ಮುಂಬೈ (ಮಹಾರಾಷ್ಟ್ರ):ಶುಕ್ರವಾರದಂದು ಸ್ಥಳೀಯ ಷೇರು ಮಾರುಕಟ್ಟೆಗಳು ಆರಂಭಿಕ ವಹಿವಾಟಿನಲ್ಲಿ ನಷ್ಟದೊಂದಿಗೆ ಆರಂಭವಾದವು. ಕೋವಿಡ್ ಉಲ್ಬಣಿಸುವ ಭಯ ಹೆಚ್ಚಾಗಿರುವುದರಿಂದ ಜಾಗತಿಕ ಮಾರುಕಟ್ಟೆಗಳು ದುರ್ಬಲವಾಗಬಹುದು ಎಂಬ ಸೂಚನೆಗಳು ಬರುತ್ತಿವೆ. ಆರೋಗ್ಯ ವಲಯದ ಷೇರುಗಳಾದ ಗ್ರ್ಯಾನ್ಯೂಲ್ಸ್, ಮೊರೆಪೆನ್ ಲ್ಯಾಬ್, ಥೈರೋಕೇರ್ ಮತ್ತು ಸಿಪ್ಲಾ ಷೇರುಗಳು ಬೆಳಗ್ಗೆ ಏರಿಕೆ ಕಂಡರೆ, ಬಿಎಸ್‌ಇ ಐಟಿಯ ಹೆಚ್ಚಿನ ಷೇರುಗಳು ಆರಂಭಿಕ ಅವಧಿಯಲ್ಲಿ ಕುಸಿತ ಕಂಡವು.
ಶುಕ್ರವಾರ ಬೆಳಗ್ಗೆ 9.30ಕ್ಕೆ ಎಸ್‌ & ಪಿ ಬಿಎಸ್‌ಇ ಸೆನ್ಸೆಕ್ಸ್ 376 ಪಾಯಿಂಟ್ ಕುಸಿದು 60,450ಕ್ಕೆ ತಲುಪಿದ್ದರೆ, ಎನ್‌ಎಸ್‌ಇ ನಿಫ್ಟಿ 115 ಪಾಯಿಂಟ್ ಇಳಿಕೆಯಾಗಿ 17,995.45ಕ್ಕೆ ತಲುಪಿದೆ. ಏಷ್ಯನ್‌ ಮಾರುಕಟ್ಟೆಗಳಲ್ಲಿ ಜಪಾನ್‌ನ ನಿಕ್ಕಿ ಬೆಳಗಿನ ವಹಿವಾಟಿನಲ್ಲಿ 297 ಪಾಯಿಂಟ್ ಕುಸಿದಿದ್ದರೆ, ಹಾಂಕಾಂಗ್‌ನ ಹ್ಯಾಂಗ್‌ಸೆಂಗ್‌ 35.5 ಪಾಯಿಂಟ್ ಇಳಿಕೆ ಕಂಡಿದೆ. ಚೀನಾದ ಶಾಂಘೈ ಎರಡು ಅಂಕ ಗಳಿಸಿತು.