ಉತ್ತರಪ್ರದೇಶ: ಡಿಯೋರಿಯಾ ಜಿಲ್ಲೆಯಲ್ಲಿ ಓರ್ವ ವ್ಯಕ್ತಿಯಿಂದ ಗೂಗಲ್ ಪೇ ಮೂಲಕ 10 ಸಾವಿರ ರೂಪಾಯಿ ಲಂಚ ಪಡೆದಿದ್ದ ಇನ್ಸ್ಪೆಕ್ಟರ್ ಮತ್ತು ಇಬ್ಬರು ಹೆಡ್ ಕಾನ್‌ಸ್ಟೆಬಲ್‌ಗಳನ್ನು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಮಾನತುಗೊಳಿಸಿದ್ದಾರೆ.
ಡಿಯೋರಿಯಾದ ಭಾಗಲ್ಪುರ್ ಚೆಕ್ಪೋಸ್ಟ್‌ನ ಉಸ್ತುವಾರಿ ವಹಿಸಿಕೊಂಡಿದ್ದ ಪೊಲೀಸ್ ಇನ್ಸ್ಪೆಕ್ಟರ್ ಅಮಿತ್ ಪಾಂಡೆ ಗೂಗಲ್ ಪೇ ಮೂಲಕ ವ್ಯಕ್ತಿಯೊಬ್ಬರಿಂದ 10 ಸಾವಿರ ರೂಪಾಯಿ ಲಂಚ ಪಡೆದಿದ್ದಾರೆ ಎಂದು ಅವರ ಜತೆಗೆ ಇಬ್ಬರೂ ಹೆಡ್ ಕಾನ್ಸ್ಟೇಬಲ್ಗಳನ್ನು ಸಹ ಸಸ್ಪೆಂಡ್ ಮಾಡಲಾಗಿದೆ.
ವಾರಣಾಸಿ ಜಿಲ್ಲೆಯ ಖೋಜ್ವಾ ಬಜಾರ್ ನಿವಾಸಿ ರಜತ್ ಕುಮಾರ್ ರಜತ್ ಕುಮಾರ್ ಅವರು ಮೇ 30 ರಂದು ಕಾರಿನಲ್ಲಿ ಭಾಗಲ್ಪುರ್ ಮೂಲಕ ಬಿಹಾರ ರಾಜ್ಯದ ಚಂಪಾರಣ್ಗೆ ತೆರಳುತ್ತಿದ್ದ ವೇಳೆ ಭಾಗಲ್ಪುರ್ ಸೇತುವೆ ಬಳಿ ಕಾರು ಟ್ರಕ್‌ಗೆ ಡಿಕ್ಕಿ ಹೊಡೆದಿದೆ. ಡಿಕ್ಕಿ ಹೊಡೆದ ನಂತರ, ಟ್ರಕ್ ಚಾಲಕ ಓಡಿಹೋಗಲು ಪ್ರಯತ್ನಿಸಿದ್ದು, ರಜತ್ ಕುಮಾರ್ ಟ್ರಕ್ ಚಾಲಕನನ್ನು ಹಿಡಿದಿದ್ದಾರೆ. ಈ ವೇಳೆ ಟ್ರಕ್ ಚಾಲಕ ಮತ್ತು ರಜತ್ ಕುಮಾರ್ ನಡುವೆ ಗಲಾಟೆ ನಡೆದಿತ್ತು. ಅದೇ ಸಮಯದಲ್ಲಿ, ಇಬ್ಬರು ಕಾನ್ಸ್ಟೇಬಲ್ ಜೊತೆ ಸ್ಥಳದಲ್ಲಿದ್ದ ಇನ್ಸ್ಪೆಕ್ಟರ್ ಅಮಿತ್ ಪಾಂಡೆ ರಜತ್ ಕುಮಾರ್ ಹಾಗೂ ಟ್ರಕ್ ಚಾಲಕನ ಬಳಿ ಬಂದು ತಮ್ಮ ಪರ್ಸ್ ವಶಪಡಿಸಿಕೊಂಡಿದ್ದಾಗಿ ರಜತ್ ಹೇಳಿದ್ದಾರೆ. ಅಲ್ಲದೇ 50 ಸಾವಿರ ರೂಪಾಯಿ ಬೇಡಿಕೆ ಇಟ್ಟಿದ್ದು, ಹಣವನ್ನು ಗೂಗಲ್ ಪೇ ಮಾಡುವಂತೆ ನಂಬರ್ ಕೊಟ್ಟಿದ್ದಾಗಿ ರಜತ್ ತಿಳಿಸಿದ್ದಾರೆ. 10 ಸಾವಿರ ಹಣವನ್ನು ಗೂಗಲ್ ಪೇ ಮಾಡಿದ ಬಳಿಕ ತಮ್ಮನ್ನು ಅಲ್ಲಿಂದ ಹೋಗಲು ಬಿಟ್ಟರು ಎಂದು ರಜತ್ ಹೇಳಿದ್ದಾರೆ. ಅಲ್ಲದೇ ಕೇಳಿದಷ್ಟೂ ಲಂಚ ಕೊಡದ ಕಾರಣ, ಇನ್ಸ್ಪೆಕ್ಟರ್ ಆತನ ಮೇಲೆ ಹಲ್ಲೆ ನಡೆಸಿ ನಿಂದಿಸಿದ್ದಾರೆ ಎಂದೂ ಆರೋಪಿಸಿದ್ದಾರೆ.
ರಜತ್ ಕುಮಾರ್ ಈ ಬಗ್ಗೆ ಎಸ್ಪಿ ಅವರಿಗೆ ಕಂಪ್ಲೆಂಟ್ ಮಾಡಿದ್ದು, ತನಿಖೆ ನಡೆಸಿದಾಗ ರಜತ್ ಮಾಡಿದ ಆರೋಪ ನಿಜ ಎಂಬುದು ಸಾಬೀತಾಗಿದೆ. ಈ ಹಿನ್ನೆಲೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಮಿತ್ ಪಾಂಡೆ ಮತ್ತು ಹೆಡ್ ಕಾನ್‌ಸ್ಟೆಬಲ್‌ಗಳಾದ ಕಮಲೇಶ್ ಯಾದವ್ ಮತ್ತು ಉದಯ್ ಪ್ರತಾಪ್ ರೈ ಅವರನ್ನು ಅಮಾನತುಗೊಳಿಸಿ ಆದೇಶ ಹೊರಹಾಕಿದ್ದಾರೆ.ಅಲ್ಲದೇ ಇವರ ವಿರುದ್ಧ ಭ್ರಷ್ಟಾಚಾರ ಕಾಯ್ದೆ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.