ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿಯವರ ವ್ಯಕ್ತಿತ್ವ ಮತ್ತು ಅವರ ಪ್ರಬಲ ನಾಯಕತ್ವದ ಕಾರ್ಯಶೈಲಿಯನ್ನು ರಾಜಕೀಯ ವಲಯದಲ್ಲಿ ಆಗಾಗ್ಗೆ ಮಾಜಿ ಪ್ರಧಾನಿ ದಿವಂಗತ ಇಂದಿರಾ ಗಾಂಧಿ ಅವರೊಂದಿಗೆ ಹೋಲಿಸಲಾಗುತ್ತದೆ. ಆದರೆ, ವಾಸ್ತವದಲ್ಲಿ ಇಬ್ಬರ ಕಾರ್ಯವೈಖರಿಗಳನ್ನು ಹೋಲಿಸಲು ಸಾಧ್ಯವಿಲ್ಲ ಎಂದು ಪಕ್ಷದ ನಾಯಕರು ಶುಕ್ರವಾರ ಹೇಳಿದ್ದಾರೆ.
2014 ರಲ್ಲಿ ಪ್ರಧಾನಿಯಾದ ಮೋದಿ, 2019 ರಲ್ಲಿ ಮತ್ತೊಮ್ಮೆ ಭಾರತೀಯ ಜನತಾ ಪಕ್ಷವನ್ನು (ಬಿಜೆಪಿ) ಗೆಲುವಿನತ್ತ ಮುನ್ನಡೆಸಿದರು. ಪ್ರಸ್ತುತ ಇನ್ನು ಕೆಲವೇ ತಿಂಗಳುಗಳಲ್ಲಿ 2024 ರ ಸಾರ್ವತ್ರಿಕ ಚುನಾವಣೆಯಲ್ಲೂ ಅವರೇ ಬಿಜೆಪಿಯ ನೇತೃತ್ವ ವಹಿಸಲಿದ್ದಾರೆ. ಇಂದಿರಾ ಗಾಂಧಿ ಮತ್ತು ಮೋದಿ ಅವರ ನಡುವೆ ಇರುವ ಹೋಲಿಕೆಗಳೇನು ಎಂಬ ಬಗ್ಗೆ 2014 ರಿಂದಲೇ ಚರ್ಚೆಗಳು ನಡೆದಿವೆ. ಆದರೆ, ಈಗ ಭಾರತವು ಜಿ 20 ಶೃಂಗಸಭೆಯ ಆತಿಥ್ಯ ವಹಿಸಲು ತಯಾರಿ ನಡೆಸುತ್ತಿರುವಾಗ ಈ ಚರ್ಚೆ ಮತ್ತೆ ಮುನ್ನೆಲೆಗೆ ಬಂದಿದೆ.
ವಿಶ್ವ ಸಂಸ್ಥೆಯ ಆವರ್ತಕ ವ್ಯವಸ್ಥೆಯ ಪ್ರಕಾರ ಜಿ 20 ಅಧ್ಯಕ್ಷ ಸ್ಥಾನವು ಭಾರತಕ್ಕೆ ಸಿಕ್ಕಿದೆ ಎಂದು ಕಳೆದ ವಾರಗಳಿಂದ ಕಾಂಗ್ರೆಸ್ ಪ್ರತಿಪಾದಿಸುತ್ತಿದೆ. ಆದರೆ, ಪ್ರಧಾನಿ ಮೋದಿಯವರನ್ನು 'ಜಾಗತಿಕ ನಾಯಕ' ಎಂದು ಬಿಂಬಿಸಲು ಕೇಂದ್ರ ಸರ್ಕಾರವು ಈ ಕಾರ್ಯಕ್ರಮದ ಸುತ್ತಲೂ ಪ್ರಚಾರವನ್ನು ಸೃಷ್ಟಿಸುತ್ತಿದೆ. ಪ್ರಧಾನಿ ಮೋದಿ ಅವರ ವಿರುದ್ಧ ವಾಗ್ದಾಳಿ ನಡೆಸಲು 1983ರಲ್ಲಿ ಆಗಿನ ಪ್ರಧಾನಿ ಇಂದಿರಾ ಗಾಂಧಿ ನೇತೃತ್ವದಲ್ಲಿ ನವದೆಹಲಿಯಲ್ಲಿ ನಡೆದ ಅಲಿಪ್ತ ಚಳವಳಿ (ನಾಮ್) ಶೃಂಗಸಭೆಯನ್ನು ಕಾಂಗ್ರೆಸ್ ಉಲ್ಲೇಖಿಸುತ್ತಿದೆ.
ಕಾಂಗ್ರೆಸ್ ಪ್ರಕಾರ, 1983 ರಲ್ಲಿ ಇಂದಿರಾ ಗಾಂಧಿ ಅವರು ನಾಮ್ ಶೃಂಗಸಭೆಗೆ ಸುಮಾರು 140 ದೇಶಗಳ ನಿಯೋಗಗಳಿಗೆ ಆತಿಥ್ಯ ನೀಡಿದ್ದರು ಮತ್ತು ಈ ಕಾರ್ಯಕ್ರಮವು ಕಡಿಮೆ ವಿವಾದಾತ್ಮಕವಾಗಿದ್ದು, ರಚನಾತ್ಮಕವಾಗಿತ್ತು. ಇದರ ನಂತರ ಭಾರತವು ಅಭಿವೃದ್ಧಿ ಹೊಂದಿದ ವಿಶ್ವದ ಪ್ರಮುಖ ಧ್ವನಿಯಾಗಿ ಹೊರಹೊಮ್ಮಿತು ಮತ್ತು ಜಾಗತಿಕ ವೇದಿಕೆಯಲ್ಲಿ ಭಾರತದ ಸ್ಥಾನಮಾನ ಹೆಚ್ಚಾಯಿತು ಎಂಬುದು ಕಾಂಗ್ರೆಸ್ ವಾದವಾಗಿದೆ.
ವೈಫಲ್ಯಗಳನ್ನು ಮುಚ್ಚಿಡಲು ಜಿ-20 ಬಳಕೆ- ಕಾಂಗ್ರೆಸ್ ಆರೋಪ:ಜಿ 20 ಶೃಂಗಸಭೆ ಆರಂಭವಾಗುವ ಮುನ್ನ ನರೇಂದ್ರ ಮೋದಿ ಸರ್ಕಾರವು ತನ್ನ ಚುನಾವಣಾ ಪ್ರಚಾರದಲ್ಲಿ ನಿರತವಾಗಿದೆ ಮತ್ತು ಭಾರತೀಯ ಜನತಾ ಪಕ್ಷದ ವೈಫಲ್ಯಗಳನ್ನು ಮರೆಮಾಚಲು ಪ್ರಧಾನಿ ಈ ಕಾರ್ಯಕ್ರಮವನ್ನು ಬಳಸುತ್ತಿದ್ದಾರೆ ಎಂದು ಕಾಂಗ್ರೆಸ್ ಹೇಳಿದೆ. ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಮತ್ತು ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಸಮಾವೇಶಕ್ಕೆ ಗೈರು ಹಾಜರಾಗಿದ್ದನ್ನು ಎತ್ತಿ ತೋರಿಸಿರುವ ಕಾಂಗ್ರೆಸ್, ಜಿ20 ನೆಪದಲ್ಲಿ ಪ್ರಚಾರ ಮತ್ತು ಜಾಹೀರಾತುಗಳಿಗಾಗಿ ಕೋಟಿಗಟ್ಟಲೆ ಖರ್ಚು ಮಾಡಲಾಗುತ್ತಿದೆ ಎಂದು ಹೇಳಿದೆ.
ಇಬ್ಬರದ್ದೂ ವಿಭಿನ್ನ ವ್ಯಕ್ತಿತ್ವ- ಅಗರ್ವಾಲ್:ದೆಹಲಿಯ ಮಾಜಿ ಸಂಸದ ಜೆ.ಪಿ.ಅಗರ್ವಾಲ್ ಅವರ ಪ್ರಕಾರ, ಇಬ್ಬರೂ ಪ್ರಧಾನ ಮಂತ್ರಿಗಳು ಸಂಪೂರ್ಣವಾಗಿ ವಿಭಿನ್ನ ವ್ಯಕ್ತಿತ್ವದವರಾಗಿದ್ದಾರೆ ಮತ್ತು ವಿಭಿನ್ನ ನಾಯಕರೂ ಆಗಿದ್ದಾರೆ. "ಜನರ ಪರವಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುವಲ್ಲಿ ಇಂದಿರಾಜಿ ಪ್ರಬಲರಾಗಿದ್ದರು. ಅವರು ರಾಜಮನೆತನಗಳ ಸೌಕರ್ಯಗಳನ್ನು ನಿಷೇಧಿಸಿದರು, ಬ್ಯಾಂಕುಗಳನ್ನು ರಾಷ್ಟ್ರೀಕರಣಗೊಳಿಸಿದರು ಮತ್ತು ಜನರಿಗಾಗಿ ಬ್ಯಾಂಕುಗಳನ್ನು ತೆರೆದರು. 1971 ರಲ್ಲಿ ಬಾಂಗ್ಲಾದೇಶವನ್ನು ರಚಿಸಿದ ನಂತರ ಅವರನ್ನು ಉಕ್ಕಿನ ಮಹಿಳೆ ಎಂದು ಕರೆಯಲಾಯಿತು" ಎಂದು ಅಗರ್ವಾಲ್ ಈಟಿವಿ ಭಾರತ್ಗೆ ತಿಳಿಸಿದರು.
"ಅವರ ಅವಧಿಯಲ್ಲಿ, ಆಡಳಿತದಲ್ಲಿ ಮಂತ್ರಿಗಳ ಪಾತ್ರವಿತ್ತು. ಈಗ ಎಲ್ಲವನ್ನೂ ಪ್ರಧಾನಿ ಕಚೇರಿಯೇ (ಪಿಎಂಒ) ನಿರ್ಧರಿಸುತ್ತದೆ. ಇಂದಿರಾಜಿಯವರು ಎಂದಿಗೂ ನ್ಯಾಯಾಂಗದಲ್ಲಿ ಹಸ್ತಕ್ಷೇಪ ಮಾಡಲಿಲ್ಲ. ಹಾಗೆ ಮಾಡಿದ್ದರೆ ಅವರು ತಮ್ಮ ಚುನಾವಣಾ ಅರ್ಜಿಯ ಪ್ರಕರಣದಲ್ಲಿ ಸೋಲುತ್ತಿರಲಿಲ್ಲ. ಜೊತೆಗೆ, ಅವರು ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಮಾತನಾಡುವಲ್ಲಿ ಮಾಸ್ಟರ್ ಆಗಿದ್ದರು" ಎಂದು ಅವರು ಹೇಳಿದರು.
ಇಂದಿರಾ ಅವರದ್ದು ಜನ್ ಕಿ ಬಾತ್.. ಮೋದಿ ಅವರದ್ದು ಮನ್ ಕಿ ಬಾತ್:ರಾಜಕಾರಣಿಗಳಾಗಿ ಇಂದಿರಾ ಗಾಂಧಿ ಮತ್ತು ನರೇಂದ್ರ ಮೋದಿಯವರನ್ನು ಹೋಲಿಸಿದ ಅಖಿಲ ಭಾರತ ಕಾಂಗ್ರೆಸ್ ಸಮಿತಿ (ಎಐಸಿಸಿ) ಕಾರ್ಯಕರ್ತ ಅಭಿಷೇಕ್ ದತ್, "ಇಬ್ಬರೂ ನಾಯಕರನ್ನು ಯಾವುದಾದರೂ ರೀತಿಯಲ್ಲಿ ಹೋಲಿಸಲು ಸಾಧ್ಯವಿದೆ ಎಂದು ನಾನು ಭಾವಿಸುವುದಿಲ್ಲ. ಇಂದಿರಾಜಿ ಯಾವಾಗಲೂ 'ಜನ್ ಕಿ ಬಾತ್' ಮಾಡುತ್ತಿದ್ದರೆ, ಮೋದಿಜಿ 'ಮನ್ ಕಿ ಬಾತ್' ಮಾತ್ರ ಮಾಡುತ್ತಿದ್ದಾರೆ. ಇಂದಿರಾಜಿ ನಿಯಮಿತವಾಗಿ ಮಾಧ್ಯಮಗಳನ್ನು ಉದ್ದೇಶಿಸಿ ಮಾತನಾಡುತ್ತಿದ್ದರು ಮತ್ತು ಪ್ರಶ್ನೆಗಳನ್ನು ಎದುರಿಸುತ್ತಿದ್ದರು. ಆದರೆ ಮೋದಿಜಿ ಅಂತಹ ಸಂವಾದಗಳನ್ನು ತಪ್ಪಿಸಿಕೊಳ್ಳುತ್ತಾರೆ. ನೀವು ಇಂದಿರಾಜಿಯವರೊಂದಿಗೆ ಭಿನ್ನಾಭಿಪ್ರಾಯ ಹೊಂದಲು ಸಾಧ್ಯವಿತ್ತು, ಆದರೆ ಮೋದಿಜಿ ಅವರೊಂದಿಗೆ ಅಲ್ಲ. ಇಂದಿರಾಜಿ ಅವರ ಕಾಲದಲ್ಲಿ ಜನರು ವ್ಯವಸ್ಥೆಯ ಭಾಗವಾಗಿದ್ದರು ಮತ್ತು ನಾಯಕರ ಅಭಿಪ್ರಾಯವನ್ನು ಟೀಕಿಸಬಹುದಿತ್ತು ಆದರೆ ಈಗ ಹಾಗಿಲ್ಲ" ಎಂದು ಅವರು ಹೇಳಿದರು.
2014 ರ ನವೆಂಬರ್ನಲ್ಲಿ ಬ್ರಿಸ್ಬೇನ್ನಲ್ಲಿ ನಡೆದ ತಮ್ಮ ಮೊದಲ ಜಿ 20 ಶೃಂಗಸಭೆಯಲ್ಲಿ ಪ್ರಧಾನಿ ಮೋದಿ ಭಾಗವಹಿಸಿದ್ದರು. ಅಲ್ಲಿ ಅವರು ಇತರ ದೇಶಗಳ ಹೆಚ್ಚಿನ ಸಹಕಾರದ ಮೂಲಕ ಕಪ್ಪು ಹಣ ಹೊಂದಿರುವವರ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಭರವಸೆ ನೀಡಿದ್ದರು ಎಂದು ಕಾಂಗ್ರೆಸ್ ಸಂವಹನ ಉಸ್ತುವಾರಿ ಜೈರಾಮ್ ರಮೇಶ್ ಹೇಳಿದರು. ಪ್ರತಿಪಕ್ಷಗಳೊಂದಿಗೆ ಸಮಾಲೋಚಿಸದೇ ಪ್ರಧಾನಿ ಸಂಸತ್ತಿನ ವಿಶೇಷ ಅಧಿವೇಶನವನ್ನು ಕರೆದಿದ್ದಾರೆ ಮತ್ತು ಪ್ರಧಾನಿಗೆ ಸಂಸದೀಯ ಮಾನದಂಡಗಳ ಬಗ್ಗೆ ಗೌರವವಿಲ್ಲ ಎಂದು ಅವರು ಆರೋಪಿಸಿದರು.
ಇದನ್ನೂ ಓದಿ :ಜಿ20 ಶೃಂಗಸಭೆ: 'ವಿಶ್ವವೇ ನಮ್ಮ ಕುಟುಂಬ' - ಜಗತ್ತಿಗೆ ಪ್ರಧಾನಿ ಮೋದಿ ಸಂದೇಶ
