ನಿವೃತ್ತ ಪೊಲೀಸ್ ಅಧಿಕಾರಿಗೆ ಕರ್ತವ್ಯಲೋಪ ಕೇಸಲ್ಲಿ "ಹಿಂಬಡ್ತಿ" ಶಿಕ್ಷೆ!

ಜಮ್ಮು ಕಾಶ್ಮೀರದ ಪೊಲೀಸ್​ ಅಧಿಕಾರಿಗೆ ಕರ್ತವ್ಯಲೋಪದ ಪ್ರಕರಣದಲ್ಲಿ ಹಿಂಬಡ್ತಿ ಶಿಕ್ಷೆ ನೀಡಿ ಗೃಹ ಇಲಾಖೆ ಆದೇಶ ಮಾಡಿದೆ. ವಿಚಿತ್ರ ಅಂದರೆ ಆ ಅಧಿಕಾರಿ ಸೇವೆಯಿಂದಲೇ ನಿವೃತ್ತಿ ಹೊಂದಿದ್ದಾರೆ.

ಶ್ರೀನಗರ(ಜಮ್ಮು ಮತ್ತು ಕಾಶ್ಮೀರ):ದೇಶದಲ್ಲಿ ನ್ಯಾಯದಾನ ವಿಳಂಬವಾಗುತ್ತಿದೆ ಎಂಬ ಆರೋಪದ ಮಧ್ಯೆಯೇ ಇದಕ್ಕೆ ಇಂಬು ನೀಡುವಂತೆ ಹಲವು ಪ್ರಕರಣಗಳು ಬೆಳಕಿಗೆ ಬರುತ್ತಿವೆ. ಪೊಲೀಸ್​ ಅಧಿಕಾರಿಯೊಬ್ಬರ ನಿವೃತ್ತಿಯ ಬಳಿಕ ಕರ್ತವ್ಯಲೋಪ ಪ್ರಕರಣದಲ್ಲಿ ಆತನಿಗೆ "ಹಿಂಬಡ್ತಿ" ನೀಡಿದ ವಿದ್ಯಮಾನ ಜಮ್ಮು ಕಾಶ್ಮೀರದಲ್ಲಿ ನಡೆದಿದೆ. ಪೊಲೀಸ್​ ಅಧಿಕಾರಿಯ ಮೇಲೆ ಕೈಗೊಳ್ಳಲಾದ ಕ್ರಮದ ಆದೇಶ ಹೊರಡಿಸಿದೆ.

ಸರೋವರ ಸಂರಕ್ಷಣೆ ಮತ್ತು ನಿರ್ವಹಣಾ ಪ್ರಾಧಿಕಾರದ (ಎಲ್‌ಸಿಎಂಎ) ಡಿವೈಎಸ್​ಪಿ ಆಗಿದ್ದ ಅಧಿಕಾರಿಯನ್ನು ಈಗ ಇನ್​ಸ್ಪೆಕ್ಟರ್​ ಆಗಿ ಹಿಂಬಡ್ತಿ ನೀಡಲಾಗಿದೆ. ಅವರ ಅಧಿಕಾರವಧಿಯಲ್ಲಿ ಕಟ್ಟಡ ಯೋಜನೆಯ ನಿಯಮಗಳು ಉಲ್ಲಂಘನೆಯಾಗಿವೆ ಎಂದು ಅವರ ವಿರುದ್ಧ ದಾಖಲಾದ ಪ್ರಕರಣದ ತನಿಖೆಯಿಂದ ತಿಳಿದು ಬಂದಿದೆ. ಸರೋವರಗಳು ಮತ್ತು ಜಲಮಾರ್ಗಗಳ ಅಭಿವೃದ್ಧಿ ಪ್ರಾಧಿಕಾರವನ್ನು ಈಗ ಲೇಕ್ ಕನ್ಸರ್ವೇಶನ್ ಅಂಡ್ ಮ್ಯಾನೇಜ್ಮೆಂಟ್ ಅಥಾರಿಟಿ (LCMA) ಎಂದು ಮರುನಾಮಕರಣ ಮಾಡಲಾಗಿದೆ.

ಗೃಹ ಇಲಾಖೆಯು ನಿವೃತ್ತ ಪ್ರಭಾರಿ ಡಿವೈಎಸ್​ಪಿ ಆಗಿದ್ದ ಶಾ ಸಿಕಂದರ್ ಅವರನ್ನು ಬಡ್ತಿ ನೇಮಕಾತಿ ದಿನದಿಂದ ಜಾರಿಯಾಗುವಂತೆ ಹಿಂಬಡ್ತಿ ಶಿಕ್ಷೆ ಮತ್ತು ದಂಡವನ್ನು ವಿಧಿಸಿ ಆದೇಶಿಸಿದೆ. ಅಂದಿನ ಸರೋವರ ಮತ್ತು ಜಲಮಾರ್ಗ ಅಭಿವೃದ್ಧಿ ಪ್ರಾಧಿಕಾರದ ಅಧಿಕಾರಿಯಾಗಿದ್ದ ಸಿಕಂದರ್ ಅವರ ಮೇಲೆ ದಾಲ್ ಸರೋವರದ ಪ್ರದೇಶಗಳಲ್ಲಿ ಅಕ್ರಮವಾಗಿ ಕಟ್ಟಡ ನಿರ್ಮಾಣಕ್ಕೆ ಅವಕಾಶ ಮಾಡಿಕೊಟ್ಟ ಆರೋಪವಿತ್ತು. ಅದರಂತೆ ಅವರ ವಿರುದ್ಧ 2015 ರಲ್ಲಿ ಕರ್ತವ್ಯ ಲೋಕ ಪ್ರಕರಣ ದಾಖಲಿಸಲಾಗಿತ್ತು.

ವಿಚಾರಣೆ ನಡೆಸಿದ ಪೊಲೀಸ್​ ಇಲಾಖೆ ಮಾರ್ಚ್ 14, 2017 ರಂದು ಅಧಿಕಾರಿ ಸಿಕಂದರ್​ ಅವರನ್ನು ಬಂಧಿಸಿತ್ತು. 21 ದಿನಗಳ ನ್ಯಾಯಾಂಗ ಬಂಧನದ ವೇಳೆ ಲಿಖಿತ ಹೇಳಿಕೆ ಪಡೆದು ಅವರ ವಿರುದ್ಧ ಚಾರ್ಜ್ ಶೀಟ್ ಸಲ್ಲಿಸಲಾಗಿತ್ತು. ವಿಚಾರಣೆಯ ವೇಳೆ ಎಲ್ಲ ಆರೋಪಗಳನ್ನು ಅವರು ನಿರಾಕರಿಸಿದ್ದರು.

ತನಿಖಾಧಿಕಾರಿ ನೇಮಕ:ಅಧಿಕಾರಿಯ ವಿರುದ್ಧ ಕೇಳಿಬಂದ ಆರೋಪಗಳ ತನಿಖೆಗಾಗಿ ಸರ್ಕಾರ 2018 ರಲ್ಲಿ ತನಿಖಾಧಿಕಾರಿಯನ್ನು ನೇಮಿಸಿತ್ತು. 5 ವರ್ಷಗಳ ತನಿಖೆಯಲ್ಲಿ ಇದೀಗ ವರದಿ ನೀಡಲಾಗಿದೆ. ದಾಲ್​ ಸರೋವರ ಪ್ರದೇಶದಲ್ಲಿ ಅಧಿಕಾರಿ ಅಕ್ರಮವಾಗಿ ಕಟ್ಟಡ ನಿರ್ಮಾಣಕ್ಕೆ ಅವಕಾಶ ಮಾಡಿಕೊಟ್ಟಿದ್ದು ಸಾಬೀತಾಗಿದೆ.

ಆರೋಪಿತ ಅಧಿಕಾರಿ ನಿವೃತ್ತಿ:ತಮ್ಮ ವಿರುದ್ಧದ ಕೇಸ್​ ತನಿಖೆಯಲ್ಲಿದ್ದಾಗಲೇ ಅಧಿಕಾರಿ ಸಿಕಂದರ್ ಸೇವೆಯಿಂದಲೇ ನಿವೃತ್ತರಾಗಿದ್ದಾರೆ. ಇದೀಗ ಅವರ ವಿರುದ್ಧ ತನಿಖಾ ವರದಿ ಸಲ್ಲಿಸಲಾಗಿದೆ. ಹೀಗಾಗಿ ಅಧಿಕಾರಿಗೆ ಸೇವಾವಧಿಯಲ್ಲಿ ನೀಡಲಾಗಿದ್ದ ಬಡ್ತಿಯನ್ನು ಹಿಂಪಡೆಯಲಾಗಿದೆ. ಸರ್ಕಾರಿ ನೌಕರರ ನಿಯಮಗಳು-1971 ಕಾಯ್ದೆ ಉಲ್ಲಂಘನೆಯಾಗಿವೆ ಎಂದು ಗೃಹ ಇಲಾಖೆ ಆದೇಶ ತಿಳಿಸಿದೆ.

ಕೇರಳ ಪೊಲೀಸ್​ ಅಧಿಕಾರಿ ಅಮಾನತು:ಕೇರಳದ ಇಡುಕ್ಕಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ವೇಳೆ ದೇವಸ್ಥಾನದ ಉತ್ಸವದಲ್ಲಿ ಹಾಡಿಗೆ ನೃತ್ಯ ಮಾಡಿದ್ದಕ್ಕಾಗಿ ಕೇರಳ ಪೊಲೀಸ್ ಅಧಿಕಾರಿಯನ್ನು ಅಮಾನತುಗೊಳಿಸಲಾಗಿದೆ. ದೇವಸ್ಥಾನದ ಹೊರಗೆ ಪೊಲೀಸ್​ ಅಧಿಕಾರಿ ಡ್ಯಾನ್ಸ್ ಮಾಡುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಇಡುಕ್ಕಿಯ ಪೂಪ್ಪಾರ ಎಂಬಲ್ಲಿ ಮಾರಿಯಮ್ಮ ದೇವಸ್ಥಾನದ ಉತ್ಸವ ನಡೆಸಲಾಗುತ್ತಿತ್ತು. ಉತ್ಸವದಲ್ಲಿ ಸಬ್​ಇನ್ಸ್​ಪೆಕ್ಟರ್ ಕೆಪಿ ಶಾಜಿ ಎಂಬಾತ ದೈವ ದೇಹದಲ್ಲಿ ಹೊಕ್ಕಂತೆ ನೃತ್ಯ ಮಾಡಿದ್ದ.

ಇದನ್ನೂ ಓದಿ:ಶ್ರೀನಗರ - ಲೇಹ್ ಹೆದ್ದಾರಿಯಲ್ಲಿ Z-ಮೋರ್ಹ್ ಸುರಂಗ ಮಾರ್ಗ ಪರಿಶೀಲಿಸಿದ ಕೇಂದ್ರ ಸಚಿವ ಗಡ್ಕರಿ..