ಭಾರತದ ಮೊದಲ ಮಾನವಸಹಿತ ಸಾಗರ ಮಿಷನ್‌ ಆರಂಭ

ಸುಮಾರು 12 ಗಂಟೆಗಳ ಕಾಲದ ಸಹಿಷ್ಣುತೆಯನ್ನು ಹೊಂದಿರುವ ವಾಹನವಾಗಿದೆ. ತುರ್ತು ಸಂದರ್ಭದಲ್ಲಿ 96 ಗಂಟೆಗಳ ಕಾಲ ಕೆಲಸ ಮಾಡಲಿದೆ. ಹಾಗೆ ಮತ್ಸ್ಯ 6000 ಎಂಬ ಆಳ ಸಮುದ್ರದ ವಾಹನವು 1000 ಮತ್ತು 5500 ಮೀಟರ್ ಆಳದಲ್ಲಿ ಕೆಲಸ ಮಾಡಲಿದೆ..

ಚೆನ್ನೈ: ಭಾರತದ ಮೊದಲ ಮಾನವಸಹಿತ ಸಾಗರ ಮಿಷನ್ 'ಸಮುದ್ರಯಾನ'ಕ್ಕೆ ಕೇಂದ್ರ ಸಚಿವ ಜಿತೇಂದ್ರ ಸಿಂಗ್ ಅವರು ಹಸಿರು ನಿಶಾನೆ ತೋರಿಸಿದ್ದಾರೆ. ಈ ಮೂಲಕ ಕೆಲವೇ ಇಂತಹ ಸಾಧನೆ ಮಾಡಿದ ರಾಷ್ಟ್ರಗಳ ಪಟ್ಟಿಯಲ್ಲಿ ಭಾರತ ಸೇರಿದೆ.

ರಾಷ್ಟ್ರವು ವಿಜ್ಞಾನ ಮತ್ತು ತಂತ್ರಜ್ಞಾನದಲ್ಲಿ ಭಾರಿ ಪ್ರಗತಿಯನ್ನು ಸಾಧಿಸಿದೆ ಮತ್ತು ಗಗನ್ಯಾನ್ ಕಾರ್ಯಕ್ರಮದ ಭಾಗವಾಗಿ ಭಾರತೀಯರು ಬಾಹ್ಯಾಕಾಶಕ್ಕೆ ಹೋದಾಗ, ಮತ್ತೊಬ್ಬರು ಸಮುದ್ರದ ಆಳಕ್ಕೆ ಧುಮುಕುತ್ತಾರೆ ಎಂದು ಸಚಿವರು ಹೊಗಳಿದ್ದಾರೆ.

ಈ ಸಂಬಂಧ ಟ್ವೀಟ್ ಮಾಡಿರುವ ಅವರು, ಭಾರತದ ಮೊದಲ ಮಾನವ ಸಹಿತ ಸಾಗರ ಮಿಷನ್ ಸಮುದ್ರಯಾನವನ್ನು ಚೆನ್ನೈನಲ್ಲಿ ಪ್ರಾರಂಭಿಸಲಾಯಿತು. USA, ರಷ್ಯಾ, ಜಪಾನ್, ಫ್ರಾನ್ಸ್ ಮತ್ತು ಚೀನಾದ ಇಂತಹ ನೀರೊಳಗಿನ ವಾಹನಗಳನ್ನು ಹೊಂದಿರುವ ಎಲೈಟ್ ಕ್ಲಬ್‌ಗೆ ನಮ್ಮ ರಾಷ್ಟ್ರವೂ ಸೇರಿದೆ. ಈ ಮೂಲಕ ನೀಲಿ ಆರ್ಥಿಕತೆ ಹೆಚ್ಚಲಿದೆ ಎಂದಿದ್ದಾರೆ.

ಇಲ್ಲಿನ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಓಶಿಯನ್ ಟೆಕ್ನಾಲಜಿಯಲ್ಲಿ ತಮ್ಮ ಲೋಕಾರ್ಪಣಾ ಭಾಷಣದಲ್ಲಿ ಮಾತನಾಡಿ, ಈ ಮಿಷನ್ ವೈಜ್ಞಾನಿಕ ಸಾಮರ್ಥ್ಯವನ್ನು ಹೆಚ್ಚಿಸುವುದಲ್ಲದೆ ರಾಷ್ಟ್ರಕ್ಕೆ ಗೌರವದ ಭಾವನೆಯನ್ನು ನೀಡುತ್ತದೆ. ನಾವು ವಿಶ್ವದ ಯಾವುದೇ ದೇಶಕ್ಕಿಂತ ಕಡಿಮೆಯಿಲ್ಲದ ಕೆಲಸವನ್ನು ಮಾಡುತ್ತಿದ್ದೇವೆ ಎಂದು ಹೇಳಿದರು.

ವೈಶಿಷ್ಟ್ಯಗಳೇನು? :ಈ ಸಮುದ್ರಯಾನ ಮಿಷನ್‌ ಅನ್ನು ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಓಷನ್ ಟೆಕ್ನಾಲಜಿ (ಎನ್‌ಐಒಟಿ) ಕೈಗೊಂಡಿದೆ. ಈ ಯೋಜನೆಯು 6,000 ಕೋಟಿ ಆಳ ಸಮುದ್ರ ಮಿಷನ್‌ನ ಭಾಗವಾಗಿದೆ. ಆಳ ಸಮುದ್ರದ ವಾಹನವಾದ ಮತ್ಸ್ಯ 6000 ಅನ್ನು ವಿನ್ಯಾಸ ಮಾಡಲಾಗಿದೆ.

ಈ ವಾಹನವು 2.1-ಮೀಟರ್ ವ್ಯಾಸದ ಸುತ್ತುವರಿದ ಜಾಗವನ್ನು ಹೊಂದಿದೆ. ಟೈಟಾನಿಯಂ ಮಿಶ್ರಲೋಹ ಬಳಸಿ ಈ ವಾಹನವನ್ನು ನಿರ್ಮಾಣ ಮಾಡಲಾಗಿದೆ. ಮೂರು ಜನರನ್ನು ಸಾಗಿಸಲು ಸಾಧ್ಯವಾಗುವ ವಿನ್ಯಾಸ ಈ ಆಳ ಸಮುದ್ರದ ವಾಹನವಾದ ಮತ್ಸ್ಯದಲ್ಲಿದೆ.

ಸುಮಾರು 12 ಗಂಟೆಗಳ ಕಾಲದ ಸಹಿಷ್ಣುತೆಯನ್ನು ಹೊಂದಿರುವ ವಾಹನವಾಗಿದೆ. ತುರ್ತು ಸಂದರ್ಭದಲ್ಲಿ 96 ಗಂಟೆಗಳ ಕಾಲ ಕೆಲಸ ಮಾಡಲಿದೆ. ಹಾಗೆ ಮತ್ಸ್ಯ 6000 ಎಂಬ ಆಳ ಸಮುದ್ರದ ವಾಹನವು 1000 ಮತ್ತು 5500 ಮೀಟರ್ ಆಳದಲ್ಲಿ ಕೆಲಸ ಮಾಡಲಿದೆ.

ಈ ಯಾನ ಪಾಲಿಮೆಟಾಲಿಕ್ ಮ್ಯಾಂಗನೀಸ್, ಗ್ಯಾಸ್‌ ಹೈಡ್ರೇಟ್‌ಗಳು, ಹೈಡ್ರೋ-ಥರ್ಮಲ್ ಸಲ್ಫೈಡ್‌ಗಳು ಮತ್ತು ಕೋಬಾಲ್ಟ್ ಕ್ರಸ್ಟ್‌ಗಳಂತಹ ನಿರ್ಜೀವ ಸಂಪನ್ಮೂಲಗಳ ಪರಿಶೋಧನೆಗೆ ಸಹಕಾರಿ ಆಗಲಿದೆ.