋಬ್ಬರಿ 431 ವಿದ್ಯಾರ್ಥಿಗಳು ವಿವಿಧ ಕಂಪನಿಗಳಲ್ಲಿ 10 ಲಕ್ಷ ರೂ,ಗೂ ಅಧಿಕ ಪ್ಯಾಕೇಜ್​ನ ಕೆಲಸ ಗಿಟ್ಟಿಸಿಕೊಂಡಿದ್ದಾರೆ.