ವಧು-ವರನಿಗೋಸ್ಕರ ಬೆಳ್ಳಿ ಶೂ,ಬೆಲ್ಟ್​ & ಪರ್ಸ್: ಜೋಧಪುರ ವ್ಯಾಪಾರಿ ಆಭರಣಕ್ಕೆ ಇನ್ನಿಲ್ಲದ ಡಿಮ್ಯಾಂಡ್

ಅದ್ಧೂರಿ ಮದುವೆ ನಡೆಯಲು ಜೋಧಪುರ ಫೇಮಸ್​. ನಟ-ನಟಿಯರಿಂದ ಹಿಡಿದು ಕ್ರಿಕೆಟರ್ಸ್​, ರಾಜಕಾರಣಿಗಳು ಇಲ್ಲಿ ಮದುವೆ ಮಾಡಿಕೊಂಡಿರುವ ಉದಾಹರಣೆಗಳಿವೆ. ಇಂತಹ ಆಡಂಬರದ ಮದುವೆಗೋಸ್ಕರ ಜೋಧಪುರ ವ್ಯಾಪಾರಿ ವಿಶೇಷ ಆಭರಣಗಳನ್ನು ತಯಾರಿಸಿದ್ದಾರೆ.

ಜೋಧಪುರ(ರಾಜಸ್ಥಾನ):ದೇಶಾದ್ಯಂತ ಮಹಾಮಾರಿ ಕೊರೊನಾ ವೈರಸ್ ಹಾವಳಿ ಸಂಪೂರ್ಣವಾಗಿ ಕಡಿಮೆಯಾಗಿದ್ದು, ಇದರ ಬೆನ್ನಲ್ಲೇ ಮದುವೆ ಕಾರ್ಯಕ್ರಮಗಳು ಅದ್ಧೂರಿಯಾಗಿ ನಡೆಯಲು ಶುರುವಾಗಿವೆ.

ಪ್ರಮುಖವಾಗಿ, ರಾಜಸ್ಥಾನದ ಜೋಧಪುರದ ಆಭರಣ ಮಾರುಕಟ್ಟೆ ವ್ಯಾಪಾರಿಗಳಿಂದ ಗಿಜಿಗಿಡುತ್ತಿದ್ದು, ಮದುವೆ ಸೀಸನ್​​ ಆಗಿರುವ ಕಾರಣ ಪ್ರತಿದಿನ ಲಕ್ಷಾಂತರ ಜನರು ಇಲ್ಲಿಗೆ ಭೇಟಿ ನೀಡುತ್ತಿದ್ದಾರೆ. ಇದರ ಬೆನ್ನಲ್ಲೇ ಜೋಧಪುರದ ಆಭರಣ ಮಾರಾಟಗಾರೊಬ್ಬರು ವಧು-ವರರಿಗೆ ಆಕರ್ಷಕವಾದ ಬೆಳ್ಳಿಯ ಬೂಟು, ಪರ್ಸ್​ ಸಿದ್ಧಪಡಿಸಿದ್ದಾರೆ.

ರಾಜಸ್ಥಾನ ರಾಜಮನೆತನದ ಮದುವೆಗೆ ಪ್ರಸಿದ್ಧ ತಾಣ. ಈಗಾಗಲೇ ಬಾಲಿವುಡ್​ ನಟ ವಿಕ್ಕಿ ಕೌಶಲ್​ ಮತ್ತು ಕತ್ರಿನಾ ಕೈಫ್ ಮದುವೆಗೆ ಸಿದ್ಧತೆಗಳು ಅದ್ಧೂರಿಯಾಗಿ ಆರಂಭಗೊಂಡಿವೆ. ಜೈಪುರ, ಜೋಧಪುರ, ಉದಯಪುರ ಸೇರಿದಂತೆ ಅನೇಕ ನಗರಗಳಲ್ಲಿ ಅದ್ಧೂರಿ ವಿವಾಹ ಮಾಡಿಕೊಳ್ಳಲು ಸೆಲೆಬ್ರಿಟಿಗಳು ಇಲ್ಲಿಗೆ ಬರುತ್ತಾರೆ. ಅದನ್ನು ಗಮನದಲ್ಲಿಟ್ಟುಕೊಂಡು ಆಭರಣ ವ್ಯಾಪಾರಿ ವಧು-ವರರಿಗೆ ವಿವಿಧ ಬಗೆಯ ಬೆಳ್ಳಿಯ ವಸ್ತುಗಳನ್ನು ರೆಡಿ ಮಾಡುತ್ತಿದ್ದಾರೆ.

ಬೆಳ್ಳಿಯ ಶೂ, ಪರ್ಸ್​ ಮತ್ತು ಬೆಲ್ಟ್​​

ಆಭರಣ ವ್ಯಾಪಾರಿ ವಧು-ವರರಿಗೆ ತಯಾರಿಸಿದ ಬೆಳ್ಳಿ ಪಾದರಕ್ಷೆಗಳು, ಬೇರೆ ಬೇರೆ ವಿನ್ಯಾಸ ಹೊಂದಿವೆ. ಜೋಧಪುರ ಮೂಲದ ಆಭರಣ ವ್ಯಾಪಾರಿ ನವೀನ್​ ಸೋನಿ ಇವುಗಳನ್ನು ಸಿದ್ಧಪಡಿಸಿದ್ದಾರೆ. ಇದರ ಜೊತೆಗೆ ವಧುವಿಗೋಸ್ಕರ ವಿಶೇಷ ಪರ್ಸ್​​ ವಿನ್ಯಾಸ ಮಾಡಲಾಗಿದ್ದು, ಅದರಲ್ಲಿ ಮೊಬೈಲ್​ ಇಟ್ಟುಕೊಳ್ಳಬಹುದು. ಪುರುಷರಿಗಾಗಿ ಬೆಳ್ಳಿ ಕ್ಲಿಪ್​ ಇರುವ ಬೆಲ್ಟ್​​ ಇದೆ.

ಹೊಸದಾಗಿ ನಿರ್ಮಾಣಗೊಂಡಿರುವ ಈ ಬೆಳ್ಳಿ ಶೂ, ಪರ್ಸ್​​ ಗ್ರಾಹಕರಿಗೆ ತುಂಬಾ ಇಷ್ಟವಾಗಿದ್ದು, ಖರೀದಿ ಮಾಡಲು ಹೆಚ್ಚಿನ ಜನ ಇಷ್ಟಪಡುತ್ತಿದ್ದಾರೆಂದು ವ್ಯಾಪಾರಿ ನವೀನ್​ ಸೋನಿ ತಿಳಿಸಿದ್ದಾರೆ.

ಶೂಗಳಲ್ಲಿ 200 ಗ್ರಾಂ ಬೆಳ್ಳಿ, ಪರ್ಸ್​ಗಳಲ್ಲಿ 500 ಗ್ರಾಂ ಬೆಳ್ಳಿ

ವರನ ಶೂ ತಯಾರು ಮಾಡಲು 200ರಿಂದ 300 ಗ್ರಾಂ ಬೆಳ್ಳಿ ಬಳಕೆ ಮಾಡಲಾಗಿದ್ದು, ಪರ್ಸ್​​ಗಾಗಿ 300ರಿಂದ 500 ಗ್ರಾಂ ಬೆಳ್ಳಿ ಬಳಕೆಯಾಗಿದೆ. ಶೂಗಳ ಬೆಲೆ 16ರಿಂದ 17 ಸಾವಿರದವರೆಗೆ ಇದ್ದು, ಪರ್ಸ್​ ಬೆಲೆ 30 ಸಾವಿರ ಇದೆ.