ತಮಿಳುನಾಡಿನಲ್ಲಿ ಲೆಸ್ಬಿಯನ್​ ಜೋಡಿಯ ಕಲ್ಯಾಣ.. ಬಾಂಗ್ಲಾ ಮಹಿಳೆ ಕೈ ಹಿಡಿದ ಮಧುರೈ ಯುವತಿ

ತಮಿಳುನಾಡಿನ ಯುವತಿ ಮತ್ತು ಬಾಂಗ್ಲಾದೇಶದ ಮಹಿಳೆ ಪ್ರೀತಿಸಿ ಸಲಿಂಗ ವಿವಾಹವಾದ ವಿದ್ಯಮಾನ ನಡೆದಿದೆ. ಕೆನಡಾದಲ್ಲಿ ವಾಸಿಸುವ ಇಬ್ಬರಿಗೆ ತಮಿಳುನಾಡಿನಲ್ಲಿ ಸಾಂಪ್ರದಾಯಿಕ ಕಲ್ಯಾಣವಾಗಿದೆ.

ಚೆನ್ನೈ:ತಮಿಳುನಾಡಿನಲ್ಲಿ ಇಬ್ಬರು ಯುವತಿಯರು ಪರಸ್ಪರ ಕುಟುಂಬದ ಒಪ್ಪಿಗೆಯ ಮೇರೆಗೆ ಸಲಿಂಗ ವಿವಾಹ ಬಂಧನಕ್ಕೆ ಒಳಗಾದ ವಿದ್ಯಮಾನ ತಡವಾಗಿ ಬೆಳಕಿಗೆ ಬಂದಿದೆ. ಹೆಣ್ಣಾಗಿ ಹುಟ್ಟಿದ್ದ ತಮಿಳುನಾಡಿನ ಸುಭಿಕ್ಷಾ ಹಾರ್ಮೋನ್ ಬದಲಾವಣೆಯಿಂದ ಗಂಡಸಿನ ಭಾವನೆಗಳನ್ನು ಹೊಂದಿದ್ದು, ಬಾಂಗ್ಲಾದೇಶದ ಮಹಿಳೆ ಟೀನಾ ದಾಸ್​ರನ್ನು ವರಿಸಿ ಆಗಸ್ಟ್​ 31 ರಂದು ಸಪ್ತಪದಿ ತುಳಿದಿದ್ದಾರೆ.

ಬಾಂಗ್ಲಾ ಮಹಿಳೆ ಕೈ ಹಿಡಿದ ಮಧುರೈ ಯುವತಿ

ಕೆನಡಾದಲ್ಲಿ ಮೂಡಿದ ಪ್ರೀತಿ:ತಮಿಳುನಾಡಿನ ಸುಭಿಕ್ಷಾ ಸುಬ್ರಮಣಿ (29) ಜನ್ಮತಾ ಹೆಣ್ಣಾಗಿದ್ದಳು. ತಮ್ಮ 19 ನೇ ವಯಸ್ಸಿನಲ್ಲಿ ದೇಹದಲ್ಲಿನ ಹಾರ್ಮೋನು ಬದಲಾವಣೆಗಳಿಂದ ಅವಳು ಪುರುಷನಂತೆ ಜೀವಿಸಲು ಆರಂಭಿಸಿದಳು. ಪ್ರಸ್ತುತ ಕೆನಡಾದ ಕ್ಯಾಲ್ಗರಿಯಲ್ಲಿ ಚಾರ್ಟರ್ಡ್ ಅಕೌಂಟೆಂಟ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ತಮಿಳುನಾಡಿನ ಸುಭಿಕ್ಷಾ, ಬಾಂಗ್ಲಾದೇಶದ ಟೀನಾ ದಾಸ್​ ಮದುವೆ

ಇನ್ನು ಬಾಂಗ್ಲಾದೇಶದ ಮಹಿಳೆಯಾದ ಟೀನಾ ದಾಸ್ (39) 4 ವರ್ಷಗಳ ಕಾಲ ತನ್ನ ಪತಿಯೊಂದಿಗೆ ವಾಸಿಸಿದ ನಂತರ ಅವಳು "ಲೆಸ್ಬಿಯನ್" ಎಂದು ಅರಿತುಕೊಂಡಳು. ಹಾಗಾಗಿ ಆಕೆ ಗಂಡನಿಂದ ಪರಿತ್ಯಕ್ತಗೊಂಡಳು. ಕ್ಯಾಲ್ಗರಿಯ ಆಸ್ಪತ್ರೆಯೊಂದರಲ್ಲಿ ನರ್ಸ್​ ಆಗಿ ಕೆಲಸ ಮಾಡುತ್ತಿದ್ದಾರೆ.

ಸುಭೀಕ್ಷಾ ಮತ್ತು ಟೀನಾ ಕೆನಡಾದಲ್ಲೇ ಇದ್ದ ಕಾರಣ ಮೊಬೈಲ್ ಆ್ಯಪ್ ಮೂಲಕ ಇಬ್ಬರೂ ಪರಿಚಯವಾಗಿದ್ದಾರೆ. ಬಳಿಕ ಇಬ್ಬರೂ ಸಂಧಿಸಿದ್ದಾರೆ. ಹಲವು ವರ್ಷಗಳು ಒಟ್ಟಿಗೆ ಜೀವಿಸಿರುವ ಇವರು ಬಳಿಕ ವಿವಾಹವಾಗಲು ಇಚ್ಚಿಸಿದ್ದಾರೆ. ಬಳಿಕ ಸುಭಿಕ್ಷಾ ತಾನು ಹೆಣ್ಣಾಗಿದ್ದರೂ, ಗಂಡಸಿನ ಭಾವನೆಗಳನ್ನು ಹೊಂದಿದ್ದೇನೆ. ಟೀನಾಳನ್ನು ವಿವಾಹವಾಗುವ ಕುರಿತಾಗಿ ಹೇಳಿದಾಗ ಮೊದಮೊದಲು ವಿರೋಧಿಸಿದ ಕುಟುಂಬ ಬಳಿಕ ಒಪ್ಪಿಕೊಂಡಿದೆ.

19 ನೇ ವಯಸ್ಸಲ್ಲಿ ಬದಲಾವಣೆ:ಈ ಬಗ್ಗೆ ಮಾತನಾಡಿರುವ ಸುಭಿಕ್ಷಾ, ನಾನು ತಮಿಳುನಾಡಿನ ಮಧುರೈನಲ್ಲಿ ಜನಿಸಿದೆ. ಕತಾರ್​ನಲ್ಲಿ ಬೆಳೆದೆ. ಬಳಿಕ ಕೆನಡಾಕ್ಕೆ ತೆರಳಿದೆ. 19ನೇ ವಯಸ್ಸಿನಲ್ಲಿ ದೇಹದಲ್ಲಿ ಹಾರ್ಮೋನು ಬದಲಾವಣೆಯಾಗಿ ಗಂಡಸಿನಂತೆ ಜೀವಿಸಿದೆ. ಈ ಬದಲಾವಣೆಯನ್ನು ಹೆತ್ತವರಿಗೆ ಆರಂಭದಲ್ಲಿ ಒಪ್ಪಿಕೊಳ್ಳಲು ಸಾಧ್ಯವಾಗಲಿಲ್ಲ. ಕೌನ್ಸೆಲಿಂಗ್ ಮಾಡಿದ ನಂತರ ಅವರಿಗೆ ಅರ್ಥವಾಯಿತು. ಬಳಿಕ ನನ್ನನ್ನು ಅವರು ಇದ್ದ ಹಾಗೆಯೇ ಒಪ್ಪಿಕೊಂಡರು ಎಂದರು.

ಮಗಳ ಸಂತೋಷವೇ ಮುಖ್ಯ:ಸುಭಿಕ್ಷಾಳ ತಾಯಿ ಪೂರ್ಣಾ ಪುಷ್ಕಲಾ ಮಾತನಾಡಿ, ಸುಭಿಕ್ಷಾಳ ದೇಹದಲ್ಲಿ ಆಗಿರುವ ಬದಲಾವಣೆ ಕೇಳಿ ಆಘಾತವಾಯಿತು. ಭಾರತದಲ್ಲಿನ ನಮ್ಮ ಸಂಬಂಧಿಗಳು ಇದನ್ನು ಹೇಗೆ ಸ್ವೀಕರಿಸುತ್ತಾರೋ ಎಂಬ ಭಯ ಇತ್ತು. ಏನೇ ಆದರೂ ಮಗಳ ಸಂತೋಷವೇ ಮುಖ್ಯವಾದ ಕಾರಣ ಅವಳ ಇಚ್ಚೆಯಂತೆ ಮದುವೆಯಾಗಲು ಒಪ್ಪಿಗೆ ನೀಡಿದೆವು ಎಂದರು.

ಹೆಣ್ಣಾಗಿದ್ದರೂ ಗಂಡು ಬೇಡ:ಬಾಂಗ್ಲಾದೇಶದ ಟೀನಾ ದಾಸ್ ಮಾತನಾಡಿ, ಚಿಕ್ಕಂದಿನಿಂದಲೂ ಮಹಿಳೆಯರತ್ತ ಆಕರ್ಷಿತನಾಗಿದ್ದೆ. ನನಗೆ 19 ನೇ ವಯಸ್ಸಿನಲ್ಲಿ ಮದುವೆಯಾಯಿತು. ಆದರೆ, ನಾನು ಅವನೊಂದಿಗೆ ಇರಲು ಆಗಲಿಲ್ಲ. 4 ವರ್ಷಗಳಲ್ಲಿ ಪತಿಯೊಂದಿಗಿನ ಸಂಬಂಧ ಮುರಿದುಬಿತ್ತು. ಕುಟುಂಬವೂ ನನ್ನಿಂದ ದೂರವಾಯಿತು. ನಂತರ ನಾನು ಕೆನಡಾದಲ್ಲಿ ಸುಭಿಕ್ಷಾಳನ್ನು ಭೇಟಿಯಾದೆ. ಇದೀಗ ಮದುವೆಯಾಗಿದ್ದೇವೆ ಎಂದು ಹೇಳಿದ್ದಾರೆ.

ಓದಿ:ಈ ಗ್ರಾಮದ ಮೇಲೆ ಕೆಂಪಿರುವೆ ದಾಳಿ.. ಇದು ಹಾಲಿವುಡ್​ ಸಿನಿಮಾ ಕತೆಯಲ್ಲ!