ಮಲಾಡ್(ಮಹಾರಾಷ್ಟ್ರ):ದೇಶಾದ್ಯಂತ ಮಹಾಮಾರಿ ಕೊರೊನಾ ವೈರಸ್ನಿಂದ ಲಕ್ಷಾಂತರ ಕುಟುಂಬ ತೊಂದರೆಗೊಳಗಾಗಿದ್ದು, ಹೊತ್ತಿನ ಊಟ ಸಿಗದೇ ಪರದಾಡುವಂತಹ ಸ್ಥಿತಿ ನಿರ್ಮಾಣಗೊಂಡಿದೆ.
ಇದರ ಮಧ್ಯೆ ಅನೇಕರು ತಮ್ಮ ಕೈಲಾದ ಸಹಾಯ ಮಾಡ್ತಿದ್ದು, ಸದ್ಯ ಮಹಾರಾಷ್ಟ್ರದ ಮಲಾಡ್ ನಿರುದ್ಯೋಗ ದಂಪತಿಗಳು ಸಾವಿರಾರು ಜನರಿಗೆ ಆಹಾರ ನೀಡುತ್ತಿದ್ದಾರೆ.
ಫಯಾಜ್ ಶೇಖ್ ಮತ್ತು ಅವರ ಪತ್ನಿ ಮಿಜ್ಗಾ ಸಾವಿರಾರು ಬಡ ಜನರಿಗೆ ಆಹಾರ ನೀಡುತ್ತಿದ್ದಾರೆ. ಕೋವಿಡ್ ಕಾರಣ ಫಯಾಜ್ ಅವರನ್ನ ಕೆಲಸದಿಂದ ವಜಾ ಮಾಡಲಾಗಿದೆ. ಇದರ ಮಧ್ಯೆ ಅವರು ಭವಿಷ್ಯ ನಿಧಿ ಹಾಗೂ ಗ್ರ್ಯಾಚುಟಿ ಹಣ ಬಳಸಿಕೊಂಡು ಈ ಕಾರ್ಯ ನಡೆಸುತ್ತಿದ್ದಾರೆ.
ಪ್ರತಿ ದಿನ 2 ಸಾವಿರಕ್ಕೂ ಅಧಿಕ ಜನರಿಗೆ ಈ ದಂಪತಿ ಉಚಿತ ಆಹಾರ ನೀಡುತ್ತಿದೆ. ವಲಸೆ ಕಾರ್ಮಿಕರು ಹೆಚ್ಚಾಗಿ ವಾಸ ಮಾಡಿರುವ ಮಲಾಡ್ನ ಅಂಬೋಜ್ವಾಡಿ ಪ್ರದೇಶದಲ್ಲಿ ಉಚಿತವಾಗಿ ಆಹಾರ ವಿತರಿಸುತ್ತಿದ್ದಾರೆ. ಸಮುದಾಯ ಅಡಿಗೆ ಮಾಡುವ ಮೂಲಕ ಅನೇಕ ಮಹಿಳೆಯರಿಗೆ ಉದ್ಯೋಗ ಸಹ ನೀಡಿದ್ದಾರೆ.
ಇದನ್ನೂ ಓದಿ: ದೇಶದಲ್ಲಿ ಕೋವಿಡ್ ಪಾಸಿಟಿವ್ ರೇಟ್ ಶೇ.19.8ಕ್ಕೆ ಕುಸಿತ: ಕೇಂದ್ರ ಸರ್ಕಾರ
ಫಯಾಜ್ ಪ್ರಸಿದ್ಧ ಸುಗಂದ ದ್ರವ್ಯ ತಯಾರಿಕೆ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದರು. ಆದರೆ, ಈ ವರ್ಷದ ಆರಂಭದಲ್ಲೇ ಅವರನ್ನ ವಜಾಗೊಳಿಸಲಾಯಿತು. ಈ ವೇಳೆ ಮನೆ ನಿರ್ಮಿಸಲು ಬಳಸಿಕೊಳ್ಳಲು ನಿರ್ಧರಿಸಿದ್ದ ಭವಿಷ್ಯ ನಿಧಿಯ 5 ಲಕ್ಷ ರೂ ಆಹಾರ ವಿತರಣೆಗೆ ಬಳಕೆ ಮಾಡ್ತಿದ್ದು, ಅವರು ನಡೆಸುತ್ತಿರುವ ಶಾಲೆಯ ಶುಲ್ಕ ಸಹ ಸಂಪೂರ್ಣವಾಗಿ ಮನ್ನಾ ಮಾಡಿದ್ದಾರೆ. ಅಲ್ಲಿ ಸೇವೆ ಸಲ್ಲಿಸುತ್ತಿರುವ ಶಿಕ್ಷಕರಿಗೆ ತಮ್ಮ ಗ್ರ್ಯಾಚುಟಿ ಫಂಡ್ನಿಂದ ಸ್ಯಾಲರಿ ನೀಡ್ತಿದ್ದಾರೆ.
