ನವದೆಹಲಿ: ದೇಶದಲ್ಲಿ 140 ದಿನಗಳ ಬಳಿಕ ಅತಿ ಕಡಿಮೆ ಕೋವಿಡ್ ಪ್ರಕರಣ ದಾಖಲಾಗಿದ್ದು, ಕಳೆದ 24 ಗಂಟೆಯಲ್ಲಿ ಹೊಸದಾಗಿ 38,353 ಹೊಸ ಪಾಸಿಟಿವ್ ಕೇಸ್‌ಗಳು ದಾಖಲಾಗಿವೆ. ಈ ಮೂಲಕ ಸಕ್ರಿಯ ಪ್ರಕರಣಗಳ ಸಂಖ್ಯೆ 3,86,351 ಕ್ಕೆ ತಲುಪಿದೆ. ಗುಣಮುಖರ ಪ್ರಮಾಣ ಶೇ.97.45 ರಷ್ಟಿದೆ.
ದೇಶದಲ್ಲಿ ಹೊಸದಾಗಿ 38 ಸಾವಿರ ಸೋಂಕಿತರು ಪತ್ತೆ: 140 ದಿನಗಳ ಬಳಿಕ ಕಡಿಮೆ ಕೇಸ್ ದಾಖಲು
ಸುಮಾರು 140 ದಿನಗಳ ಬಳಿಕ ದೇಶದಲ್ಲಿ ಕೋವಿಡ್ ಪ್ರಕರಣಗಳ ಸಂಖ್ಯೆಯಲ್ಲಿ ಇಳಿಕೆ ಕಂಡುಬಂದಿದೆ. ಮೂರನೇ ಅಲೆಯ ಆತಂಕದಲ್ಲಿರುವಾಗ ಸೋಂಕಿನ ಪ್ರಮಾಣ ಕಡಿಮೆಯಾಗಿರುವುದು ಸಂತಸದ ವಿಷಯ.
ಕೊರೊನಾ
ಇದುವರೆಗೆ ದೇಶದಾದ್ಯಂತ ಒಟ್ಟು 53.24 ಕೋಟಿ (53,24,44,960) ಡೋಸ್ ಕೋವಿಡ್ ಲಸಿಕೆ ಒದಗಿಸಲಾಗಿದೆ. ಈ ಪೈಕಿ ಇಂದು ಬೆಳಗ್ಗೆ 8 ಗಂಟೆವರೆಗೆ ವ್ಯರ್ಥವಾದ ಡೋಸ್ ಸೇರಿ 51,56,11,035 ಡೋಸ್ ಲಸಿಕೆ ವಿತರಣೆ ಮಾಡಲಾಗಿದೆ ಎಂದು ಆರೋಗ್ಯ ಇಲಾಖೆ ಮಾಹಿತಿ ನೀಡಿದೆ.
2.25 ಕೋಟಿಗಿಂತ ಹೆಚ್ಚು (2,25,03,900) ಬಳಕೆಯಾಗದ ಕೋವಿಡ್ ಲಸಿಕೆ ಪ್ರಮಾಣಗಳು ದೇಶದ ಖಾಸಗಿ ಆಸ್ಪತ್ರೆಗಳಲ್ಲಿ ಇನ್ನೂ ಲಭ್ಯವಿದೆ ಎಂದು ಇಲಾಖೆ ತಿಳಿಸಿದೆ.