ಇಂದು ಅಂತಾರಾಷ್ಟ್ರೀಯ ಶಿಕ್ಷಣ ದಿನ: ಶಿಕ್ಷಣದ ಮೇಲೆ ಕೋವಿಡ್​ ಬಿಕ್ಕಟ್ಟಿನಿಂದಾದ ಪರಿಣಾಮವೇನು?

2021ರ ಜನವರಿ 24ರಂದು ಜಗತ್ತು ಮೂರನೇ 'ಶಿಕ್ಷಣ ದಿನ' ಆಚರಿಸುತ್ತಿದೆ. ಈ ವರ್ಷದ ಥೀಮ್ "ಕೋವಿಡ್-19 ಪೀಳಿಗೆಗೆ ಶಿಕ್ಷಣವನ್ನು ಮರುನೀಡಿ ಮತ್ತು ಪುನರುಜ್ಜೀವನಗೊಳಿಸಿ" ಎಂದಾಗಿದೆ.

ಹೈದರಾಬಾದ್:ಶಿಕ್ಷಣವು ಮಾನವ ಹಕ್ಕು, ಸಾರ್ವಜನಿಕ ಒಳಿತು ಮತ್ತು ಸಾರ್ವಜನಿಕ ಜವಾಬ್ದಾರಿ. ಶಾಂತಿ ಮತ್ತು ಅಭಿವೃದ್ಧಿಗೆ ಶಿಕ್ಷಣದ ಮಹತ್ವ ಸಾರಲು ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯು ಜನವರಿ 24ನ್ನು ಅಂತಾರಾಷ್ಟ್ರೀಯ ಶಿಕ್ಷಣ ದಿನವೆಂದು ಘೋಷಿಸಿತು.

ಎಲ್ಲರಿಗೂ ಅಂತರ್ಗತ ಮತ್ತು ಸಮಾನ ಗುಣಮಟ್ಟದ ಶಿಕ್ಷಣ ಹಾಗೂ ಅವಕಾಶಗಳೊಂದಿಗೆ, ಲಿಂಗ ಸಮಾನತೆಯನ್ನು ಸಾಧಿಸುವಲ್ಲಿ ಮತ್ತು ಲಕ್ಷಾಂತರ ಮಕ್ಕಳು, ಯುವಕರು ಮತ್ತು ವಯಸ್ಕರನ್ನು ಕಾಡುತ್ತಿರುವ ಬಡತನದ ಚಕ್ರವನ್ನು ಮುರಿಯಲು ಶಿಕ್ಷಣ ಅತ್ಯಗತ್ಯ.

2021ರ ಜನವರಿ 24ರಂದು ಜಗತ್ತು ಮೂರನೇ 'ಶಿಕ್ಷಣ ದಿನ' ಆಚರಿಸುತ್ತಿದೆ. ಈ ವರ್ಷದ ಥೀಮ್ "ಕೋವಿಡ್-19 ಪೀಳಿಗೆಗೆ ಶಿಕ್ಷಣವನ್ನು ಮರುನೀಡಿ ಮತ್ತು ಪುನರುಜ್ಜೀವನಗೊಳಿಸಿ".

ಇಂದು ಶಿಕ್ಷಣವು ಸುಸ್ಥಿರ ಅಭಿವೃದ್ಧಿ ಗುರಿಗಳ ಹೃದಯಭಾಗದಲ್ಲಿದೆ. ಅಸಮಾನತೆಗಳನ್ನು ಕಡಿಮೆ ಮಾಡಲು ಮತ್ತು ಆರೋಗ್ಯವನ್ನು ಸುಧಾರಿಸಲು ನಮಗೆ ಶಿಕ್ಷಣ ಬೇಕು. ಲಿಂಗ ಸಮಾನತೆಯನ್ನು ಸಾಧಿಸಲು ಮತ್ತು ಬಾಲ್ಯವಿವಾಹವನ್ನು ತೊಡೆದುಹಾಕಲು ಶಿಕ್ಷಣ ಅಗತ್ಯ. ನಮ್ಮ ಸಂಪನ್ಮೂಲಗಳನ್ನು ರಕ್ಷಿಸಲು ಶಿಕ್ಷಣ ಮುಖ್ಯ. ದ್ವೇಷದ ಮಾತು ಮತ್ತು ಅಸಹಿಷ್ಣುತೆಯ ವಿರುದ್ಧ ಹೋರಾಡಲು ಮತ್ತು ಜಾಗತಿಕ ಪೌರತ್ವವನ್ನು ಬೆಳೆಸಲು ನಮಗೆ ಶಿಕ್ಷಣ ಬೇಕು.

ಶಿಕ್ಷಣವು ಮಾನವ ಹಕ್ಕು:

ಶಿಕ್ಷಣದ ಹಕ್ಕನ್ನು ಸಾರ್ವತ್ರಿಕ ಮಾನವ ಹಕ್ಕುಗಳ ಘೋಷಣೆಯ 26ನೇ ಆರ್ಟಿಕಲ್​ನಲ್ಲಿ ಪ್ರತಿಪಾದಿಸಲಾಗಿದೆ. ಇದು ಉಚಿತ ಮತ್ತು ಕಡ್ಡಾಯ ಪ್ರಾಥಮಿಕ ಶಿಕ್ಷಣವನ್ನು ಬಯಸುತ್ತದೆ. 1989ರಲ್ಲಿ ಅಂಗೀಕರಿಸಲ್ಪಟ್ಟ ಮಕ್ಕಳ ಹಕ್ಕುಗಳ ಸಮಾವೇಶವು ಪ್ರತಿಯೊಂದು ದೇಶದಲ್ಲಿ ಉನ್ನತ ಶಿಕ್ಷಣ ಎಲ್ಲರಿಗೂ ಸಿಗುವಂತೆ ಪ್ರೇರೇಪಿಸುತ್ತದೆ.

ಸುಸ್ಥಿರ ಅಭಿವೃದ್ಧಿಗೆ ಶಿಕ್ಷಣ ಮುಖ್ಯ:

2015ರ ಸೆಪ್ಟೆಂಬರ್‌ನಲ್ಲಿ ಸುಸ್ಥಿರ ಅಭಿವೃದ್ಧಿಗಾಗಿ 2030ರ ಕಾರ್ಯಸೂಚಿಯನ್ನು ಅಂಗೀಕರಿಸಿದಾಗ, ಅಂತಾರಾಷ್ಟ್ರೀಯ ಸಮುದಾಯವು ತನ್ನ ಎಲ್ಲಾ 17 ಗುರಿಗಳ ಯಶಸ್ಸಿಗೆ ಶಿಕ್ಷಣ ಅತ್ಯಗತ್ಯ ಎಂದು ಗುರುತಿಸಿತು. ಸುಸ್ಥಿರ ಅಭಿವೃದ್ಧಿ ಗುರಿ 4, ನಿರ್ದಿಷ್ಟವಾಗಿ, 2030ರ ವೇಳೆಗೆ "ಅಂತರ್ಗತ ಮತ್ತು ಸಮಾನ ಗುಣಮಟ್ಟದ ಶಿಕ್ಷಣವನ್ನು ಖಾತರಿಪಡಿಸುವುದು ಮತ್ತು ಎಲ್ಲರಿಗೂ ಆಜೀವ ಕಲಿಕೆಯ ಅವಕಾಶಗಳನ್ನು ಉತ್ತೇಜಿಸುವುದು" ಎಂಬ ಗುರಿಯನ್ನು ಹೊಂದಿದೆ.

ಸಾರ್ವತ್ರಿಕ ಶಿಕ್ಷಣವನ್ನು ಸಾಧಿಸಲು ಸವಾಲುಗಳು:

ಶಿಕ್ಷಣವು ಮಕ್ಕಳಿಗೆ ಬಡತನದಿಂದ ಭರವಸೆಯ ಭವಿಷ್ಯದ ಹಾದಿಯನ್ನು ನೀಡುತ್ತದೆ. ಆದರೆ ಪ್ರಪಂಚದಾದ್ಯಂತ ಸುಮಾರು 265 ಮಿಲಿಯನ್ ಮಕ್ಕಳು ಮತ್ತು ಹದಿಹರೆಯದವರಿಗೆ ಶಾಲೆಗೆ ಪ್ರವೇಶಿಸಲು ಅಥವಾ ಪೂರ್ಣಗೊಳಿಸಲು ಅವಕಾಶ ಸಿಗುತ್ತಿಲ್ಲ. 617 ಮಿಲಿಯನ್ ಮಕ್ಕಳು ಮತ್ತು ಹದಿಹರೆಯದವರು ಮೂಲ ಗಣಿತವನ್ನು ಓದಲು, ಪರಿಹರಿಸಲು ಸಾಧ್ಯವಾಗುತ್ತಿಲ್ಲ. ಉಪ-ಸಹಾರನ್ ಆಫ್ರಿಕಾದಲ್ಲಿ 40%ಕ್ಕಿಂತ ಕಡಿಮೆ ಹುಡುಗಿಯರು ಲೋವರ್ ಸೆಕೆಂಡರಿ ಶಾಲೆಯನ್ನು ಪೂರ್ಣಗೊಳಿಸುತ್ತಾರೆ ಮತ್ತು ಸುಮಾರು ನಾಲ್ಕು ಮಿಲಿಯನ್ ಮಕ್ಕಳು ಮತ್ತು ಯುವ ನಿರಾಶ್ರಿತರು ಶಾಲೆಯಿಂದ ಹೊರಗುಳಿದಿದ್ದಾರೆ.

ಸಂಗತಿಗಳು ಮತ್ತು ಅಂಕಿ ಅಂಶಗಳು:

ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ ಪ್ರಾಥಮಿಕ ಶಿಕ್ಷಣದ ದಾಖಲಾತಿ ಶೇಕಡಾ 91ಕ್ಕೆ ತಲುಪಿದೆ. ಆದರೆ 57 ದಶಲಕ್ಷ ಪ್ರಾಥಮಿಕ ವಯಸ್ಸಿನ ಮಕ್ಕಳು ಶಾಲೆಯಿಂದ ಹೊರಗುಳಿದಿದ್ದಾರೆ.

ಶಾಲೆಗೆ ದಾಖಲಾಗದ ಅರ್ಧಕ್ಕಿಂತ ಹೆಚ್ಚು ಮಕ್ಕಳು ಉಪ-ಸಹಾರನ್ ಆಫ್ರಿಕಾದಲ್ಲಿ ವಾಸಿಸುತ್ತಿದ್ದಾರೆ.

ಪ್ರಾಥಮಿಕ ಶಾಲಾ ವಯಸ್ಸಿನ ಶಾಲೆಯಿಂದ ಹೊರಗುಳಿದ ಮಕ್ಕಳಲ್ಲಿ ಶೇಕಡ 50ರಷ್ಟು ಮಕ್ಕಳು ಸಂಘರ್ಷ ಪೀಡಿತ ಪ್ರದೇಶಗಳಲ್ಲಿ ವಾಸಿಸುತ್ತಿದ್ದಾರೆ.

ಶಿಕ್ಷಣದ ಮೇಲೆ ಕೋವಿಡ್-19 ಪರಿಣಾಮ:

ಯುಎನ್ ಎಜುಕೇಷನಲ್, ಸೈಂಟಿಫಿಕ್ ಮತ್ತು ಕಲ್ಚರಲ್ ಆರ್ಗನೈಸೇಶನ್ (ಯುನೆಸ್ಕೋ) ಪ್ರಕಾರ ಸಾಂಕ್ರಾಮಿಕ ರೋಗದಿಂದಾಗಿ ಈ ವರ್ಷ ಮಾತ್ರ 11 ಮಿಲಿಯನ್ ಬಾಲಕಿಯರು ಶಾಲೆಗೆ ಬರಲಾಗುತ್ತಿಲ್ಲ

ಮಲಾಲಾ ಫಂಡ್ ಸಂಗ್ರಹಿಸಿದ ವರದಿಯ ಪ್ರಕಾರ, ಸಾಂಕ್ರಾಮಿಕ ರೋಗವು ಕೊನೆಗೊಂಡ ನಂತರ ಬಡ ಸಮುದಾಯಗಳಲ್ಲಿ ಅಂದಾಜು 20 ಮಿಲಿಯನ್ ಮಾಧ್ಯಮಿಕ ಶಾಲಾ ವಯಸ್ಸಿನ ಬಾಲಕಿಯರು ಶಾಲೆಯಿಂದ ಹೊರಗುಳಿಯಬಹುದು.

ಸಾಂಕ್ರಾಮಿಕ ರೋಗದ ಸಂದರ್ಭದಲ್ಲಿ 25,000 ಮಕ್ಕಳು ಮತ್ತು ವಯಸ್ಕರ ಅನುಭವದ ಆಧಾರದ ಮೇಲೆ ಕಳೆದ ವರ್ಷ ಸೇವ್ ದಿ ಚಿಲ್ಡ್ರನ್ ನಡೆಸಿದ ಸಮೀಕ್ಷೆಯು, ಬಡ ಕುಟುಂಬಗಳ ಕೇವಲ ಶೇ 1 ಕ್ಕಿಂತಲೂ ಕಡಿಮೆ ಮಕ್ಕಳು ದೂರಸ್ಥ ಕಲಿಕೆಗೆ ಪ್ರವೇಶವನ್ನು ಹೊಂದಿದ್ದಾರೆಂದು ಕಂಡುಹಿಡಿದಿದೆ.

ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿನ ಶಾಲೆಗಳು ಗುಣಮಟ್ಟದ ಶಿಕ್ಷಣವನ್ನು ಒದಗಿಸಲು ಸುರಕ್ಷತೆಗಾಗಿ ಸಾಕಷ್ಟು ಹಣವನ್ನು ಹೊಂದಿಲ್ಲದಿರಬಹುದು.

ಕೋವಿಡ್-19ರ ಆರ್ಥಿಕ ಪರಿಣಾಮಗಳು ವಿಶ್ವಾದ್ಯಂತ ಮಕ್ಕಳು ಶಾಲೆಯಿಂದ ಹೊರಗುಳಿಯಲು ಕಾರಣವಾಗಿದ್ದು, ಸೇವ್ ದಿ ಚಿಲ್ಡ್ರನ್ ಅಂದಾಜಿನ ಪ್ರಕಾರ 9.7 ಮಿಲಿಯನ್ ಮಕ್ಕಳು ಶಾಲೆಯಿಂದ ಶಾಶ್ವತವಾಗಿ ಹೊರಗುಳಿಯಬಹುದು.

ನ್ಯೂಯಾರ್ಕ್ ಟೈಮ್ಸ್ ಪ್ರಕಾರ, 2020ರಲ್ಲಿ ಲಕ್ಷಾಂತರ ಮಕ್ಕಳನ್ನು ಬಾಲ ಕಾರ್ಮಿಕ ಪದ್ಧತಿಗೆ ಒತ್ತಾಯಿಸಲಾಯಿತು ಮತ್ತು ಕೋವಿಡ್-19 ಅಭಿವೃದ್ಧಿ ಹೊಂದುತ್ತಿರುವ ಆರ್ಥಿಕತೆಗಳ ಮೇಲೆ ಪರಿಣಾಮ ಬೀರುತ್ತಿರುವುದರಿಂದ, ಹೆಚ್ಚಿನ ಮಕ್ಕಳು ಕಾರ್ಮಿಕತೆಯ ಅನ್ವೇಷಣೆಯಲ್ಲಿ ಶಾಲೆಯಿಂದ ಹೊರಗುಳಿಯುವ ಅಪಾಯವಿದೆ.

ಸಂಘರ್ಷ ಮತ್ತು ಬಿಕ್ಕಟ್ಟಿನಿಂದ ಪೀಡಿತ ಪ್ರದೇಶಗಳಲ್ಲಿ ವಾಸಿಸುವ ಸುಮಾರು 75 ಮಿಲಿಯನ್ ಮಕ್ಕಳು ಶಿಕ್ಷಣವನ್ನು ಪ್ರವೇಶಿಸಲು ಈಗಾಗಲೇ ಅಪಾರ ಅಡೆತಡೆಗಳನ್ನು ಎದುರಿಸಿದ್ದಾರೆ. ಕೋವಿಡ್-19 ಸಾಂಕ್ರಾಮಿಕವು ಈಗ ಈ ಸವಾಲುಗಳನ್ನು ಉಲ್ಬಣಗೊಳಿಸುತ್ತಿದೆ ಮತ್ತು ಪ್ರಪಂಚದಾದ್ಯಂತದ ಕೆಲವು ಅಂಚಿನಲ್ಲಿರುವ ಮಕ್ಕಳ ಭವಿಷ್ಯವನ್ನು ಅಪಾಯಕ್ಕೆ ದೂಡುತ್ತಿದೆ.