ಮಲಪ್ಪುರಂ (ಕೇರಳ):ಖರೀದಿಸಿದ ಚಹಾದಲ್ಲಿ ಸಕ್ಕರೆಯ ಪ್ರಮಾಣ ಕಡಿಮೆ ಇತ್ತು ಎಂಬ ಕಾರಣಕ್ಕಾಗಿ ನಡೆದ ಗಲಾಟೆಯಲ್ಲಿ ಯುವಕನೊಬ್ಬ ಹೋಟೆಲ್ ಮಾಲೀಕನನ್ನು ಚಾಕುವಿನಿಂದ ಇರಿದ ಆಘಾತಕಾರಿ ಘಟನೆ ಕೇರಳದಲ್ಲಿ ಮಂಗಳವಾರ ನಡೆದಿದೆ. ಮಾಲೀಕ ತೀವ್ರ ಗಾಯಗೊಂಡಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ. ಮಲಪ್ಪುರಂ ಜಿಲ್ಲೆಯ ತನೂರ್‌ನಲ್ಲಿರುವ ಟಿಎ ಹೋಟೆಲ್ನಲ್ಲಿ ಪ್ರಕರಣ ಜರುಗಿದೆ.
ಆರೋಪಿ ಸುಬೈರ್ ಎಂಬಾತ ರೆಸ್ಟೋರೆಂಟ್ನಲ್ಲಿ ಚಹಾ ಖರೀದಿಸಿದ್ದಾನೆ. ಕುಡಿದಾಗ ಸಕ್ಕರೆ ಪ್ರಮಾಣ ಕಡಿಮೆ ಇದೆ ಎಂದು ವಾದಿಸಿದ್ದಾನೆ. ಹೋಟೆಲ್ ಮಾಲೀಕ ಕೂಡ ಇದಕ್ಕೆ ಜವಾಬು ನೀಡಿದ್ದಾನೆ. ಇಬ್ಬರ ಸ್ವಲ್ಪ ಸಮಯ ಕಿತ್ತಾಟ ನಡೆದಿದೆ.
ಈ ವೇಳೆ ಹೋಟೆಲ್ನಿಂದ ಹೊರಹೋದ ಸುಬೈರ್ ಮತ್ತೆ ವಾಪಸ್ ಬಂದು ಏಕಾಏಕಿ ಮಾಲೀಕ ಮನಾಫ್ ಮೇಲೆ ದಾಳಿ ಮಾಡಿ, ತನ್ನಲ್ಲಿದ್ದ ಚಾಕುವಿನಿಂದ ಇರಿದಿದ್ದಾನೆ. ಗಂಭೀರವಾಗಿ ಗಾಯಗೊಂಡಿರುವ ಮನಾಫ್ರನ್ನು ಕೋಯಿಕ್ಕೋಡ್ ವೈದ್ಯಕೀಯ ಕಾಲೇಜು ಆಸ್ಪತ್ರೆಗೆ ದಾಖಲಿಸಲಾಗಿದೆ. 'ದೇಹದಲ್ಲಿ ಹಲವು ಬಾರಿ ಚಾಕು ಹೊಕ್ಕಿದ್ದು, ಒಂದೆಡೆ ತೀವ್ರ ಸ್ವರೂಪದ ಗಾಯವಾಗಿದೆ' ಎಂದು ವೈದ್ಯರು ತಿಳಿಸಿದ್ದಾರೆ. ಘಟನೆಯ ಬಳಿಕ ಆರೋಪಿ ವಿರುದ್ಧ ಹೋಟೆಲ್ ಸಿಬ್ಬಂದಿ ದೂರು ನೀಡಿದ್ದು, ಸುಬೈರ್ನನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಘಟನೆ ಖಂಡಿಸಿ ವರ್ತಕರು ಹರತಾಳ ನಡೆಸಿದರು.
ಇದನ್ನೂ ಓದಿ:ಹತ್ಯೆ ಪ್ರಕರಣ: ಅಮಾನತಾಗಿರುವ ಬಿಜೆಪಿ ಮುಖಂಡನ ಹೋಟೆಲ್ ನೆಲಸಮ