ಕೇದಾರದ ಬಾಗಿಲು ತೆರೆದರೂ ದರ್ಶನಕ್ಕಿಲ್ಲ ಅವಕಾಶ: ಪ್ರಧಾನಿ ಮೋದಿ ಹೆಸರಲ್ಲಿ ಮೊದಲ ಪೂಜೆ

ವೈದಿಕ ಸ್ತೋತ್ರಗಳು ಮತ್ತು ಧಾರ್ಮಿಕ ಪೂಜೆ- ಪುನಸ್ಕಾರದ ಮುಖಾಂತರ ಉತ್ತರಾಖಂಡದ ಪವಿತ್ರ ಕೇದರನಾಥ ದೇವಾಲಯದ ಬಾಗಿಲು ತೆರೆಯಲಾಗಿದೆ. ಆದರೆ ಕೋವಿಡ್‌ ಮುನ್ನೆಚ್ಚರಿಕೆ ಕ್ರಮವಾಗಿ ಭಕ್ತರ ಪ್ರವೇಶ ನಿರ್ಬಂಧಿಸಲಾಗಿದೆ.

ಉತ್ತರಾಖಂಡ: ಕೊರೊನಾ ಸೋಂಕು ಭೀತಿಯಿಂದ ಪುರಾಣ ಪ್ರಸಿದ್ಧ ಹಿಂದೂಗಳ ಪವಿತ್ರ ದೇಗುಲ ಕೇದಾರನಾಥ ದೇವಾಲಯವನ್ನು ಮುಚ್ಚಲಾಗಿತ್ತು. ಆದರೆ ಇಂದು ಮುಂಜಾನೆ 5 ಗಂಟೆಗೆ ದೇವಾಲಯದ ಬಾಗಿಲು ತೆರೆಯಲಾಗಿದೆ. ಮುಂದಿನ 6 ತಿಂಗಳ ಕಾಲ ದೇವಸ್ಥಾನ ತೆರೆದಿದ್ದರೂ ಸಹ ಭಕ್ತರಿಗೆ ಪ್ರವೇಶಕ್ಕೆ ನಿರ್ಬಂಧವಿದೆ.

ವೈದಿಕ ಸ್ತೋತ್ರಗಳು ಮತ್ತು ಧಾರ್ಮಿಕ ಪೂಜೆ- ಪುನಸ್ಕಾರದ ಮುಖೇನ ದೇಗುಲದ ಬಾಗಿಲು ತೆರೆಯಲಾಗಿದೆ. ರಿಷಿಕೇಶದ ನಿವಾಸಿ ಸೌರಭ್ ಕಲ್ರಾ ಅವರ ಸಹಯೋಗದೊಂದಿಗೆ ಕೇದಾರ್​ನಾಥ ದೇವಾಲಯವನ್ನು 11 ಕ್ವಿಂಟಲ್ ಹೂವುಗಳಿಂದ ಆಕರ್ಷಕವಾಗಿ ಅಲಂಕರಿಸಲಾಗಿದೆ. ಈ ವೇಳೆ ಜಿಲ್ಲಾ ಮ್ಯಾಜಿಸ್ಟ್ರೇಟ್ ಮನುಜ್ ಗೋಯಲ್, ನಾಯಬ್ ತಹಶೀಲ್ದಾರ್ ಜಯಬೀರ್ ರಾಮ್ ಬಧಾನಿ ಉಪಸ್ಥಿತರಿದ್ದರು.

ಕೊರೊನಾ ಸೋಂಕಿನಿಂದಾಗಿ ಚಾರ್​ಧಾಮ್​ ಯಾತ್ರೆಯನ್ನು ಮುಂದೂಡಲಾಗಿತ್ತು. ಈ ಬಳಿಕ ಕೇದಾರನಾಥ ಭಗವಾನ್ ಚಾರಣವು ಈ ಬಾರಿಯೂ ಸರಳತೆಯಿಂದ ಪ್ರಾರಂಭವಾಗಿದೆ. ಈ ಸಮಯದಲ್ಲಿ, ಕೆಲವೇ ಕೆಲವು ಯಾತ್ರಿ ಪುರೋಹಿತರಿಗೆ ಮಾತ್ರ ಕೇದಾರನಾಥ ಧಾಮಕ್ಕೆ ಭೇಟಿ ನೀಡಲು ಅವಕಾಶ ನೀಡಲಾಗಿದೆ.

ಇನ್ನು ದೇವಾಲಯ ಇಂದು ತೆರೆದಿದ್ದ ಹಿನ್ನೆಲೆಯಲ್ಲಿ ಮುಖ್ಯಮಂತ್ರಿ ತಿರಥ್ ​​ಸಿಂಗ್ ರಾವತ್ ಅವರು, ಜನರು ತಮ್ಮ ತಮ್ಮ ಮನೆಗಳಲ್ಲಿ ಪೂಜೆ ಸಲ್ಲಿಸುವಂತೆ ಮನವಿ ಮಾಡಿದ್ದಾರೆ.

ಮೋದಿ ಹೆಸರಲ್ಲಿ ಮೊದಲ ಪೂಜೆ

ಬೆಳಿಗ್ಗೆ 5 ಗಂಟೆಗೆ ಬಾಗಿಲು ತೆರೆದ ನಂತರ ಪ್ರಧಾನಿ ನರೇಂದ್ರ ಮೋದಿಯವರ ಹೆಸರಿನಲ್ಲಿ ಮೊದಲ ಪೂಜೆಯನ್ನು ಮಾಡಲಾಯಿತು. ಗುಜರಾತ್‌ನ ಕೈಗಾರಿಕೋದ್ಯಮಿ ದೀಪಕ್ ರಾವತ್ ಅವರು, ದೀಪಾವಳಿ, ಶ್ರಾವಣ ಮತ್ತು ಬಾಗಿಲು ತೆರೆಯುವ ಸಂದರ್ಭದಲ್ಲಿ ಪ್ರತಿ ವರ್ಷ ಪ್ರಧಾನಿ ಮೋದಿ ಅವರ ಹೆಸರಿನಲ್ಲಿ ಪೂಜೆ ಸಲ್ಲಿಸುತ್ತಾರೆ. ಮೋದಿ ಅವರ ಹೆಸರಿನ ಪೂಜೆಗೆ 6,500 ರೂ.ಗಳ ರಶೀದಿಯನ್ನು ದೇವಸ್ಥಾನ ಮಂಡಳಿ ನೀಡುತ್ತದೆ.

ಕೇದಾರನಾಥ ಬಾಗಿಲು ತೆರೆಯುವ ಮೊದಲು ಮೇ 13 ರಂದು ಭೈರವನಾಥನನ್ನು ಪೂಜಿಸಲಾಯಿತು. ಬಾಬಾ ಕೇದಾರರ ದೇವತೆ ಡೋಲಿ ಉಖಿಮತ್‌ನಿಂದ ಹೊರಟು ಮೇ 14 ರಂದು ಫಾಟಾ ತಲುಪಿದೆ. ಈ ನಂತರ ಮೇ 15ರಂದು ಗೌರಿಕುಂಡ್ ಮತ್ತು ಮೇ 16 ರಂದು ಕೇದಾರನಾಥ ಧಾಮಕ್ಕೆ ತಲುಪಿದೆ.

ಮೇ.18ರಂದು ಬದ್ರಿನಾಥ ಧಾಮ ಓಪನ್​:

ಮೇ 18 ರಂದು ಬದ್ರಿನಾಥ್ ಧಾಮದ ಬಾಗಿಲು ತೆರೆಯಲಾಗುತ್ತಿದ್ದು, ಬೆಳಿಗ್ಗೆ 4: 15ಕ್ಕೆ ಧಾರ್ಮಿಕ ವಿಧಿ ವಿಧಾನಗಳೊಂದಿಗೆ ದೇವರ ದರ್ಶನವಾಗಲಿದೆ.