ಕೊರೊನಾ ಭಾರತಕ್ಕೆ ಕಾಲಿಟ್ಟು ಇಂದಿಗೆ 1 ವರ್ಷ... ಎಲ್ಲಿ ಪತ್ತೆಯಾಗಿತ್ತು ಫಸ್ಟ್​​ ಕೇಸ್​!?

ಡೆಡ್ಲಿ ವೈರಸ್ ಕೊರೊನಾ ಭಾರತಕ್ಕೆ ಲಗ್ಗೆ ಹಾಕಿ ಇಂದಿಗೆ 1 ವರ್ಷ ಕಳೆದು ಹೋಗಿದೆ. ಜನವರಿ 30, 2020ರಲ್ಲಿ ಮಹಾಮಾರಿ ದೇಶದಲ್ಲಿ ಲಗ್ಗೆ ಹಾಕಿತ್ತು.

ನವದೆಹಲಿ:ಮಹಾಮಾರಿ ಕೊರೊನಾ ವೈರಸ್​ ವಿರುದ್ಧದ ಹೋರಾಟ ಮುಂದುವರೆದಿದ್ದು, ಭಾರತದಲ್ಲಿ ಮೊದಲ ಕೊರೊನಾ ವೈರಸ್​ ಸೋಂಕು ಕಾಲಿಟ್ಟು ಇಂದಿಗೆ ಒಂದು ವರ್ಷ ತುಂಬಿದೆ. 2020ರ ಜ. 30ರಂದು ಕೇರಳದ ತ್ರಿಶ್ಯೂರ್​​ನಲ್ಲಿ ಪ್ರಥಮ ಕೇಸ್​ ದಾಖಲಾಗಿತ್ತು.

ಚೀನಾದ ವುಹಾನ್​​ನಿಂದ ಭಾರತಕ್ಕೆ ಮರಳಿದ್ದ ವಿದ್ಯಾರ್ಥಿಯೋರ್ವನಲ್ಲಿ ಕೊರೊನಾ ಸೋಂಕು ಕಾಣಿಸಿಕೊಂಡಿತ್ತು. ಇದಾದ ಬಳಿಕ ಮಾರ್ಚ್​ ತಿಂಗಳಲ್ಲಿ ಪ್ರಧಾನಿ ನರೇಂದ್ರ ಮೋದಿ ದೇಶಾದ್ಯಂತ ಲಾಕ್​ಡೌನ್ ಮಾಡಿ ಮಹತ್ವದ ಘೋಷಣೆ ಮಾಡಿದ್ದರು. ಹೀಗಾಗಿ ಶಾಲಾ-ಕಾಲೇಜು​, ಚಿತ್ರಮಂದಿರ, ಪಾರ್ಕ್​, ದೇವಸ್ಥಾನ ಸೇರಿದಂತೆ ಎಲ್ಲವೂ ಬಂದ್​ ಆಗಿದ್ದವು.

ಏಪ್ರಿಲ್​ ತಿಂಗಳವರೆಗೆ ಅತಿ ಕಡಿಮೆ ಕೇಸ್​ಗಳು ಭಾರತದಲ್ಲಿ ದಾಖಲಾಗಿದ್ದವು. ಆದರೆ ಮೇ ನಂತರ ಪ್ರತಿದಿನ ಲಕ್ಷಾಂತರ ಕೇಸ್​ಗಳು ಭಾರತದಲ್ಲಿ ದೃಢಪಟ್ಟಿವೆ. ಭಾರತದಲ್ಲಿ ಸದ್ಯ 1,69,824 ಕೋವಿಡ್​ ಆ್ಯಕ್ಟೀವ್ ಕೇಸ್​ಗಳಿವೆ.

ಭಾರತದಲ್ಲಿ ಇಲ್ಲಿಯವರೆಗೆ ಬರೋಬ್ಬರಿ 1,07,33,131 ಜನರಿಗೆ ಕೊರೊನಾ ಸೋಂಕು ತಗುಲಿದ್ದು, ಇದರಲ್ಲಿ 1,54,147 ಜನರು ಮಹಾಮಾರಿಗೆ ಬಲಿಯಾಗಿದ್ದಾರೆ. ಅಮೆರಿಕ ಹಾಗೂ ಬ್ರೆಜಿಲ್​ ಹೊರತುಪಡಿಸಿದ್ರೆ ಅತಿ ಹೆಚ್ಚು ಕೋವಿಡ್ ಕೇಸ್​ ದಾಖಲಾಗಿದ್ದು ಭಾರತದಲ್ಲಿ ಎಂಬುದು ಗಮನಾರ್ಹ ಸಂಗತಿಯಾಗಿದೆ.

ಸದ್ಯ ಕೋವಿಡ್​ ವಿರುದ್ಧ ಹೋರಾಡಲು ಭಾರತದಲ್ಲಿ ಎರಡು ಲಸಿಕೆ ಅಭಿವೃದ್ಧಿಗೊಂಡಿದ್ದು, ಕೋವಿಶೀಲ್ಡ್ ಹಾಗೂ ಕೊವ್ಯಾಕ್ಸಿನ್​ ನೀಡಲಾಗುತ್ತಿದೆ.