ನವದೆಹಲಿ: ದೇಶದಲ್ಲಿ ಕೊರೊನಾ ಹಾವಳಿ ಇನ್ನೂ ಕಡಿಮೆಯಾಗಿಲ್ಲ. ಕಳೆದೊಂದು ದಿನದಲ್ಲಿ 1,134 ಹೊಸ ಕೋವಿಡ್ ವೈರಸ್ ಪ್ರಕರಣಗಳು ದಾಖಲಾಗಿದ್ದು, ಸಕ್ರಿಯ ಪ್ರಕರಣಗಳ ಸಂಖ್ಯೆ 7,026 ಕ್ಕೆ ಏರಿಕೆಯಾಗಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ.
ಕಳೆದ 24 ಗಂಟೆಗಳ ಅವಧಿಯಲ್ಲಿ ಛತ್ತೀಸ್‌ಗಢ, ದೆಹಲಿ, ಗುಜರಾತ್, ಮಹಾರಾಷ್ಟ್ರ ಮತ್ತು ಕೇರಳದಲ್ಲಿ ತಲಾ ಒಬ್ಬೊಬ್ಬರು ಮೃತಪಟ್ಟಿದ್ದಾರೆ. ಈ ಮೂಲಕ ಒಟ್ಟು ಸಾವನ್ನಪ್ಪಿರುವವರ ಸಂಖ್ಯೆ 5,30,813 ಕ್ಕೆ ಏರಿಕೆಯಾಗಿದೆ. ಸದ್ಯಕ್ಕೆ ದೈನಂದಿನ ಪಾಸಿಟಿವಿಟಿ ದರ 1.09 ರಷ್ಟಿದ್ದು, ವಾರದ ಪಾಸಿಟಿವಿಟಿ ದರ ಶೇಕಡಾ 0.98 ಇದೆ. ದೇಶದಲ್ಲಿ ಇದುವರೆಗೆ 4.46 ಕೋಟಿ (4,46,98,118) ಮಂದಿಗೆ ಸೋಂಕು ತಗುಲಿದೆ. ರಾಷ್ಟ್ರೀಯ COVID-19 ಚೇತರಿಕೆ ದರವು 98.79 ಪ್ರತಿಶತದಷ್ಟು ದಾಖಲಾಗಿದೆ. ಸಾವಿನ ಪ್ರಮಾಣ ಶೇಕಡಾ 1.19 ರಷ್ಟಿದೆ.
ಪ್ರಸ್ತುತ ಕೋವಿಡ್ ಸೋಂಕಿನಿಂದ ಚೇತರಿಸಿಕೊಂಡವರ ಸಂಖ್ಯೆ 4,41,60,279 ಕ್ಕೆ ಏರಿಯಾಗಿದೆ. ಸೋಂಕು ಪತ್ತೆಹಚ್ಚಲು ಇದುವರೆಗೆ ಒಟ್ಟು 92.05 ಕೋಟಿ ಪರೀಕ್ಷೆಗಳನ್ನ ನಡೆಸಲಾಗಿದ್ದು, ಕಳೆದ 24 ಗಂಟೆಗಳಲ್ಲಿ 1,03,831 ಮಂದಿಯನ್ನು ಪರೀಕ್ಷಿಸಲಾಗಿದೆ.
ಇದನ್ನೂ ಓದಿ :ಪರೋಕ್ಷ ಧೂಮಪಾನಿಗಳಲ್ಲಿ ಕೊರೊನಾ ಸೋಂಕಿನ ಅಪಾಯ ಹೆಚ್ಚು
ವ್ಯಾಕ್ಸಿನೇಷನ್ ಮಾಹಿತಿ:ಸಚಿವಾಲಯ ನೀಡಿದ ಮಾಹಿತಿ ಪ್ರಕಾರ, ರಾಷ್ಟ್ರವ್ಯಾಪಿ ಕೋವಿಡ್ 19 ಲಸಿಕಾ ಅಭಿಯಾನದಡಿಯಲ್ಲಿ ಇದುವರೆಗೆ ದೇಶದಲ್ಲಿ 220.65 ಕೋಟಿ ಕೋವಿಡ್ ಲಸಿಕೆ ನೀಡಲಾಗಿದೆ. ಇನ್ನು ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಮಂಗಳವಾರ 83 ಕೋವಿಡ್ -19 ಪ್ರಕರಣಗಳು ಪತ್ತೆಯಾಗಿದ್ದು, ಒಂದು ಸಾವು ಸಂಭವಿಸಿದೆ. ಸದ್ಯಕ್ಕೆ ಶೇಕಡಾ 5.83 ಪಾಸಿಟಿವಿಟಿ ದರ ಇದೆ. ಕಳೆದ ಕೆಲವು ದಿನಗಳಿಂದ ಭಾರತದಲ್ಲಿ ಕೋವಿಡ್ -19 ವೈರಸ್ ಪ್ರಕರಣಗಳಲ್ಲಿ ಹಠಾತ್ ಏರಿಕೆ ಕಂಡುಬಂದಿದೆ ಮತ್ತು ಹೊಸ ತಳಿ XBB.1.16 ವೈರಸ್ ವೇಗವಾಗಿ ಹರಡುತ್ತಿದೆ.
ಇದನ್ನೂ ಓದಿ :ಶೀತ, ಕೆಮ್ಮಿನಿಂದ ಪಾರಾಗಲು ನಿಮ್ಮ ಡಯಟ್ನಲ್ಲಿರಲಿ ಈ ವಸ್ತುಗಳು!
ಪರೋಕ್ಷ ಧೂಮಪಾನಿಗಳಿಗೆ ಎಚ್ಚರಿಕೆ: ಇನ್ನು ಪರೋಕ್ಷ ಧೂಮಪಾನಿಗಳು ಗಂಭೀರ ಕೊರೊನಾ ಸೋಂಕಿಗೆ ತುತ್ತಾಗುವ ಅಪಾಯ ಇದೆ ಎಂದು ಅಧ್ಯಯವೊಂದು ತಿಳಿಸಿದೆ. ಮೊದಲ ಬಾರಿಗೆ ಆರು ರಾಜ್ಯಗಳಲ್ಲಿ ಏಮ್ಸ್ ಗೋರಖ್ಪುರ ಈ ಅಧ್ಯಯನ ನಡೆಸಿದೆ. ಧೂಮಪಾನಿಗಳಲ್ಲದವರಲ್ಲಿ ಅಂದ್ರೆ ಪರೋಕ್ಷ ಧೂಮಪಾನಿಗಳು ಸೇವಿಸುವ ಹೊಗೆ ಮತ್ತು ಕೋವಿಡ್ ತೀವ್ರತೆಯ ನಡುವಿನ ಕುರಿತು ಈ ಅಧ್ಯಯನ ನಡೆಸಲಾಗಿದೆ. ಈ ಪ್ರಕಾರ, ಮನೆಯಲ್ಲಿ ಇತರರ ಧೂಮಪಾನದ ಚಟದಿಂದಾಗಿ ಪರೋಕ್ಷವಾಗಿ ಧೂಮಪಾನಕ್ಕೆ ಒಳಗಾಗುವವರು ಗಂಭೀರ ಕೋವಿಡ್ ಸೋಂಕಿಗೆ ತುತ್ತಾಗುವವರ ಸಾಧ್ಯತೆ 3.03 ರಷ್ಟು ಹೆಚ್ಚಿದೆ. ಕೆಲಸದ ಸ್ಥಳದಲ್ಲಿ ಪರೋಕ್ಷ ಧೂಮಪಾನದಿಂದ 2.19 ಪಟ್ಟು ಕೋವಿಡ್ 19 ಸೋಂಕು ಹರಡುವ ಅಪಾಯ ಹೆಚ್ಚಿದೆ ಎಂದು ತಿಳಿಸಿದೆ.
ಇದನ್ನೂ ಓದಿ :ಕೊರೊನಾ ವೈರಾಣು ಪಸರಿಸಿದ್ದು ಚೀನಾದ ವುಹಾನ್ ಲ್ಯಾಬ್ನಿಂದ: ಅಮೆರಿಕದ ಎಫ್ಬಿಐ
