ಸಿಧು ಮೂಸೆವಾಲಾ ಹತ್ಯೆ ಪ್ರಕರಣ.. ಗೋಲ್ಡಿ ಬ್ರಾರ್​ ವಿರುದ್ಧ ರೆಡ್​ ಕಾರ್ನರ್​ ನೋಟಿಸ್ ಜಾರಿ

ಸಿಧು ಮೂಸೆವಾಲಾ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಗೋಲ್ಡಿ ಬ್ರಾರ್​ ವಿರುದ್ಧ ರೆಡ್ ಕಾರ್ನರ್ ನೋಟಿಸ್ ಜಾರಿ ಮಾಡಲಾಗಿದೆ.

ನವದೆಹಲಿ:ಪಂಜಾಬ್​ ಗಾಯಕ ಸಿಧು ಮೂಸೆವಾಲಾ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸತೀಂದರ್​ಜೀತ್​ ಸಿಂಗ್​ ಅಲಿಯಾಸ್​ ಗೋಲ್ಡಿ ಬ್ರಾರ್​ ವಿರುದ್ಧ ಇಂಟರ್​​ಪೋಲ್​​ ರೆಡ್​ ಕಾರ್ನರ್​​ ನೋಟಿಸ್ ಜಾರಿ ಮಾಡಿದೆ. ಫರೀದ್​ಕೋಟ್​​ನಲ್ಲಿ ದಾಖಲಾದ ಎರಡು ಪ್ರತ್ಯೇಕ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಮೂಸೆವಾಲಾ ಹತ್ಯೆಗೆ 10 ದಿನಗಳ ಮೊದಲು ಗೋಲ್ಡಿ ಬ್ರಾರ್​ ವಿರುದ್ಧ ರೆಡ್​ ಕಾರ್ನರ್​ ನೋಟಿಸ್​ ಜಾರಿ ಮಾಡಿದ್ದಾರೆ.

ಗೋಲ್ಡಿ ಬ್ರಾರ್​​ ಕೆನಡಾದಲ್ಲಿ ವಾಸವಾಗಿದ್ದು, ಸಿಧು ಹತ್ಯೆಯ ಹೊಣೆ ಹೊತ್ತುಕೊಂಡಿರುವುದರಿಂದ ಪ್ರಕರಣದ ತನಿಖೆಗೆ ಅನುಕೂಲವಾಗುವಂತೆ ಸಿಬಿಐ ಇಂಟರ್​​ಪೋಲ್​ಗೆ ನೆರವು ಕೇಳಿತ್ತು. ಹಳೆಯ ಎರಡು ಪ್ರಕರಣಗಳ ಜತೆಗೆ ಸಿಧು ಹತ್ಯೆಯಲ್ಲಿ ಗೋಲ್ಡಿ ಬ್ರಾರ್​ ಕೈವಾಡ ಇರುವುದರಿಂದ ಪಂಜಾಬ್​ ಪೊಲೀಸ್​​ ಮತ್ತು ಸಿಬಿಐ ಇಂಟರ್​ಪೋಲ್​​ ಮೊರೆ ಹೋಗಿದೆ.

ಗೋಲ್ಡಿ ಬ್ರಾರ್​ ವಿರುದ್ಧದ ಪ್ರಕರಣಗಳನ್ನ ನವೆಂಬರ್​​ 2020 ಮತ್ತು ಫೆಬ್ರವರಿ 2021ರಲ್ಲಿ ದಾಖಲಿಸಲಾಗಿತ್ತು. ಇದರಲ್ಲಿ ಕೊಲೆ, ಕೊಲೆ ಯತ್ನ, ಶಸ್ತ್ರಾಸ್ತ್ರ ಕಾಯ್ದೆಯ ಆರೋಪಗಳಿವೆ. ಮೇ. 29ರಂದು ಪಂಜಾಬ್​ನ ಮಾನ್ಸಾ ಜಿಲ್ಲೆಯಲ್ಲಿ 28 ವರ್ಷದ ಗಾಯಕ ಸಿಧು ಮೂಸೆವಾಲಾ ಅವರನ್ನ ಕೆಲವು ಅಪರಿಚಿತ ದಾಳಿಕೋರರು ಗುಂಡಿಕ್ಕಿ ಕೊಂದಿದ್ದರು. ಗೋಲ್ಡಿ ಬ್ರಾರ್​ ಮೂಸೆವಾಲಾ ಹತ್ಯೆಯ ಹೊಣೆ ಹೊತ್ತುಕೊಂಡಿದ್ದಾರೆ.