ದೇವರ ನಾಡಲ್ಲಿ ಇತಿಹಾಸ ಸೃಷ್ಟಿಸುತ್ತಾ LDF? ಕಾಂಗ್ರೆಸ್​-ಬಿಜೆಪಿ ಕಥೆ ಏನಾಗುತ್ತೆ?

ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಅವರ ಸಂಪುಟದ 11 ಮಂದಿ ಸಹೋದ್ಯೋಗಿಗಳು, ಪ್ರತಿಪಕ್ಷದ ನಾಯಕ ರಮೇಶ್ ಚೆನ್ನಿಥಾಲಾ, ಬಿಜೆಪಿ ರಾಜ್ಯ ಮುಖ್ಯಸ್ಥ ಕೆ.ಸುರೇಂದ್ರನ್, ಕಾಂಗ್ರೆಸ್ ಹಿರಿಯ ಮುಖಂಡ ಉಮ್ಮನ್‌ ಚಾಂಡಿ, 'ಮೆಟ್ರೊಮನ್' ಇ.ಶ್ರೀಧರನ್,ಕೇಂದ್ರದ ಮಾಜಿ ಸಚಿವ ಕೆ.ಜೆ.ಅಲ್ಫೋನ್ಸ್ ಸೇರಿದಂತೆ ಒಟ್ಟು 957 ಅಭ್ಯರ್ಥಿಗಳು 140 ವಿಧಾನಸಭೆ ಸ್ಥಾನಗಳಿಗೆ ಸ್ಪರ್ಧಿಸಿದ ಪ್ರಮುಖರು.

ತಿರುವನಂತಪುರಂ:ದೇಶದಲ್ಲಿ ಮೊದಲಕೋವಿಡ್​ ಕೇಸ್​ ಪತ್ತೆಯಾದ ದೇವರ ನಾಡು ಕೇರಳದಲ್ಲಿ ಏಪ್ರಿಲ್ 6ರಂದು ಒಂದೇ ಹಂತದಲ್ಲಿ ವಿಧಾನಸಭಾ ಚುನಾವಣೆಗೆ ಮತದಾನ ನಡೆದಿತ್ತು. ಭಾನುವಾರ ಮತ ಎಣಿಕೆ ಮಾಡಲು ಅಧಿಕಾರಿಗಳು ಎಲ್ಲಾ ವ್ಯವಸ್ಥೆ ಮಾಡಿಕೊಂಡಿದ್ದು, ಕೆಲವೇ ಕ್ಷಣದಲ್ಲಿ ಮತ ಎಣಿಕೆ ಶುರುವಾಗಲಿದೆ.

ಒಂದು ಬಾರಿಗೆ ಒಂದೇ ಪಕ್ಷಕ್ಕೆ ಅಧಿಕಾರ ಕೊಡುವ ಕೇರಳಿಗರು

ಬಹುತೇಕ ಸಮೀಕ್ಷೆಗಳು ಆಡಳಿತಾರೂಢ ಎಡ ಪ್ರಜಾಸತ್ತಾತ್ಮಕ ಎಲ್‌ಡಿಎಫ್ ಮತ್ತೆ ಅಧಿಕಾರದ ಗದ್ದುಗೆ ಏರಲಿದೆ ಎಂದು ಭವಿಷ್ಯ ನುಡಿದಿವೆ. ಪ್ರತಿಪಕ್ಷ ಕಾಂಗ್ರೆಸ್ ನೇತೃತ್ವದ ಯುನೈಟೆಡ್ ಡೆಮಾಕ್ರಟಿಕ್ ಫ್ರಂಟ್ (ಯುಡಿಎಫ್) ತನ್ನ ಆಶಾವಾದ ಬಿಟ್ಟುಕೊಟ್ಟಿಲ್ಲ. ಎರಡು ಬಾರಿ ಮುಖ್ಯಮಂತ್ರಿಯಾದ 77 ವರ್ಷದ ಕಾಂಗ್ರೆಸ್​ನ ಉಮ್ಮನ್ ಚಾಂಡಿ ಅವರು ಪ್ರತಿ ಚುನಾವಣೆಯಂತೆ ಕೇರಳದ ಚುನಾವಣಾ ಇತಿಹಾಸವು ಹಾಗೆಯೇ ಉಳಿಯುತ್ತದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಕೇರಳಿಗರು ಒಂದು ಬಾರಿ ಒಂದೇ ಪಕ್ಷಕ್ಕೆ ಅಧಿಕಾರ ನೀಡುತ್ತಾ ಬಂದಿದ್ದಾರೆ. ಈ ಬಾರಿಯೂ ಅದೇ ಸೂತ್ರ ಮುಂದುವರಿಯಲಿದೆ ಎಂಬುದು ಪ್ರತಿಪಕ್ಷಗಳ ನಿರೀಕ್ಷೆ.

ಮ್ಯಾಜಿಕ್ ನಂಬರ್‌- 71

ಚುನಾವಣೆ ಪೂರ್ವ ಸಮೀಕ್ಷೆಯು ಎಡ ಮೈತ್ರಿಕೂಟವು 71 ರಿಂದ 77 ಸ್ಥಾನ ಗೆಲ್ಲಬಹುದೆಂದು ಊಹಿಸಿದ್ದರೆ, ಯುಡಿಎಫ್ 62 ರಿಂದ 68 ಸ್ಥಾನಗಳನ್ನು ಗಳಿಸುವ ಸಾಧ್ಯತೆಯಿದೆ ಎಂದಿವೆ. ಸರ್ಕಾರ ರಚನೆಗೆ ಬೇಕಾದ ಮ್ಯಾಜಿಕ್​ ನಂಬರ್​ 71. ಈ ಅಂಕಿ ಯಾರು ದಾಟುತ್ತಾರೆ ಎಂಬುದು ಇಂದು ಮಧ್ಯಾಹ್ನದ ವೇಳೆ ಗೊತ್ತಾಗಲಿದೆ.

ಎನ್‌ಡಿಎ ಕೇವಲ 0-2 ಸ್ಥಾನಗಳನ್ನು ಗಳಿಸುವ ಮೂಲಕ ದಕ್ಷಿಣ ರಾಜ್ಯದಲ್ಲಿ ಕನಿಷ್ಠ ಪ್ಲೇಯರ್​ ಆಗಿ ಮುಂದುವರಿಯಲಿದೆ. 2016ರ ವಿಧಾನಸಭಾ ಚುನಾವಣೆಯಲ್ಲಿ ಎಲ್‌ಡಿಎಫ್ 91 ಸ್ಥಾನಗಳು. ಯುಡಿಎಫ್ 47, ಎನ್‌ಡಿಎ ಹಾಗೂ ಸ್ವತಂತ್ರ ಅಭ್ಯರ್ಥಿ ತಲಾ ಸ್ಥಾನಗಳಲ್ಲಿ ಜಯ ದಾಖಲಿಸಿದ್ದರು.