ಹೈದರಾಬಾದ್(ತೆಲಂಗಾಣ):ಮದ್ಯ ಹಗರಣದ ಬಂಧನ ಹೈದರಾಬಾದ್ನಲ್ಲಿ ಸಂಚಲನ ಮೂಡಿಸುತ್ತಿದೆ. ಹೈದರಾಬಾದ್‌ನ ಅರುಣ್ ರಾಮಚಂದ್ರ ಪಿಳ್ಳೈ ಈ ಪ್ರಕರಣದಲ್ಲಿ ಆರೋಪಿ. ಸಿಬಿಐ ಈಗಾಗಲೇ ಒಂದು ಬಾರಿ ಮತ್ತು ಇಡಿ ಮೂರು ಬಾರಿ ಶೋಧ ನಡೆಸಿರುವುದರಿಂದ ತನಿಖಾ ಸಂಸ್ಥೆಗಳ ಬಿಸಿ ನಗರಕ್ಕೆ ಯಾವುದೇ ಕ್ಷಣದಲ್ಲಿ ತಟ್ಟಬಹುದು ಎಂದು ನಿರೀಕ್ಷಿಸಲಾಗಿದೆ. ಮೇಲಾಗಿ, ದೆಹಲಿಯಲ್ಲಿ ಬಂಧಿತರಾಗಿರುವ ಇಬ್ಬರು ಆರೋಪಿಗಳು ಸಿಬಿಐ ಎಫ್‌ಐಆರ್‌ನಲ್ಲಿ ರಾಮಚಂದ್ರ ಪಿಳ್ಳೈ ಜೊತೆ ನಂಟು ಹೊಂದಿರುವುದು ಕೂಡ ಮುಂದಿನ ಕ್ರಮಗಳು ಹೈದರಾಬಾದ್‌ನಲ್ಲಿರಬಹುದು ಎಂಬ ಊಹಾಪೋಹಗಳು ಎದ್ದಿವೆ.
ಮದ್ಯ ಕಳ್ಳಸಾಗಣೆ ಪ್ರಕರಣದ ತನಿಖೆಯ ಭಾಗವಾಗಿ ಸಿಬಿಐ ಮತ್ತು ಇಡಿ 24 ಗಂಟೆಗಳಲ್ಲಿ ಇಬ್ಬರು ಆರೋಪಿಗಳನ್ನು ಬಂಧಿಸಿದೆ. 'ಮಚ್‌ಲೌಡರ್' ಸಿಇಒ ಮತ್ತು 'ಎಎಪಿ ಕಮ್ಯುನಿಕೇಷನ್ಸ್' ಉಸ್ತುವಾರಿ ವಿಜಯ್ ನಾಯರ್ನ್ನು ಸಿಬಿಐ ಮಂಗಳವಾರ ಬಂಧಿಸಿದೆ ಮತ್ತು 'ಇಂಡೋ ಸ್ಪಿರಿಟ್' ಎಂಡಿ ಸಮೀರ್ ಮಹೇಂದ್ರುರನ್ನು ಬುಧವಾರ ದೆಹಲಿಯಲ್ಲಿ ಇಡಿ ಅಧಿಕಾರಿಗಳು ಬಂಧಿಸಿದ್ದಾರೆ. ವಿಜಯ್ ನಾಯರ್ ಪರವಾಗಿ ಮಹೇಂದ್ರು ದೆಹಲಿ ಉಪಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಅವರ ಬೆಂಬಲಿಗ ಅರ್ಜುನ್ ಪಾಂಡೆಗೆ 2 ರಿಂದ 4 ಕೋಟಿ ರೂ.ಗಳನ್ನು ಹಸ್ತಾಂತರಿಸಿದ್ದಾರೆ ಎಂದು ಸಿಬಿಐ ಆರೋಪಿಸಿದೆ. ಇದರಲ್ಲಿ ಕೆಲವು ಹಣ ರಾಮಚಂದ್ರ ಪಿಳ್ಳೈ ಅವರಿಗೆ ಸೇರಿದ್ದೆಂದು ಶಂಕಿಸಲಾಗಿದೆ.
ತನಿಖೆಯ ಭಾಗವಾಗಿ ಸಿಬಿಐ ಮತ್ತು ಇಡಿ ಮೊದಲು ರಾಮಚಂದ್ರ ಪಿಳ್ಳೈ ಅವರ ಮನೆ ಮತ್ತು ಕಚೇರಿಗಳಲ್ಲಿ ಶೋಧ ನಡೆಸಿತ್ತು. ನಂತರ ಕ್ರಮೇಣ ಅವರೊಂದಿಗೆ ವ್ಯವಹಾರ ನಡೆಸುತ್ತಿರುವವರ ವಿವರಗಳನ್ನು ಸಂಗ್ರಹಿಸಿ ಅಲ್ಲಿ ಶೋಧ ಕೈಗೊಂಡಿತ್ತು. ಅದೂ ಅಲ್ಲದೆ ಎರಡು ತನಿಖಾ ಸಂಸ್ಥೆಗಳು ಅವರ ಹತ್ತಾರು ಉದ್ಯಮ ಸಂಸ್ಥೆಗಳ ವಿವರ ಸಂಗ್ರಹಿಸಿವೆ. ಅವರ ಎಲ್ಲಾ ವಹಿವಾಟುಗಳು ಮತ್ತು ವಾಸ್ತವಿಕವಾಗಿ ಅವರ ಆದಾಯದ ಮೂಲಗಳನ್ನು ಶೋಧಿಸಲಾಗುತ್ತದೆ. ಈ ಉದ್ಯಮ ಸಂಸ್ಥೆಗಳು ವ್ಯವಹಾರದಿಂದ ಆದಾಯವನ್ನು ಗಳಿಸದಿದ್ದರೂ, ಕಪ್ಪು ಹಣವನ್ನು ಲಾಭ ಎಂದು ತೋರಿಸಲಾಗುತ್ತದೆ. ಇದರಿಂದಾಗಿ ಕಪ್ಪು ಹಣವನ್ನು ಕಾನೂನುಬದ್ಧಗೊಳಿಸಲಾಗುತ್ತದೆ ಎಂದು ನಂಬಲಾಗಿದೆ.