ಭಾರತದಲ್ಲಿ 42 ಬಿಲಿಯನ್ ಡಾಲರ್ ಹೂಡಿಕೆಗೆ ಜಪಾನ್​ ಸಜ್ಜು.. ಮೋದಿ-ಜಪಾನ್ ಪಿಎಂ ಭೇಟಿ ವೇಳೆ ಒಪ್ಪಂದ

ಇಂದಿನಿಂದ ಭಾರತ-ಜಪಾನ್​​ ಎರಡು ದಿನಗಳ ಶೃಂಗಸಭೆಯಲ್ಲಿ ಭಾಗಿಯಾಗಲಿದ್ದು, ಈ ವೇಳೆ ಜಪಾನ್ ಪ್ರಧಾನಿ ಭಾರತದಲ್ಲಿ ಸಾವಿರಾರು ಕೋಟಿ ರೂ. ಹೂಡಿಕೆ ಒಪ್ಪಂದಕ್ಕೆ ಸಹಿ ಹಾಕುವ ಸಾಧ್ಯತೆ ಇದೆ.

ಮುಂಬೈ(ಮಹಾರಾಷ್ಟ್ರ): ಜಪಾನ್ ಪ್ರಧಾನಿ ಫ್ಯೂಮಿಯೊ ಕಿಶಿಡಾ ಹಾಗೂ ಪ್ರಧಾನಿ ನರೇಂದ್ರ ಮೋದಿ ಇಂದು ಭೇಟಿಯಾಗುತ್ತಿದ್ದು, ಈ ವೇಳೆ ಭಾರತದಲ್ಲಿ ಹೂಡಿಕೆ ಮಾಡುವ ಉದ್ದೇಶದಿಂದ ಜಪಾನ್​​​ 42 ಬಿಲಿಯನ್ ಡಾಲರ್​ ಒಪ್ಪಂದಕ್ಕೆ ಸಹಿ ಹಾಕುವ ಸಾಧ್ಯತೆ ಇದೆ. ಮುಂದಿನ ಐದು ವರ್ಷಗಳ ಯೋಜನೆಗೋಸ್ಕರ ಈ ಒಪ್ಪಂದ ಏರ್ಪಡಲಿದೆ ಎಂದು ತಿಳಿದುಬಂದಿದೆ.

ಜಪಾನ್ ಪ್ರಧಾನಿ 14ನೇ ಭಾರತ-ಜಪಾನ್​​ ಶೃಂಗಸಭೆಯಲ್ಲಿ ಭಾಗಿಯಾಗಲಿದ್ದು, ಇದರ ಬೆನ್ನಲ್ಲೇ ಪ್ರಧಾನಿ ನರೇಂದ್ರ ಮೋದಿ ಅವರನ್ನ ಭೇಟಿ ಮಾಡಿ ಚರ್ಚೆ ನಡೆಸಲಿದ್ದಾರೆ. ಈ ವೇಳೆ ಉಕ್ರೇನ್​ ಬಿಕ್ಕಟ್ಟು, ಭಾರತದಲ್ಲಿನ ಹೂಡಿಕೆ ಸೇರಿದಂತೆ ಅನೇಕ ವಿಷಯಗಳ ಬಗ್ಗೆ ಚರ್ಚೆ ನಡೆಯಲಿದೆ.

ಇದನ್ನೂ ಓದಿ:ಉಕ್ರೇನ್​​ ಪ್ರಾದೇಶಿಕ ಸಮಗ್ರತೆಯನ್ನು ಕಾಪಾಡಿ, ನ್ಯಾಯ ಒದಗಿಸುವ ಸಮಯ ಬಂದಿದೆ: ಝೆಲೆನ್ಸ್ಕಿ

ಈ ಹಿಂದೆ ಭಾರತ-ಜಪಾನ್​ ನಡುವಿನ ಶೃಂಗಸಭೆ 2018ರಲ್ಲಿ ಟೋಕಿಯೋದಲ್ಲಿ ನಡೆದಿತ್ತು. ಈ ವೇಳೆ ಅಂದಿನ ಪ್ರಧಾನಿ ಶಿಂಜೋ ಭಾರತದಲ್ಲಿ 3.5 ಟ್ರಿಲಿಯನ್​​ ಯೆನ್ ಹೂಡಿಕೆ ಮಾಡುವುದಾಗಿ ಘೋಷಣೆ ಮಾಡಿದ್ದರು. ಜಪಾನ್​​ನಲ್ಲಿ ಜಾರಿಯಲ್ಲಿರುವ ಬುಲೆಟ್​ ಟ್ರೈನ್​​ ತಂತ್ರಜ್ಞಾನ ಆಧರಿಸಿ ಭಾರತದಲ್ಲಿ ಹೈಸ್ಪೀಡ್​​ ರೈಲ್ವೆ ಕಾಮಕಾರಿ ನಡೆಯುತ್ತಿದ್ದು, ಇದೀಗ ಮತ್ತಷ್ಟು ಮೂಲಸೌಕರ್ಯಗಳ ಮೇಲೆ ಹೂಡಿಕೆ ಮಾಡುವ ಸಾಧ್ಯತೆ ದಟ್ಟವಾಗಿದೆ.