ಇಂಟರ್​ನ್ಯಾಷನಲ್​ ನರ್ಸ್​ಸ್​​ ಡೇ: ದಾದಿಯರ ಯೋಗಕ್ಷೇಮಕ್ಕಾಗಿ ನಾವೂ ಪ್ರಾರ್ಥಿಸೋಣ

ಇಂದು ಅಂತಾರಾಷ್ಟ್ರೀಯ ದಾದಿಯರ ದಿನ. ನಮ್ಮ ಆರೋಗ್ಯವನ್ನು ಲೆಕ್ಕಿಸದೇ ಹಗಲಿರುಳು ದಣಿವರಿಯದೇ ರೋಗಿಗಳ ಸೇವೆ ಮಾಡುವ ದಾದಿಯರಿಗೆ ಇಂದಾದರೂ ಮರೆಯದೇ ಕೃತಜ್ಞತೆ ಹೇಳೋಣ.

ರೋಗಿಗಳಿಗೆ ಸೇವೆ ಸಲ್ಲಿಸಲು ಮತ್ತು ಚಿಕಿತ್ಸೆ ನೀಡಲು ವೈದ್ಯರೊಂದಿಗೆ ಹಗಲು ರಾತ್ರಿ ಕೆಲಸ ಮಾಡುವ ನರ್ಸ್​ಗಳಿಗೆ ಧನ್ಯವಾದ ಹೇಳುವುದನ್ನು ನಾವು ಆಗಾಗ್ಗೆ ಮರೆಯುತ್ತೇವೆ. ಕೋವಿಡ್​ ಸಾಂಕ್ರಾಮಿಕ ಕಾಯಿಲೆಯ ಪ್ರಪಾತದಲ್ಲಿ ಮುಳುಗುತ್ತಿರುವ ದೇಶವನ್ನು ಹೊರತೆಗೆಯಲು ಈ ನರ್ಸ್​ಗಳು ಶ್ರಮಿಸುತ್ತಿದ್ದಾರೆ. ಇಂದು ಅಂತಾರಾಷ್ಟ್ರೀಯ ನರ್ಸ್​ ದಿನ ಹಿನ್ನೆಲೆ ಅವರಿಗೆ ಕೃತಜ್ಞತೆ ಸಲ್ಲಿಸೋಣ.

ನರ್ಸ್​ಗಳು: ನಿಜವಾದ ಫ್ರಂಟ್​ಲೈನ್​ ವಾರಿಯರ್ಸ್​:

ಸಾಮಾನ್ಯವಾಗಿ, ರೋಗಿಯ ಚಿಕಿತ್ಸೆ ವಿಚಾರದಲ್ಲಿ ವೈದ್ಯರಿಗೆ ಮನ್ನಣೆ ಹೆಚ್ಚು. ಹಾಗಾಗಿ ನರ್ಸ್​ಗಳನ್ನ ಹೆಚ್ಚಾಗಿ ಪಕ್ಕಕ್ಕೆ ಸರಿಸಲಾಗುತ್ತದೆ. ಇದು ಸಮರ್ಥನೀಯವಲ್ಲ. ಏಕೆಂದರೆ ವೈದ್ಯರು ರೋಗಿಗೆ ಚಿಕಿತ್ಸೆ ನೀಡುತ್ತಾರೆ, ಆದರೆ, ನರ್ಸ್​ಗಳು ರೋಗಿಗೆ 24x7 ರೋಗಿಗಳ ಜತೆ ಇದ್ದು, ಅವರ ಸೇವೆ ಮಾಡುತ್ತಾರೆ. ಆದ್ದರಿಂದ, ಅವರನ್ನು ಗೌರವಿಸಲು, ಇಂಟರ್​ನ್ಯಾಷನಲ್​ ನರ್ಸ್​ ದಿನಾಚರಣೆಯನ್ನು ಪ್ರತಿವರ್ಷ ಮೇ 12 ರಂದು ಆಚರಿಸಲಾಗುತ್ತದೆ, ಇದು ಆಧುನಿಕ ಶುಶ್ರೂಷೆಯ ಸ್ಥಾಪಕರೆಂದು ಕರೆಯಲ್ಪಡುವ ಫ್ಲಾರೆನ್ಸ್ ನೈಟಿಂಗೇಲ್ ಅವರ ಜನ್ಮದಿನಾಂಕ. ಕ್ರಿಮಿಯಾ ಯುದ್ಧದ ಸಮಯದಲ್ಲಿ ನರ್ಸ್​ಗಳ ವ್ಯವಸ್ಥಾಪಕ ಮತ್ತು ತರಬೇತುದಾರನಾಗಿ ನೀಡಿದ ಕೊಡುಗೆಯಿಂದ ನೈಟಿಂಗೇಲ್ ಹೆಚ್ಚು ಖ್ಯಾತಿ ಗಳಿಸಿದ್ರು.

ಈ ವರ್ಷದ ಅಂತಾರಾಷ್ಟ್ರೀಯ ನರ್ಸ್​ ದಿನದ ಥಿಮ್​, ‘ಎ ವಾಯ್ಸ್ ಟು ಲೀಡ್ - ಭವಿಷ್ಯದ ಆರೋಗ್ಯ ರಕ್ಷಣೆಗಾಗಿ ಒಂದು ದೃಷ್ಟಿ’ ಎಂಬ ವಿಷಯದೊಂದಿಗೆ ಆಚರಿಸಲ್ಪಡುತ್ತಿದೆ. ಇಂಟರ್​ನ್ಯಾಷನಲ್​ ಕೌನ್ಸಿಲ್ ಆಫ್ ನರ್ಸಸ್ (ಐಸಿಎನ್) ಹೇಳುವಂತೆ, 2021, ನರ್ಸ್​​ಗಳ​ ಭವಿಷ್ಯವನ್ನು ಹೇಗೆ ನೋಡುತ್ತದೆ ಮತ್ತು ಅವರ ವೃತ್ತಿಯು ಆರೋಗ್ಯದ ಮುಂದಿನ ಹಂತವನ್ನು ಹೇಗೆ ಪರಿವರ್ತಿಸುತ್ತದೆ ಎಂಬುದನ್ನು ತೋರಿಸಲು ನಾವು ಪ್ರಯತ್ನಿಸಲಾಗ್ತಿದೆ.

ನರ್ಸಿಂಗ್​ ಕುರಿತು ಅರ್ಥೈಸಿಕೊಳ್ಳುವುದು:

ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್‌ಒ), “ನರ್ಸಿಂಗ್ ಎಲ್ಲ ವಯಸ್ಸಿನ ವ್ಯಕ್ತಿಗಳು, ಕುಟುಂಬಗಳು, ಗುಂಪುಗಳು ಮತ್ತು ಸಮುದಾಯಗಳ ಅನಾರೋಗ್ಯ ಅಥವಾ ಎಲ್ಲ ಸ್ವಾಯತ್ತ ಮತ್ತು ಸಹಕಾರಿ ಆರೈಕೆಯನ್ನು ಒಳಗೊಂಡಿದೆ. ಇದು ಆರೋಗ್ಯದ ಉತ್ತೇಜನ, ಅನಾರೋಗ್ಯದ ತಡೆಗಟ್ಟುವಿಕೆ ಮತ್ತು ಅನಾರೋಗ್ಯ, ಅಂಗವಿಕಲ ಮತ್ತು ಸಾಯುತ್ತಿರುವ ಜನರ ಆರೈಕೆಯನ್ನು ಒಳಗೊಂಡಿದೆ. ಆರೋಗ್ಯ ರಕ್ಷಣೆಯಲ್ಲಿ ದಾದಿಯರು ನಿರ್ಣಾಯಕ ಪಾತ್ರ ವಹಿಸುತ್ತಾರೆ. ಆರೋಗ್ಯ ತುರ್ತುಸ್ಥಿತಿಗಳನ್ನು ಪತ್ತೆಹಚ್ಚುವಲ್ಲಿ ಮತ್ತು ರೋಗ ತಡೆಗಟ್ಟುವಿಕೆಯಲ್ಲಿ ಮುಂಚೂಣಿಯಲ್ಲಿ ಕೆಲಸ ಮಾಡುವುದು ಮತ್ತು ಪ್ರಚಾರ, ತಡೆಗಟ್ಟುವಿಕೆ, ಚಿಕಿತ್ಸೆ ಮತ್ತು ಪುನರ್ವಸತಿ ಸೇರಿದಂತೆ ಪ್ರಾಥಮಿಕ ಆರೋಗ್ಯ ರಕ್ಷಣೆಯ ವಿತರಣೆಯಲ್ಲಿ ಅವರು ಮೊದಲಿಗರು ಎಂದು ಹೇಳುತ್ತದೆ.

ಅನೇಕ ದೇಶಗಳಲ್ಲಿ , ನರ್ಸ್​ಗಳು ಎಲ್ಲಾ ಆರೋಗ್ಯ ವೃತ್ತಿಪರರಲ್ಲಿ ಅರ್ಧದಷ್ಟು ಪಾಲು ಹೊಂದಿದ್ದಾರೆ ಮತ್ತು ಆರೋಗ್ಯ ಕ್ರಮಗಳನ್ನು ಹೇಗೆ ಮುಂಚೂಣಿಯಲ್ಲಿ ಮತ್ತು ವ್ಯವಸ್ಥಾಪಕ ಮಟ್ಟದಲ್ಲಿ ಆಯೋಜಿಸುತ್ತಾರೆ ಮತ್ತು ಅನ್ವಯಿಸುತ್ತಾರೆ ಎಂಬುದರಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ.

ನರ್ಸ್​ಗಳು ಮತ್ತು ಕೋವಿಡ್​- 19:

ಜಗತ್ತು ಎದುರಿಸುತ್ತಿರುವ ಮತ್ತೊಂದು ಸವಾಲು ನರ್ಸ್​ಗಳ ಕೊರತೆ. ಐಸಿಎನ್ ಪ್ರಕಾರ, ಮುಂದಿನ ಆರು ವರ್ಷಗಳಲ್ಲಿ ವಿಶ್ವದ ಆರು ದಾದಿಯರಲ್ಲಿ ಒಬ್ಬರು ನಿವೃತ್ತಿ ಹೊಂದುವ ನಿರೀಕ್ಷೆಯಿದೆ, ಅಂದರೆ 4.7 ಮಿಲಿಯನ್ ಹೊಸ ನರ್ಸ್​ಗಳು ಶಿಕ್ಷಣ ಪಡೆಯಬೇಕಾಗುತ್ತದೆ. ಅಸ್ತಿತ್ವದಲ್ಲಿರುವ ಹದಗೆಟ್ಟ ಆರೋಗ್ಯ ವ್ಯವಸ್ಥೆ ಕೊರೊನಾ ಉಲ್ಬಣಿಸಿದ ಪರಿಣಾಮದಿಂದಾಗಿ, ಜಾಗತಿಕವಾಗಿ ನರ್ಸ್​ಗಳ ಕೊರತೆಯನ್ನು ನೀಗಿಸಲು ಮುಂದಿನ ಕೆಲವು ವರ್ಷಗಳಲ್ಲಿ 13 ದಶಲಕ್ಷ ದಾದಿಯರು ಬೇಕಾಗಬಹುದು ಎಂದು ಐಸಿಎನ್ ಅಂದಾಜಿಸಿದೆ.

ಈ ವರ್ಷವೂ, ಸಾಂಕ್ರಾಮಿಕ ರೋಗ ಆರೋಗ್ಯ ವ್ಯವಸ್ಥೆಗೆ ಸವಾಲುಗಳನ್ನ ಎಸೆಯುತ್ತಲೇ ಇದೆ, ವೈದ್ಯರು ಮತ್ತು ಇತರ ಆರೋಗ್ಯ ಕಾರ್ಯಕರ್ತರೊಂದಿಗೆ, ನರ್ಸ್​ಗಳು ಸಾಕಷ್ಟು ಕೊಡುಗೆ ನೀಡಿದ್ದಾರೆ ಮತ್ತು ಮೂಲತಃ ಆರೋಗ್ಯ ವ್ಯವಸ್ಥೆಯ ಬೆನ್ನೆಲುಬಾಗಿದ್ದಾರೆ. ಅವರು ದಣಿದಿರಬಹುದು ಮತ್ತು ಮಾನಸಿಕವಾಗಿ ಕುಗ್ಗಿರಬಹುದು, ಆದರೆ, ಅವರು ಅದನ್ನು ಬಿಟ್ಟುಕೊಟ್ಟಿಲ್ಲ. ಅವರು ಪ್ರತಿದಿನ ತಮ್ಮನ್ನು ತಾವು ಅಪಾಯಕ್ಕೆ ಒಡ್ಡಿಕೊಳ್ಳುತ್ತಿರುವುದನ್ನು ಲೆಕ್ಕಿಸದೇ ತಮ್ಮ ರಾಷ್ಟ್ರದ ಜನರಿಗೆ ಸೇವೆ ಸಲ್ಲಿಸಲು ಅವರು ಇನ್ನೂ ದೃಢವಾಗಿ ನಿಂತಿದ್ದಾರೆ.

ದಾದಿಯರಿಲ್ಲದೇ, ಕೋವಿಡ್​ ಎಂಬ ಶತ್ರುವಿನ ವಿರುದ್ಧದ ಯುದ್ಧ ಗೆಲ್ಲಲು ಕಷ್ಟವಾಗುತ್ತದೆ. ಹೀಗಾಗಿ ನರ್ಸ್​ಗಳೆಲ್ಲಾ ಒಂದಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಕೋವಿಡ್​ ರೋಗಿಗಳ ಪ್ರಾಣ ಉಳಿಸಲು ಪಣ ತೊಟ್ಟಿದ್ದಾರೆ. ಕೋವಿಡ್​ನಿಂದ ಕತ್ತಲೆ ಆವರಿಸಿರುವ ಆಸ್ಪತ್ರೆಗಳಲ್ಲಿ ಜನರ ಮನಸ್ಥಿತಿಯನ್ನು ಹಗುರಗೊಳಿಸಲು ಹಾಡುತ್ತಾ ಮತ್ತು ನೃತ್ಯ ಮಾಡುವ ಮೂಲಕ ರೋಗಿಗಳನ್ನು ಬದುಕಲು ಪ್ರೇರೇಪಿಸುತ್ತಿದ್ದಾರೆ.

ಆದ್ದರಿಂದ, ಈ ಮುಂಚೂಣಿಯ ಕಾರ್ಯಕರ್ತರಿಗೆ ಕೃತಜ್ಞತೆ ಸಲ್ಲಿಸಲು ನಾವು ಸ್ವಲ್ಪ ಸಮಯ ನೀಡಬೇಕು. ಅವರ ಸಂಬಳ ಹೆಚ್ಚು ಮಾಡಿಲ್ಲವಾದರೂ ಕೆಲವು ಮಾಧ್ಯಮ ವರದಿಗಳು ಹೇಳುವಂತೆ, ಅಧಿಕ ಅವಧಿ ಕೆಲಸ ಮಾಡುತ್ತಿದ್ದಾರೆ, ತಮ್ಮನ್ನು ತಾವು ಅಪಾಯಕ್ಕೆ ದೂಡುತ್ತಾರೆ, ಹೀಗಾಗಿ ಅವರಿಗೆ ಉತ್ತಮ ಭತ್ಯೆ ನೀಡಬೇಕು. ಏಕೆಂದರೆ ಅವರು ತಮ್ಮ ದೈಹಿಕ ಮತ್ತು ಮಾನಸಿಕ ಆರೋಗ್ಯದ ಬಗ್ಗೆ ಕಾಳಜಿ ವಹಿಸದೆ, ನಮಗಾಗಿ ಹಗಲಿರುಳೆನ್ನದೇ ಶ್ರಮಿಸುತ್ತಿದ್ದಾರೆ. ಹಾಗಾಗಿ ಅವರ ಯೋಗಕ್ಷೇಮಕ್ಕಾಗಿ ನಾವು ಪ್ರಾರ್ಥಿಸೋಣ.