ರೈಲ್ವೆ ಸಹಾಯವಾಣಿ ನಂಬರ್​ಗೆ ಟಿಕ್ ಮಾರ್ಕ್ ನೀಡಿದ ಟ್ರೂಕಾಲರ್​​

ರೈಲ್ವೆ ಸಹಾಯವಾಣಿ ಹೆಸರಲ್ಲಿ ವಂಚನೆ ನಡೆಯದಂತೆ ತಡೆಯಲು ಟ್ರೂಕಾಲರ್​​​​ನೊಂದಿಗೆ ರೈಲ್ವೆ ಇಲಾಖೆ ಕೈಜೋಡಿಸಿದ್ದು, ರೈಲ್ವೆ ಸಹಾಯವಾಣಿಯನ್ನ ವೆರಿಫೈಡ್ ನಂಬರ್ ಎಂದು ಗುರುತಿಸಲಾಗಿದೆ.

ನವದೆಹಲಿ: ಕರೆ ಮಾಡಿದವರ ಮಾಹಿತಿ ನೀಡುವ ಆ್ಯಪ್ ಟ್ರೂಕಾಲರ್ ಇದೀಗ ಭಾರತೀಯ ರೈಲ್ವೆಯೊಂದಿಗೆ ಕೈಜೋಡಿಸಿ ಪ್ರಯಾಣಿಕರಿಗೆ ಇನ್ನಷ್ಟು ಹತ್ತಿರವಾಗಲಿದೆ. ರೈಲ್ವೆ ಇಲಾಖೆಯ 139 ಸಹಾಯವಾಣಿಗೆ ಟಿಕ್ ಮಾರ್ಕ್​ ನೀಡಿದ್ದು, ಕರೆ ಮಾಡಿದಾಗ ಅಥವಾ ಸ್ವೀಕರಿಸುವಾಗ ಹಸಿರು ಬಣ್ಣದಲ್ಲಿ ಗೋಚರಿಸಲಿದೆ.

ರೈಲ್ವೆ ಸಹಾಯವಾಣಿಯಿಂದ ಬರುವ ಕರೆಗಳು ಹಾಗೂ ಸಂದೇಶಗಳು ಪರಿಶೀಲಿಸಲ್ಪಟ್ಟ ನಂಬರ್​​​ ಎಂದು ಗ್ರಾಹಕರಿಗೆ ತೋರಿಸಲಿದೆ. ಇದರಿಂದ ವಂಚನೆ ಸೇರಿ ಗ್ರಾಹಕರ ಗೊಂದಲಕ್ಕೆ ತೆರೆಬೀಳಲಿದೆ.

139ರಿಂದ ಬರುವ ಕರೆಗಳಿಗೆ ಟಿಕ್ ಮಾರ್ಕ್​​ನ ಜೊತೆ ಭಾರತೀಯ ರೈಲ್ವೆ ಲೋಗೋ ಸಹ ಕಾಣಸಿಗಲಿದೆ. ಇದರಿಂದ ಗ್ರಾಹಕರು ಬಹುಬೇಗವಾಗಿ ಈ ನಂಬರ್​ ಖಾತ್ರಿಪಡಿಸಿಕೊಳ್ಳಬಹುದಿದೆ. ಈ ಹೊಸ ಉಪಕ್ರಮದಲ್ಲಿ ಟ್ರೂಕಾಲರ್​​​ ಜೊತೆಗೆ ಕೆಲಸ ಮಾಡಲು ನಾವು ಸಂತೋಷಪಡುತ್ತೇವೆ. ಟ್ರೂಕಾಲರ್‌ನೊಂದಿಗೆ ತಾಂತ್ರಿಕ ಸಹಯೋಗದೊಂದಿಗೆ ಗ್ರಾಹಕರಿಗೆ ಐಆರ್​ಸಿಟಿಸಿ ದೃಢ, ವಿಶ್ವಾಸಾರ್ಹ ಮತ್ತು ಸುರಕ್ಷಿತ ಸಂವಹನಕ್ಕೆ ಒಂದು ಹೆಜ್ಜೆ ಮುಂದೆ ಹೋಗಿದ್ದೇವೆ ಎಂದು ಐಆರ್​ಸಿಟಿಸಿ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ರಜನಿ ಹಸಿಜಾ ಹೇಳಿದ್ದಾರೆ.

ಇದನ್ನೂ ಓದಿ:ರೇಷನ್‌ ಅಂಗಡಿಗಳಲ್ಲೇ ಅಡುಗೆ ಸಿಲಿಂಡರ್‌ ವಿತರಣೆಗೆ ಕೇಂದ್ರ ಸರ್ಕಾರದ ಚಿಂತನೆ..!